អន្តរជាតិ
ម៉ាឡេស៊ីនឹងពិភាក្សាជាមួយថៃជុំវិញវាសនាជនជាតិ Uighur ១១នាក់ ដែលចិនកំពុងចង់បាន ឧបនាយករដ្ឋមន្រ្តីម៉ាឡេស៊ី Ahmad Zahid Hamidi (រូបភាព៖ AFP)
× ឧបនាយករដ្ឋមន្ត្រីម៉ាឡេស៊ី Zahid Hamidi និយាយថា ម៉ាឡេស៊ីនឹងជជែកជាមួយភាគីថៃជុំវិញអនាគតរបស់ជនជាតិ Uighur ចំនួន១១នាក់ ដែលរត់គេចពីថៃចូលម៉ាឡេស៊ី។ ចិនចង់ឲ្យម៉ាឡេស៊ីបញ្ជូនជនជាតិ Uighur ទាំង១១ នាក់ទៅចិនវិញ ប៉ុន្តែអង្គការការពារសិទ្ធិមនុស្សបានទទូចឲ្យម៉ាឡេស៊ីកុំធ្វើតាមសំណើរបស់ចិន ព្រោះជនជាតិ Uighur ទាំងនេះ នឹងប្រឈមមុខការដាក់ទោស ឬការធ្វើទារុណកម្មមិនខាន។
វាសនាជនជាតិ Uighur ចំនួន១១នាក់ក្នុងចំណោម២០នាក់ ដែលរត់គេចពីមន្ទីរឃុំខ្លួនភាគត្បូងប្រទេសថៃចូលទឹកដីម៉ាឡេស៊ី ស្ថិតក្នុងភាពមិនច្បាស់លាស់នៅឡើយ ខណៈដែលចិនបានស្នើធ្វើបត្យាប័នពួកគេផ្លូវការ។ ជនជាតិ Uighur ទាំងនេះបានចូលទឹកដីម៉ាឡេស៊ីកាលពីខែវិច្ឆិកា ឆ្នាំ២០១៧ និងត្រូវអាជ្ញាធរម៉ាឡេស៊ីឃុំខ្លួន។ មកដល់ថ្ងៃទី១០ ខែកុម្ភៈ ឆ្នាំនេះ ក្រុងប៉េកាំងក៏ដាក់សំណើធ្វើបត្យាប័នតែម្ដង។
យ៉ាងណាមិញ អាជ្ញាធរម៉ាឡេស៊ីមិនទាន់ឆ្លើយតបយ៉ាងណាទៅនឹងសំណើរបស់ចិនឡើយ។ ឧបនាយករដ្ឋមន្ត្រីម៉ាឡេស៊ី Zahid Hamidi នៅថ្ងៃទី២០ ខែកុម្ភៈ ថា ខាងម៉ាឡេស៊ី នឹងជជែករឿងនេះបន្តទៀតជាមួយភាគីថៃ មុននឹងសម្រេចចិត្តតាមក្រោយ។ លោកបន្តថា មកទល់ពេលនេះ ជនជាតិ Uighur មួយចំនួនទៀត បន្តស្ថិតក្រោមការឃុំខ្លួននៅថៃដដែល ហើយម៉ាឡេស៊ីនឹងសម្រេចចិត្តដោយមិនឲ្យប្រទេសណាបាក់មុខឡើយ។
បើតាមទូរទស្សន៍សិង្ហបុរី Channel NewsAsia លោក Hamidi លើកឡើងថា ម៉ាឡេស៊ីនឹងបន្តពិភាក្សាជាមួយប្រទេសពាក់ព័ន្ធលើបញ្ហាការទូត និងសន្តិសុខ ហើយម៉ាឡេស៊ីនឹងស្ដាប់មតិក្រុមមនុស្សធម៌ ក៏ដូចជាអង្គការសិទ្ធិមនុស្សក្នុងស្រុក ក្នុងតំបន់ និងពិភពលោក។ ការស៊ើបអង្កេតកំពុងធ្វើឡើងដើម្បីបញ្ជាក់ថា ជនជាតិភាគតិចមូស្លីមទាំងនោះមានកំហុសដូចការចោទប្រកាន់របស់ចិនក្នុងសំណើធ្វើបត្យាប័ន។
នៅដើមសប្ដាហ៍នេះ អាមេរិកបានបង្ហាញក្ដីបារម្ភថា ម៉ាឡេស៊ីអាចបញ្ជូនជនជាតិ Uighur ទៅឲ្យអាជ្ញាធរចិនវិញ ស្របពេលដែលអង្គការឃ្លាំមើលសិទ្ធិមនុស្សស្នើឲ្យម៉ាឡេស៊ីធានាថា ជនមូស្លីមទាំង១១ មិនត្រូវបានបញ្ជូនទៅវិញឡើយ។ ក្រុមអ្នកការពារសិទ្ធិមនុស្សបារម្ភថា អាជ្ញាធរចិននឹងរំលោភបំពានសិទ្ធិរបស់ពួកគេ ឃុំឃាំងដោយបង្ខំ ធ្វើទារុណកម្ម ដូចធ្លាប់ធ្វើលើជនជាតិ Uighur ដែលត្រូវបញ្ជូនទៅស្រុកវិញនោះ។
យ៉ាងណាក្ដី ម៉ាឡេស៊ីទំនងជាមិនអាចទ្រាំទ្រសម្ពាធរបស់ចិនបានឡើយ ឯម្យ៉ាងទំនាក់ទំនងរវាងក្រុងគួឡាឡាំពួ និងក្រុងប៉េកាំង កំពុងតែល្អស្រាប់។ ជំនួយជាច្រើនរបស់ចិនសម្រាប់រដ្ឋាភិបាលម៉ាឡេស៊ី អាចអូសទាញរដ្ឋអាស៊ីអាគ្នយ៍មួយឲ្យធ្វើតាមបំណងរបស់ខ្លួនបានយ៉ាងងាយ។ ជាការពិត ម៉ាឡេស៊ីក៏៏មានប្រវត្តិបញ្ជូនជនជាតិ Uighur ទៅឲ្យចិនវិញដែរនាពេលកន្លងមក។ មានន័យថា ម៉ាឡេស៊ីក៏អាចធ្វើរឿងដដែលបានដែរ៕
Tag:
ម៉ាឡេស៊ី
ថៃ
ចិន
Uighur
© រក្សាសិទ្ធិដោយ thmeythmey.com