រដ្ឋាភិបាលកំណត់ដាក់ថ្ងៃ«ទិវាចងចាំ» ជាថ្ងៃបុណ្យជាតិ ដើម្បីរំឮកដល់ការឈឺចាប់

ជាតិ

រដ្ឋាភិបាលកំណត់ដាក់ថ្ងៃ«ទិវាចងចាំ» ជាថ្ងៃបុណ្យជាតិ ដើម្បីរំឮកដល់ការឈឺចាប់

21, Feb 2018 , 8:39 am

រូបភាព

ដោយ: ថ្មីៗ

ភ្នំពេញ៖ រដ្ឋាភិបាល បានកំណត់យកថ្ងៃទី២០ ឧសភា ដែលជា«ទិវាជាតិនៃការចងចាំ» ដាក់បញ្ចូលក្នុងថ្ងៃបុណ្យជាតិជាផ្លូវការ ហើយអនុញ្ញាតឲ្យប្រជាពលរដ្ឋឈប់សម្រាកជាសាធារណៈ។

រដ្ឋាភិបាល បានបញ្ជាក់ថា ការកំណត់យកថ្ងៃ«ទិវាជាតិនៃការចងចាំ» ជាថ្ងៃបុណ្យជាតិនេះ សម្រាប់ជាការរំលឹកដល់ជនរងគ្រោះ និងការឈឺចាប់ពីឧក្រិដ្ឋកម្ម ដែលកើតមានក្នុងរបបកម្ពុជាប្រជាធិបតេយ្យ ចាប់ពីថ្ងៃទី១៧ មេសា ១៩៧៥ ដល់ថ្ងៃទី៦ មករា ១៩៧៩ ដើម្បីលើកតម្កើងការគោរពវិញ្ញាណក្ខន្ធ និងការធ្វើបុណ្យឧទ្ទិសដល់ជនរងគ្រោះ ដែលបានស្លាប់នៅក្នុងរបបនេះ។

រដ្ឋាភិបាល បានបញ្ជាក់ពីគោលបំណងយ៉ាងដូច្នេះថា៖«លើកតម្កើងការរំលឹកដល់ជនរងគ្រោះ ការស្ដារកិត្តិយសនិងសេចក្តីថ្លៃថ្នូរ របស់ជនគ្រោះ ទោះជានៅរស់ ឬក៏បានបាត់បង់ជីវិតក៏ដោយ។ ប៉ះប៉ូវដល់ការឈឺចាប់ផ្លូវចិត្ត និងផ្នែកសង្គមដល់ជនរងគ្រោះ និងក្រុមគ្រួសារ ។ចូលរួមក្នុងការផ្សះផ្សាជាតិ និងជំរុញឲ្យមានសុខដុមរមនីយកម្ម ក្នុងសង្គមកម្ពុជា និងលើកកម្ពស់ការផ្សព្វផ្សាយនិងការយល់ដឹងអំពីអំពើឃោឃៅ ដែលកើតមាននៅក្នុងរបបកម្ពុជាប្រជាធិបតេយ្យ កុំឲ្យកើតមានឡើងសារជាថ្មី»។

ចំណែកប្រជាពលរដ្ឋត្រូវបានផ្ដល់ឱកាសឲ្យរៀបចំតាមបែបជំនឿ សាសនា ឬទំនៀមទម្លាប់របស់ខ្លួន តាមគោលបំណង របស់រដ្ឋាភិបាលខាងលើនេះផងដែរ។ នេះបើតាមអនុក្រឹត្យរដ្ឋាភិបាល ចុះថ្ងៃទី១៤ កុម្ភៈ៕