អន្តរជាតិ
កូរ៉េខាងជើងថា ខ្លួនចង់ចរចា តែអាមេរិកប្រាប់ឲ្យបោះបង់នុយក្លេអ៊ែរសិន ចាំនិយាយគ្នា មន្រ្តីជាន់ខ្ពស់កូរ៉េខាងជើងក្នុងពិធីបិទព្រឹត្តិការណ៍អូឡាំពិក (រូបភាព៖ AFP)
× មន្ត្រីជាន់ខ្ពស់កូរ៉េខាងជើង Kim Yong-chol ដែលចូលរួមពិធីបិទព្រឹត្តិការណ៍អូឡាំពិករដូវរងានៅកូរ៉េខាងត្បូង និយាយថា កូរ៉េខាងជើងត្រៀមខ្លួនរួចហើយដើម្បីចរចាជាមួយអាមេរិក។ ប៉ុន្តែអាមេរិក ដែលទើបដាក់ទណ្ឌកម្មមួយកញ្ចប់ធំលើកូរ៉េខាងជើងនោះ បានដាក់លក្ខខណ្ឌមួយទៅឲ្យកូរ៉េខាងជើងអនុវត្ត។ នោះ គឺកូរ៉េខាងជើងត្រូវតែបោះបង់មហិច្ឆតាអភិវឌ្ឍនុយក្លេអ៊ែរជាមុនសិន ទើបការចរចាអាចចាប់ផ្ដើមបាន។
ក្នុងទស្សនកិច្ចនៅកូរ៉េខាងត្បូង លោក Kim Yong-chol អនុប្រធានគណៈកម្មាធិការមជ្ឈិមបក្សពលករកូរ៉េ ដែលជាបក្សកំពុងដឹកនាំនៅកូរ៉េខាងជើង បានលើកសំណើកម្រមួយ ទៅកាន់អាមេរិកដើម្បីចរចាបញ្ចប់ភាពតានតឹងនៅឧបទ្វីបកូរ៉េ។ លោក Kim Yong-chol និយាយបែបនេះ ក្នុងជំនួបជាមួយប្រធានាធិបតីកូរ៉េខាងត្បូង មូន ចេអ៊ីន មុនពិធីបិទព្រឹត្តិការណ៍អូឡាំពិករដូវរងា នៅទីក្រុងព្យុងឆាង នៅថ្ងៃទី២៥ ខែកុម្ភៈ។
ក្នុងសេចក្ដីប្រកាសរបស់វិមានប្រធានាធិបតីកូរ៉េខាងត្បូង មន្ត្រីកូរ៉េខាងជើងបានប្រាប់លោក មូន ថា ក្រុងព្យុងយ៉ាង មានឆន្ទៈគ្រប់គ្រាន់ដើម្បីចរចាជាមួយអាមេ រិក ហើយទំនាក់ទំនងល្អរវាងកូរ៉េទាំងពីរ គួរនាំទៅកាន់ការរីកចម្រើន នៃទំនាក់ទំនងកូរ៉េខាងជើង និងអាមេរិកដែរ។ ក្នុងជំនួបបិទទា្វរនោះ លោកប្រធានាធិបតីកូរ៉េខាងត្បូងនិយាយថា កូរ៉េខាងជើង និងអាមេរិកគួរជួបគ្នាដើម្បីដោះស្រាយបញ្ហាស្នូលនៅឧបទ្វីបកូរ៉េ។ នេះបើតាមការផ្សាយរបស់ទីភ្នាក់ងារព័ត៌មាន Xinhua ។
យ៉ាងណាមិញ ក្រុងវ៉ាស៊ីនតោន មិនបានរំជើបរំជួលនឹងជំហររបស់ក្រុងព្យុងយ៉ាងឡើយ។ មិនប៉ុន្មានម៉ោងក្រោយមន្ត្រីជាន់ខ្ពស់កូរ៉េខាងជើងបង្ហាញឥរិយាបថទន់ភ្លន់បែបការទូត សេតវិមានក៏ចេញសេចក្ដីប្រកាសមួយ ឆ្លើយតបវិញ ។ សេតវិមានបញ្ជាក់ថា អាមេរិក កូរ៉េខាងត្បូង និងសហគមន៍អន្តរជាតិសុទ្ធតែប្រកាន់ជំហរចង់បានលទ្ធផលដូចគ្នា គឺកូរ៉េខាងជើងត្រូវបោះបង់នុយក្លេអ៊ែរ។ ហើយបើកូរ៉េខាងជើងធ្វើបែបនេះ ទើបមានការចរចា។
ក្នុងសេចក្ដីប្រកាសដដែលនោះ សេតវិមានអាមេរិកចង់ឲ្យកូរ៉េខាងជើងរំសាយនុយក្លេអ៊ែរ ដើម្បីអនាគតភ្លឺថ្លា។ លើសពីនោះ អាមេរិកនឹងបន្តចាំមើលសកម្មភាពរបស់កូរ៉េខាងជើងទៀត ថាការបង្ហាញឆន្ទៈចរចានៅពេលនេះ កំពុងស្ថិតលើផ្លូវទៅកាន់ការបោះបង់មហិច្ឆតាដែលគ្រប់គ្នាប្រឆាំងឬយ៉ាងណា។ សម្រាប់អាមេរិក និងសហគមន៍អន្តរជាតិ កម្មវិធីនុយក្លេអ៊ែរ និងមីស៊ីលរបស់កូរ៉េខាងជើង គឺជាចុងបញ្ចប់ដ៏អាក្រក់។
ជាមួយនឹងការទាមទារឲ្យកូរ៉េខាងជើងបោះបង់នុយក្លេអ៊ែរដើម្បីចាប់ផ្ដើមការចរចានោះ អាមេរិកក៏ប្រកាសដែរថា យុទ្ធនាការដាក់ទណ្ឌកម្មជាអតិបរមាលើក្រុងព្យុងយ៉ាង ត្រូវតែបន្តទៀត។ នៅថ្ងៃទី២៣ ខែកុម្ភៈកន្លងទៅ អាមេរិក៏ទើបដាក់ទណ្ឌកម្មដ៏ធំបំផុតមួយទៀតលើកូរ៉េខាងជើងរួចហើយដែរ។ យ៉ាងណាមិញ ការដាក់លក្ខខណ្ឌឲ្យកូរ៉េខាងជើងរំសាយនុយក្លេអ៊ែរ ទំនងជាមិនអាចទៅរួចឡើយ ព្រោះរដ្ឋកុម្មុយនីស្តមួយនេះ ចរចានិយាយពីនុយក្លេអ៊ែររបស់ខ្លួនឡើយ៕
Tag:
កូរ៉េខាងជើង
អាមេរិក
កូរ៉េខាងត្បូង
Kim Yong-chol
© រក្សាសិទ្ធិដោយ thmeythmey.com