ទូតអាមេរិក បង្កើតមជ្ឈមណ្ឌលថ្មីមួយ ដើម្បីលើកកម្ពស់ការអប់រំនៅកម្ពុជា

ជាតិ

ទូតអាមេរិក បង្កើតមជ្ឈមណ្ឌលថ្មីមួយ ដើម្បីលើកកម្ពស់ការអប់រំនៅកម្ពុជា

27, Feb 2018 , 9:19 pm

រូបភាព

ដោយ:

ស្ថានទូតអាមេរិកប្រចាំកម្ពុជា បានបើកមជ្ឈមណ្ឌលអប់រំមួយ ដើម្បីឲ្យប្រជាជនខ្មែរទូទៅអាចចូលសិក្សាស្រាវជ្រាវឯកសារប្រវត្តិសាស្ត្រ និងសង្គមពិភពលោក ក្នុងទិសដៅចូលរួមលើកកម្ពស់វិស័យអប់រំនៅកម្ពុជា។

លោក Arend Zwartjes ប្រធានផ្នែកកិច្ចសាធារណៈរបស់ស្ថានទូតអាមេរិក បាននិយាយថា គោលបំណងនៃការបើកមជ្ឈមណ្ឌលផ្ដល់សេវាកម្មអប់រំនេះ ដើម្បីផ្សារភ្ជាប់ទំនាក់ទំនងរវាងជនជាតិខ្មែរ និងជនជាតិសហរដ្ឋអាមេរិក ឲ្យកាន់តែជិតស្និទ្ធ។ ជាពិសេសការផ្តល់សេវាទាក់ទងនឹងការសិក្សានៅសហរដ្ឋអាមេរិក ដើម្បីជួយឲ្យយុវជនខ្មែរ អាចធ្វើតេស្តសិក្សានៅអាមេរិកដោយជោគជ័យផងដែរ។

ថ្លែងក្នុងពិធីសម្ពោធមជ្ឈមណ្ឌលថ្មីនេះ លោក Arend Zwartjes មន្ត្រីទំនាក់ទំនងផ្នែកកិច្ចសាធារណៈរបស់ស្ថានទូតអាមេរិកបានលើកឡើងថា៖ «មជ្ឈមណ្ឌលនេះ យើងនឹងមានការបើកនូវក្លឹបសិក្សា ជូនដល់សិស្ស និស្សិត ឬសាធារណជនទូទៅ អាចមកហាត់ប្រើភាសាអង់គ្លេស ព្រមទាំងរៀនបន្ថែមពីវប្បធម៌ ប្រវតិ្តសាស្ត្រ និងសង្គមរបស់សហរដ្ឋអាមេរិក។ ក្រៅពីនេះក៏មានកម្មវិធីភាសាអង់គ្លេស សហរដ្ឋអាមេរិក ទស្សនាវដ្តី និងDVD សម្រាប់យកទៅមើលបន្ថែម»។

សេវាអប់រំដែលផ្តល់ដោយស្ថានទូតអាមេរិកនេះ គឺពុំមានបង់ប្រាក់អ្វីឡើយ ដោយសាធារណជនគ្រាន់តែបង្ហាញនូវអត្តសញ្ញាណប័ណ្ណសម្គាល់ខ្លួនតែប៉ុណ្ណោះ នៅពេលចូលមកស្ថានទូតអាមេរិក។ នេះជាការអះអាងបញ្ជាក់របស់លោក Arend Zwartjes មន្ត្រីទំនាក់ទំនងកិច្ចការសាធារណៈរបស់ស្ថានទូតអាមេរិក៕