អន្តរជាតិ
មីយ៉ាន់ម៉ា បន្ថែមថវិកាជាតិបន្ទាន់ដើម្បីធ្វើរបងទប់ស្កាត់បទល្មើសអន្តោប្រវេសន៍ និងឧទ្ទាមពីបង់ក្លាដែស របងព្រំដែនមីយ៉ាន់ម៉ានិងបង់ក្លាដែស (រូបភាព៖ AFP)
× រដ្ឋាភិបាលក្រុងណៃពិដោ កំពុងគ្រោងថវិកាជាច្រើនលានដុលារដើម្បីប្រើប្រាស់ក្នុងគម្រោងថ្មីក្នុងការធ្វើរបងតាមព្រំដែនជាមួយនឹងបង់ក្លាដែសឲ្យកាន់តែរឹងមាំជាងមុន ។ គម្រោងនេះ ធ្វើឡើងដើម្បីរក្សាសុវត្ថិភាព និងសន្តិសុខពីការគំរាមកំហែងតាមព្រំដែន ។ ក៏ប៉ុន្តែ គម្រោងនេះ ហាក់ដូចជាគាប់ជួនពេកជាមួយនឹងវិបត្តិជនភៀសខ្លួនមីយ៉ាន់ម៉ាទៅកាន់បង់ក្លាដែស ។
អនុរដ្ឋមន្ត្រីក្រសួងមហាផ្ទៃមីយ៉ាន់ម៉ា លោកឧត្តមសេនីយ៍ អ៊ុង ស៊ូ (Aung Soe) បានឲ្យដឹងពីផែនការរបស់ក្រសួងខ្លួន នឹងត្រៀមស្នើថវិកាប្រមាណ ១៥លានដុល្លារ ដើម្បីប្រើប្រាស់សម្រាប់គម្រោងសាងសង់របងលួសតាមបណ្តោយព្រំដែនជាមួយនឹងបង់ក្លាដែស ។ នេះបើយោងតាមការចុះផ្សាយរបស់សារព័ត៌មានមីយ៉ាន់ម៉ា The Irrawaddy នៅថ្ងៃ២៣ កុម្ភៈកន្លងទៅ ។
តាមប្រភពព័ត៌មានដដែល លោកឧត្តមសេនីយ៍ បានបន្ថែមថា ថវិកា ដែលបានស្នើ នឹងត្រូវប្រើប្រាស់តារយៈការអនុវត្តសកម្មភាពបន្ទាន់របស់ប្រធានាធិបតី ហើយ នឹងត្រូវប្រគល់ឲ្យក្រសួងការពារជាតិមីយ៉ាន់ម៉ា ដើម្បីអនុវត្តការងារនៅក្នុងតំបន់រដ្ឋរ៉ាខាន (Rakhine) ដែលតំបន់ប្រភពនៃការផ្ទុះចេញវិបត្តិជនភៀសខ្លួនរ៉ូហ៊ីងយ៉ា ។
គួរជម្រាបផងដែរថា មីយ៉ាន់ម៉ា កន្លងមកបានសាងសង់របងតាមបណ្តោយព្រំដែនជាមួយនឹងបង់ក្លាដែសសម្រេចបាន ២០៤ គីឡូម៉ែតមកហើយ ដែលការសាងសង់នេះ បានចាប់ផ្តើមតាំងពីឆ្នាំ២០០៩ ដល់ឆ្នាំ២០១៥ ។ ក៏ប៉ុន្តែរបងលួសនេះ មិនសូវមានភាពរឹងមាំប៉ុន្មាននោះទេ ។
តាមការបញ្ជាក់របស់តំណាងរាស្ត្ររដ្ឋ រ៉ាខាន របងចាស់ដែលបានសាងសង់កន្លងមក មិនរឹងមាំឡើយពោលគឺពលរដ្ឋអាចចេញចូល និងដកចេញបានទៀតផង ។ លោកតំណាងរាស្ត្រ ក៏បានថ្លែងផងដែរថា ប្រសិនបើរបងថ្មី មិនមានគុណភាពនោះទេ គួរតែកុំខ្ជះខ្ជាយថវិការដ្ឋ ព្រោះបទល្មើសតាមព្រំដែន ក៏ជារឿងមួយដ៏សំខាន់ផងដែរ ។
អ្វីដែលគួរកត់សម្គាល់នោះ ការព្យាយាមបន្ថែមរបងឲ្យមីយ៉ាន់ម៉ា ស្របពេលដែលប្រទេសរដ្ឋអាស៊ីអាគ្នេយ៍មួយនេះ កំពុងតែស្ថិតនៅក្នុងក្រសែភ្នែករបស់សហគមន៍អន្តរជាតិ ពាក់ព័ន្ធវិបត្តិជនភៀសខ្លួនរ៉ូហ៊ីងយ៉ា ជិតកន្លះលាននាក់ ដែលបានរត់គេចពីរដ្ឋរ៉ាខានទៅកាន់ប្រទេសបង់ក្លាដែសតាមព្រំដែន ដោយពួកគេ បានអះអាងថា រងការគំរាមសម្លាប់ និងធ្វើទុក្ខបុកម្នេញពីសំណាក់អាជ្ញាធរមីយ៉ាន់ម៉ា ៕
Tag:
មីយ៉ាន់ម៉ា
បង់ក្លាដែស
© រក្សាសិទ្ធិដោយ thmeythmey.com