ម្ចាស់ពានរង្វាន់ណូប៊ែលសន្តិភាពបីរូប អំពាវនាវឲ្យលោកស្រី ស៊ូជី ជួយការពារជនជាតិរ៉ូហ៊ីងយ៉ា

អន្តរជាតិ

ម្ចាស់ពានរង្វាន់ណូប៊ែលសន្តិភាពបីរូប អំពាវនាវឲ្យលោកស្រី ស៊ូជី ជួយការពារជនជាតិរ៉ូហ៊ីងយ៉ា

27, Feb 2018 , 10:41 am

រូបភាព

ដោយ:

ចំណាត់ការតែមាត់របស់រដ្ឋាភិបាលមីយ៉ាន់ម៉ាលើវិបត្តិជនភៀសខ្លួន មិនបានធ្វើឲ្យសហគមន៍អន្តរជាតិ ជាពិសេសក្រុមសកម្មជនសិទ្ធិមនុស្ស ស្ងប់ចិត្តឡើយ ។ សូម្បីតែ ក្រុមម្ចាស់ពានរង្វាន់ណូប៊ែលសន្តិភាពដូចគ្នា ក៏បានចេញរិះគន់ និងដាស់តឿន មេដឹកនាំកំពូល de facto មីយ៉ាន់ម៉ា លោកស្រី អ៊ុងសាន ស៊ូជី ឲ្យបង្ហាញចំណាត់ការពិតប្រាកដដើម្បីសង្គ្រោះជនភៀសខ្លួនរ៉ូហ៊ីងយ៉ាទៀតផង ។

ម្ចាស់ពានរង្វាន់ណូប៊ែលសន្តិភាពបីរូប រួមមាន លោកស្រី Tawakkol Karman លោកស្រី Shirin Ebadi និងលោកស្រី Mairead Maguire នៅថ្ងៃ២៦ ខែកុម្ភៈ បានចេញសេចក្តីថ្លែងការណ៍មួយ ដោយបានអំពាវនាវ និងសុំចិត្តឲ្យម្ចាស់ពានរង្វាន់ណូប៊ែលសន្តិភាព និងជាមេដឹកនាំកំពូលមីយ៉ាន់ម៉ា ដោះស្រាយបញ្ហានៃការធ្វើទុកបុកម្នេញទៅលើជនជាតិភាគតិចរ៉ូហ៊ីងយ៉ា ។ នេះបើយោងតាមភ្នាក់ងារព័ត៌មាន AFP ។

តាមប្រភពព័ត៌មានដដែលនោះ សេចក្តីថ្លែងការណ៍អំពាវនាវរបស់អ្នកទាំងបី ត្រូវបានធ្វើឡើងបន្ទាប់ពីពួកគេ បានបំពេញទស្សនកិច្ចទៅកាន់ជំរំជនភៀសខ្លួនរ៉ូហ៊ីងយ៉ានៅបង់ក្លាដែស និងបានឃើញជាក់ស្តែងពីទុកលំបាករបស់ជនភៀសខ្លួន ។ អ្នកទាំងបី បានព្រមានវិបត្តិជនខ្លួននេះ ថា អាចធ្លាក់ចូលជាបទល្មើសប្រល័យពូជសាសន៍ ហើយលោកស្រី អ៊ុងសាន ស៊ូជី នឹងត្រូវប្រឈមបទល្មើសផងដែរ ។

« ប្រសិនបើគាត់(លោកស្រីស៊ូជី) នៅតែបន្តស្ងៀមស្ងាត់បែបនេះ លោកស្រីនឹងក្លាយជាអ្នកដែលត្រូវទទួលខុសត្រូវចំពោះវិបត្តិជនភៀសខ្លួនផងដែរ ។ នេះ គឺជាសេចក្តីអំពាវនាវទៅកាន់បងប្អូនស្រីរបស់យើង (លោកស្រីស៊ូជី) ឲ្យក្រោកឡើង បើមិនដូច្នេះនោះទេ គាត់ ក៏នឹងត្រូវស្ថិតនៅក្នុងជនពាក់ព័ន្ធនៃបទល្មើស(ប្រល័យពូជសាសន៍)ដូចគ្នា» ។ ម្ចាស់ពានរង្វាន់ទាំងបី បានលើកឡើងយ៉ាងដូច្នេះ ។

