អន្តរជាតិ
ចិន រក្សាតំណែងជាដៃគូពាណិជ្ជកម្មធំបំផុតរបស់ហ្វីលីពីន
× រដ្ឋាភិបាលក្រុងម៉ានីល បានអះអាងថា រដ្ឋាភិបាលក្រុងប៉េកាំង នៅតែបន្តជាដៃគូពាណិជ្ជកម្មធំរបស់ខ្លួន ។ ក្រុងម៉ានីល បានលើកឡើងពីសូចនាករនៃការកើនឡើង សម្រាប់ការនាំចេញទៅកាន់ក្រុងប៉េកាំង និងថែមទាំងមានសុទិដ្ឋិនិយមចំពោះពាណិជ្ជកម្មទ្វេភាគីនេះទៀតផង ។
រដ្ឋមន្ត្រីផែនការសង្គម-សេដ្ឋកិច្ចហ្វីលីពីន Ernesto Pernia នៅថ្ងៃ២១ កុម្ភៈ បានថ្លែងក្នុងវេទិកាធុរកិច្ចក្នុងរដ្ឋធានីម៉ានីលថា សកម្មភាពពាណិជ្ជកម្មហ្វីលីពីន និងចិនកំពុងតែបន្តកើនឡើង ហើយ ចិន នៅតែជាដៃគូពាណិជ្ជកម្មកំពូលរបស់ហ្វីលីពីនប្រចាំឆ្នាំ២០១៧ផងដែរ ។ នេះបើយោងតាមការចុះផ្សាយរបស់សារព័ត៌មានចិន Xinhua ។
លោករដ្ឋមន្ត្រី បានអះអាងថា ការនាំចេញរបស់ហ្វីលីពីនទៅកាន់ចិន បានកើន ៨,៤ ភាគរយ ដែលទំនិញភាគច្រើនជាផលិតផលអេឡិចត្រូនិក ខណៈការនាំចូលផលិតផលចិនមកហ្វីលីពីនវិញ ក៏បានកើនឡើងដល់ ៨,១ ភាគរយផងដែរ ។ នេះមានន័យថា ហ្វីលីពីន បាននាំចេញផលិតផលច្រើនទៅចិន ជាជាងនាំចូលផលិតចិនមកក្នុងស្រុកខ្លួន ។
តាមប្រភពព័ត៌មានដដែលនោះ រយៈពេលពីរឆ្នាំហើយ ពោលគឺចាប់ពីឆ្នាំ២០១៦មក ចិន បានក្លាយជាដៃគូពាណិជ្ជកម្មកំពូលរបស់ហ្វីលីពីន ។ កំណើននេះ បានធ្វើឲ្យជប៉ុន ដែលជាគូប្រជែងមួយរបស់ចិនទាំងក្នុងតំបន់ និងឆាកអន្តរជាតិ ត្រូវក្លាយជាដៃគូពាណិជ្ជកម្មបន្ទាប់សម្រាប់ហ្វីលីពីន ។ ពីមុនឆ្នាំ២០១៦ ជប៉ុន គឺជាដៃគូពាណិជ្ជកម្មធំបំផុតរបស់ហ្វីលីពីន ។
អ្វីដែលគួរកត់សម្គាល់នោះ ការណ៍ ដែលធ្វើឲ្យទំហំពាណិជ្ជកម្មរវាងហ្វីលីពីន និងចិន មានការកើនឡើងនេះ គឺជាផ្នែកមួយដ៏ធំ នៃការអនុវត្តគោលនយោបាយបើកចិត្តទូលាយទទួលយកចិនរបស់លោកប្រធានាធិបតីហ្វីលីពីន រ៉ូឌ្រីហ្គោ ឌូទើតេ ។ គិតចាប់ពីឡើងកាន់តំណែងជាប្រមុខរដ្ឋហ្វីលីពីន នៅ២០១៦ លោក ឌូទើតេ លាក់ទុករឿងជម្លោះទឹកដីជាមួយនឹងចិន ខណៈប្រឹងក្រសោបចិនដើម្បីទទួលយកផលប្រយោជន៍សេដ្ឋកិច្ចវិញ ។
ដោយឡែក បើយោងតាមរបាយការណ៍ក្រសួងពាណិជ្ជកម្មចិន ដែលបានចុះនៅខែមករាកន្លងទៅ វៀតណាម ម៉ាឡេស៊ី និងថៃ គឺជាដៃគូធំបំផុតរបស់ចិនសម្រាប់ឆ្នា២០១៧ ។ របាយការណ៍ដដែល ក៏បានបញ្ជាក់ដែរថា វៀតណាម គឺជាទិសដៅនាំចេញធំជាងគេប្រចាំតំបន់របស់ចិន ខណៈចិននាំចូលផលិតផលច្រើនជាងគេពីម៉ាឡេស៊ី ៕
Tag:
ហ្វីលីពីន
ចិន
អាស៊ាន
© រក្សាសិទ្ធិដោយ thmeythmey.com