អន្តរជាតិ
ប៉ូលិសថៃឃាត់ខ្លួនរុស្ស៊ី១០នាក់ដែលបើកវគ្គបង្រៀនក្បាច់រួមភេទនៅប៉ាតាយ៉ា
× ប៉ូលិសថៃ បានឃាត់ខ្លួនជនជាតិរុស្ស៊ី ចំនួន១០នាក់ ដែលបានប្រើប្រាស់បន្ទប់សណ្ឋាគារមួយដើម្បីបើកបង្រៀនក្បាច់រួមភេទ (Sexual Traning Courses) ដល់មិត្តរួមជាតិរបស់ពួកគេ នៅក្រុងតំបន់ឆ្នេរ ប៉ាតាយ៉ា។ នេះបើតាមការផ្សាយរបស់ AFP នាថ្ងៃទី២៧ ខែកុម្ភៈ។
ប៉ូលិសថៃបានអះអាងថា ទេសចររុស្ស៊ីសរុប៣៣នាក់ ស្ថិតក្នុងថ្នាក់រៀននៅសណ្ឋាគារមួយក្នុងក្រុងប៉ាតាយ៉ា ប៉ុន្តែមានតែ១០នាក់ប៉ុណ្ណោះ ដែលត្រូវបានចាប់ខ្លួនកាលពីថ្ងៃអាទិត្យកន្លងមក ដោយពួកគេសុទ្ធតែជាគ្រូឧទ្ទេសជំនាញ «រួមភេទ»។
លោក Piyapong Ensarn មន្ត្រីប៉ូលិសទេសចរណ៍ថៃម្នាក់ បានបញ្ជាក់ប្រាប់ AFP ថា អ្នកទាំងនោះ ត្រូវបានចាប់ខ្លួនដោយមន្ត្រីអន្តោប្រវេសន៍ពាក់ព័ន្ធការធ្វើការដោយគ្មានច្បាប់អនុញ្ញាត។ លោកបានលើកឡើងថា៖ «អ្នកគ្រប់គ្រងសណ្ឋាគារ បានអះអាងថា ពួកគេមិនមានព័ត៌មានលម្អិតទាក់ទងនឹងគម្រោងការរបស់ក្រុមជនជាតិរុស្ស៊ីនោះឡើយ ដោយពួកគេគ្រាន់តែបញ្ជាក់ថា ជួលបន្ទប់ដើម្បីរៀបចំសិក្ខាសាលាប៉ុណ្ណោះ»។
តាមរបាយការណ៍ អ្នកចូលរួមមួយចំនួនបានបញ្ជាក់ថា ពួកគេបានបង់ថវិកា២០ ០០០បាត (ប្រមាណ៦៤០ដុល្លារអាមេរិក) ដើម្បីចូលរួមវគ្គសិក្សានេះ ចំណែកអ្នកខ្លះបានអះអាង មិនមានការបង់ថ្លៃអ្វីនោះឡើយ។ អ្នកដែលរៀបចំម្នាក់ត្រូវបានកំណត់អត្តសញ្ញាណហើយ ដោយរូបគេមានឈ្មោះ Alexander Kirilov អាយុ៣៨ឆ្នាំ។
នាប្រតិបត្តិការនោះដែរ ប៉ូលិសបានរកឃើញអាវយឺត ដែលសរសេរថា «Sex Animator» រួមទាំងលិខិតបញ្ជាក់ការសិក្សាសម្រាប់អ្នកចូលរួម៕
© រក្សាសិទ្ធិដោយ thmeythmey.com