នេះមិនមែនជាលើកដំបូងឡើយ ដែលក្រុមអ្នកតស៊ូ និងការពារសិទ្ធិមនុស្ស ដែលត្រូវបានអន្តរជាតិផ្តល់ពានរង្វាន់សន្តិភាពចេញមុខអំពាវនាវឲ្យលោកស្រី ស៊ូជី បញ្ចប់បញ្ហាសិទ្ធិមនុស្សធ្ងន់ធ្ងរមួយនេះ ។ នៅចុងឆ្នាំមុន ម្ចាស់ពានរង្វាន់ណូបែលសន្តិភាពវ័យក្មេងជាងគេ Malala Yousafzai ក៏បានទទូចឲ្យមដឹកនាំកំពូលមីយ៉ាន់ម៉ា លោកស្រី អ៊ុងសាន ស៊ូជី ដែលជាម្ចាស់រង្វាន់ណូបែលសន្តិភាពដូចគ្នានោះ ចូលរួមចេញថ្លែងការណ៍ថ្កោលទោសប្រឆាំងហិង្សាលើជនជាតិភាគតិចរ៉ូហ៊ីងយ៉ា ។

ពេលនោះ Malala បានផ្ញើសារទៅកាន់លោកស្រី ស៊ូជី ថា ពិភពលោក កំពុងតែរង់ចាំ ការបង្ហាញជំហររបស់លោកស្រីលើវិបត្តិ រ៉ូហ៊ីងយ៉ា ។ លោកស្រី អ៊ុងសាន ស៊ូជី ដែលបច្ចុប្បន្ន ជាទីប្រឹក្សារដ្ឋមីយ៉ាន់ម៉ា បានទទួលពានរង្វាន់ណូប៊ែលសន្តិភាពនៅឆ្នាំ ១៩៩១ ។ លោកស្រី ស៊ូជី គឺជានិមិត្តរូបនៃសិទ្ធិមនុស្ស និងការតស៊ូដើម្បីប្រជាធិបតេយ្យដោយគ្មានហិង្សា ។

គួរជម្រាបផងដែរថា តាមរបាយការណ៍របស់អង្គការសិទ្ធិមនុស្ស និងជាពិសេសរបស់ភ្នាក់ងារអង្គការសហប្រជាជាតិ មានជនភៀសខ្លួនជនជាតិភាគតិចរ៉ូហ៊ីងយ៉ា ជាង ៦០ ម៉ឺននាក់ បានភៀសខ្លួនចេញពីរដ្ឋ Rakhine របស់មីយ៉ាន់ម៉ា ទៅកាន់បង់ក្លាដែស ដោយសារពួកគេ ទទួលរងការគំរាមកំហែងសម្លាប់ និងការធ្វើទុក្ខបុកម្នេញពីសំណាក់អាជ្ញាធរ និងក្រុមយោធាមីយ៉ាន់ម៉ា ។ របាយការណ៍ខ្លះ បានហៅវិបត្តិរបស់មីយ៉ាន់ម៉ាថាជាបទល្មើសប្រល័យពូជសាសន៍រួចទៅហើយ ។

ក៏ប៉ុន្តែ សម្រាប់មីយ៉ាន់ម៉ាវិញ នេះ គឺជារឿងផ្ទៃក្នុងរបស់មីយ៉ាន់ម៉ាប៉ុណ្ណោះ ពោលគឺ អ្នកខាងក្រៅ មិនត្រូវលូកលាន់កិច្ចការនេះឡើយ ។ រដ្ឋាភិបាលមីយ៉ាន់ម៉ា ថែមទាំងបានអះអាងថា កំពុងតែស្តារស្ថានភាពនៅទីនោះឡើយវិញ ខណៈតាមរបាយការណ៍ ជនភៀសខ្លួន នៅតែបន្តរត់ចេញពីទីនោះជាបន្តបន្ទាប់ទៀតផង ៕