លោក ត្រាំ ចង់ឲ្យគ្រូបង្រៀនកាន់កាំភ្លើងដើម្បីការពារកូនសិស្ស

អន្តរជាតិ

លោក ត្រាំ ចង់ឲ្យគ្រូបង្រៀនកាន់កាំភ្លើងដើម្បីការពារកូនសិស្ស

22, Feb 2018 , 2:42 pm

រូបភាព

ប្រធានាធិបតី ដូណាល់ ត្រាំ ជួបជាមួយសិស្សវិទ្យាល័យដែលរួចជីវិតពីហេតុការណ៍បាញ់នៅរដ្ឋ Florida (រូបភាព៖ Xinhua)

ដោយ: តន ចាន់រិទ្ធារ៉ា

ក្រោយហេតុការណ៍បាញ់រះនៅសាលារៀននៅរដ្ឋ Florida ដែលសម្លាប់កូនសិស្ស និងគ្រូបង្រៀនអស់១៧នាក់ ប្រធានាធិបតីអាមេរិក ដូណាល់ ត្រាំ បានសន្យាបង្កើនពង្រឹងការត្រួតពិនិត្យការប្រើប្រាស់កាំភ្លើង។ លោក ត្រាំ ក៏ចង់ឲ្យគ្រូបង្រៀននៅតាមសាលារៀនអាចកាន់កាំភ្លើងដើម្បីការពារកូនសិស្សរបស់ខ្លួនដែរ។ សិស្សសាលាក្មេងៗនៅទូទាំងអាមេរិកបានចេញមកតវ៉ាទាមទារឲ្យមានការរឹតបន្តឹងការគ្រប់គ្រងកាំភ្លើងក្នុងប្រទេស។

ប្រធានាធិបតីអាមេរិកលោក ដូណាល់ ត្រាំ នៅថ្ងៃទី២១ ខែកុម្ភៈ បានជួបជាមួយសិស្សសាលាដែលរួចជីវិត និងឪពុកម្ដាយកូនសិស្សដែលបាត់បង់ជីវិតក្នុងការបាញ់សម្លាប់រង្គាលនៅវិទ្យាល័យមួយក្នុងរដ្ឋ Florida នៅឯសេតវិមាន។ លោក ត្រាំ បានស្ដាប់ការរៀបរាប់ទុក្ខសោករបស់សិស្សក្មេងៗ និងឪពុកម្ដាយដែលកូនៗរបស់ខ្លួនបានស្លាប់ដោយសារកាំភ្លើងម៉ាក AR-15 របស់ជនដៃដល់ឈ្មោះ Nikolas Cruz វ័យ១៩ឆ្នាំ។

ក្នុងជំនួបមួយម៉ោងដែលមានវត្តមានគ្រួសារធ្លាប់រងគ្រោះក្នុងហេតុការណ៍ពីមុនៗដែរ លោក ត្រាំ បានប្ដេជ្ញាចិត្តចាត់វិធានការណ៍តឹងរ៉ឹង។ បើតាមទីភ្នាក់ងារព័ត៌មាន Xinhua លោកប្រធានាធិបតីអាមេរិកបានសន្យាបង្កើនការត្រួតពិនិត្យប្រវត្តិរូប និងសុខភាពខួរក្បាលរបស់អ្នកទិញកាំភ្លើង។ នេះក៏ព្រោះតែជនដៃដល់ឈ្មោះ Cruz នេះ អាចទិញកាំភ្លើងប្រើប្រាស់បាន ទាំងខ្លួនមិនទាន់គ្រប់អាយុអនុញ្ញាតដោយច្បាប់ផងនោះ។

ចំពោះមុខសិស្សក្មេងៗ និងក្រុមគ្រួសារជនរងគ្រោះ លោក ត្រាំ ក៏លើកឡើងវិធានការមួយទៀតដើម្បីទប់ស្កាត់ការបាញ់បោះនៅក្នុងសាលារៀន។ នោះ គឺលោកចង់ឲ្យគ្រូបង្រៀនមានសិទ្ធិកាន់កាំភ្លើងក្នុងបរិវេណសាលា ព្រោះអាជ្ញាធរមិនអាចពង្រាយកម្លាំងសន្តិសុខ១០០នាក់នៅក្នុងសាលាបានទេ។ ប្រធានាធិបតីបក្សសាធារណរដ្ឋរូបនេះបញ្ជាក់ថា អ្នកកាន់កាំភ្លើងអាចជាគ្រូបង្រៀន ឬគ្រូបង្វឹកកីឡារបស់សាលា។

នៅមុនជំនួបរវាងលោកប្រធានាធិបតី ត្រាំ និងជនរងគ្រោះ សិស្សសាលានៅទូទាំងអាមេរិកបានដើរចេញមកតវ៉ាតាមផ្លូវ ដើម្បីបង្ហាញក្ដីអាណិតអាសូរចំពោះជនរងគ្រោះ ខណៈដែលសិស្សវ័យក្មេងនៅរដ្ឋធានីវ៉ាស៊ីនតោនបានប្រមូលផ្ដុំគ្នានៅខាងមុខសេតវិមាន។ នៅឯរដ្ឋ Florida ជាទីហេតុការណ៍កើតឡើង សិស្សជាច្រើនបានទាមទារឲ្យសមាជិកសភារដ្ឋនេះរឹតបន្តឹងការគ្រប់គ្រងកាំភ្លើងវែង ដែលប្រើដោយជនដៃដល់។

ជុំវិញករណីបាញ់រះកាលពីសប្ដាហ៍មុន ក្រុមស៊ើបអង្កេតរកឃើញថា Cruz បានទិញកាំភ្លើងម៉ាក AR-15 កាលពីកន្លះឆ្នាំមុន ពោល គឺមិនទាន់គ្រប់អាយុទិញនៅឡើយ។ សម្រាប់រដ្ឋ Florida អ្នកទិញកាំភ្លើងបាន លុះត្រាមានអាយុ១៨ឆ្នាំឡើងទៅ។ សមាជិកសភាខ្លះចង់ដំឡើងការកំណត់នេះទៅដល់២១ឆ្នាំតែម្ដង ដែលការកំណត់នេះកំពុងអនុវត្តលើការទិញកាំភ្លើងដៃ និងស្រា។ ប៉ុន្តែព្រឹទ្ធសភារដ្ឋនេះបានបដិសេធទៅវិញ៕