ពីនេះ ពីនោះ
ព័ត៍មានសុខភាព
×![]()
ដោយ: ថ្មីៗ
សម្រាកក្នុងបន្ទប់ងងឹត និងស្ងាត់
ស្ត្រេសគឺជាមូលហេតុដ៏ចំបងមួយនៃការឈឺក្បាល។ ការបំបាត់អារម្មណ៍តឹងរបស់សាច់ដុំប្រហែលជាជួយបន្ថយការឈឺក្បាលបែប Tension Headache បាន ហើយវាក៏ជាប្រភេទនៃការឈឺក្បាលដែលកើតឡើងញឹកញាប់បំផុតដែរ។ បើសិនជាអ្នកមានអាការៈឈឺក្បាលបែបនេះមែន អ្នកប្រហែលជាងាយនឹងឈឺក្បាលដោយសារតែពន្លឺ និងសម្លេងហើយ។ ដូច្នេះចូរសម្រាក ឬអង្គុយនៅក្នុងបន្ទប់ដែលងងឹត និងស្ងាត់។ ចូរបិទភ្នែក ហើយព្យាយាមបន្ធូរសាច់ដុំនៅខ្នង ក និងស្មាទៅ។
ញ៉ាំជាតិកាហ្វេអ៊ីន
រឿងនេះប្រហែលជាជួយបំបាត់អាការៈឈឺក្បាលបែប Tension Headache បាន តាមរយៈការជួយថ្នាំបំបាត់ការឈឺចាប់កាន់តែមានប្រសិទ្ធភាពល្អ និងលឿន។ ហេតុដូច្នេះហើយទើបថ្នាំបំបាត់ការឈឺចាប់មួយចំនួនមានបញ្ចូលជាតិកាហ្វេអ៊ីនទៅក្នុងនោះដែរ។
បន្ធូរអារម្មណ៍
ការហាត់របៀបដកដង្ហើមជ្រៅៗ និងតិចនិចស្រមើស្រមៃរូបភាពក្នុងផ្លូវអារម្មណ៍ប្រហែលជាជួយបន្ថយស្ត្រេស និងបំបាត់ការឈឺក្បាលបាន។ ចូរដកដង្ហើមជ្រៅៗឲ្យបានច្រើនដង។ ចូរដកដង្ហើមចេញយឺតៗ បន្ធូរអារម្មណ៍ដែលកំពុងតែតានតឹង និងរឹងខ្លាំង ខណៈពេលដែលអ្នកស្រមើស្រមៃទៅលើរូបភាពដែលស្រស់ស្រាយក្នុងចិត្ត។ ចូរអោនក្បាលចុះក្រោមឲ្យចង្កាប៉ះទ្រូង បន្ទាប់មកធ្វើការបង្វិលក្បាលថ្នមៗ និងតិចៗជាកន្លះរវង្វង់ ម្តងម្ខាងៗ។ ចូរដកដង្ហើមចូលជ្រៅៗម្តងទៀត ហើយដកដង្ហើមចេញមកក្រៅយឺតៗ។
ព្យាបាលការឈឺចាប់ជាមួយភាពក្តៅ ឬត្រជាក់
ភាពក្តៅ និងត្រជាក់ប្រហែលជាជួយបំបាត់ការឈឺចាប់ និងភាពតឹងរបស់សាច់ដុំដែលកើតឡើងជាមួយនឹងការឈឺក្បាលបាន។ អ្នកអាចបំបាត់អាការៈនៃការឈឺក្បាលម្តងម្កាលបានបើសិនជាបានងូតទឹកក្តៅ ឬដាក់របស់មានសំណើមក្តៅៗនៅកញ្ចឹងករ។ ចូរព្យាយាមស្អំទឹកក្តៅ ឬកន្សែងក្តៅនៅកន្លែងដែលកំពុងតែឈឺ។ បើសិនជាចង់ស្អំទឹកកកវិញ អ្នកអាចស្អំនៅថ្ងាស សៀតថ្កា ឬក៏បាន។
ម៉ាស្សា
ការម៉ាស្សាអាចជួយបន្ធូរសាច់ដុំដែលកំពុងតែតឹងបាន ដូច្នេះវានឹងជួយបន្ថយការឈឺក្បាលបែបស្ត្រេស ឬTension បានយ៉ាងល្អ។ ចូរឲ្យនរណាម្នាក់ជួយម៉ាស្សាថ្នមៗនៅលើក្បាល ក និងសាច់ដុំនៅស្មា។ ឬអ្នកក៏អាចធ្វើវាដោយខ្លួនឯងតិចៗបានដែរ។ បន្ទាប់មក ចូរសម្រាកឲ្យបានច្រើនទៅតាមតម្រូវការ។
ហាត់ប្រាណដើម្បីបន្ថយភាពតានតឹង
ការហាត់ប្រាណនៅកញ្ចឹងករប្រហែលជាជួយបំបាត់ការឈឺចាប់ដោយសារតែការឈឺក្បាលបែប Tension Headache បាន ជាពិសេសការឈឺក្បាលដែលបង្កឡើងដោយការរក្សាជំហរក្បាលនៅមួយកន្លែងយូរពេក។ ចូរប្រើបាតដៃម្ខាងសង្កត់នៅលើថ្ងាស និងដៃម្ខាងទៀតសង្កត់នៅលើសាច់ដុំករ ហើយឈ្លីចុះឡើងៗឲ្យបានច្រើន។
ប្រើថ្នាំដោយមិនបាច់មានវេជ្ជបញ្ជា
ថ្នាំប្រភេទ Acetaminophen, aspirin, ibuprofen និង Naproxen សុទ្ធតែអាចជួយបំបាត់ការឈឺចាប់បានទាំងអស់។ ថ្នាំដែលផ្សំឡើងដោយ Acetaminophen, aspirine និងកាហ្វេអ៊ីន ពេលខ្លះមានប្រសិទ្ធភាពល្អជាងនៅពេលប្រើតែមួយមុខៗ។ ប៉ុន្ទែការប្រើប្រាស់ថ្នាំបំបាត់ការឈឺក្បាលគ្រប់ប្រភេទលើសពីបីថ្ងៃក្នុងមួយសប្តាហ៍ប្រហែលជាបង្កជាការឈឺក្បាលដោយសារតែលេបថ្នាំបានដែរ។
ពេលដែលទៅជួបពេទ្យ
ចូរធ្វើការណាត់ជាមួយគ្រូពេទ្យបើសិនជាការឈឺក្បាលរបស់អ្នកឧស្សាហ៍កើតឡើង ឬមានរយៈពេលយូរជាងពីរបីថ្ងៃ។ ចូរស្វែងរកការព្យាបាលភ្លាមបើសិនជាការឈឺក្បាលអ្នកស្រាប់តែកើតឡើងភ្លាមៗ ឬធ្ងន់ធ្ងរ ក្រោយពីមានរបួសនៅក្បាល ឬកាន់តែធ្ងន់ធ្ងរទៅៗ។ វាក៏ជារឿងសំខាន់ដែរ ដែលត្រូវស្វែងរកការព្យាបាលភ្លាមបើសិនជាអ្នកមានរោគសញ្ញាជាមួយគ្នានឹងការឈឺក្បាលដូចជា ក្តៅខ្លួន រឹងករ ប្រកាច់ ស្ពឹក ភ្នែកមើលឃើញពីរៗ វិលមុខ ចង្អោខ្លាំង ពិបាកដកដង្ហើម ឬវង្វេងវង្វាន់៕
ត្រួតពិនិត្យដោយ www.health.com.kh
© រក្សាសិទ្ធិដោយ thmeythmey.com
