អន្តរជាតិ
លោក ម៉ាក្រុង នឹងទៅទស្សនកិច្ចអាមេរិកតាមការអញ្ជើញរបស់លោកត្រាំ ដើម្បីពង្រឹងសម្ព័ន្ធភាពទ្វេភាគី លោក ម៉ាក្រុង និងលោក ត្រាំ នៅក្នុងជំនួបទ្វេភាគីក្រៅមហាសន្និបាតអង្គការសហប្រជាជាតិកាលពីខែកញ្ញាឆ្នាំ ២០១៧ (រូបភាព AFP)
× ប្រធានាធិបតីបារាំងលោក អេម៉ានុយអែល ម៉ាក្រុង នឹងទៅទស្សនកិច្ចនៅសហរដ្ឋអាមេរិកនៅចុងខែមេសាខាងមុខ។ ទស្សនកិច្ចនេះជាលើកដំបូងនេះ ធ្វើឡើងដើម្បីពង្រឹងសម្ព័ន្ធភាព និងមិត្តភាពរវាងសម្ព័ន្ធមិត្តទាំងពីរបារាំង និងអាមេរិក។
បើគ្មានការប្រែប្រួលទេ ប្រមុខរដ្ឋបារាំងលោក អេម៉ានុយអែល ម៉ាក្រុង នឹងអញ្ជើញទៅទស្សនកិច្ចនៅអាមេរិកចាប់ពីថ្ងៃ ២៣ ដល់ថ្ងៃ ២៥ ខែមេសាខាងមុខនេះតបតាមការអញ្ជើញរបស់ប្រមុខរដ្ឋអាមេរិក។ វាជាដំណើរទស្សនកិច្ចដំបូងបំផុតរបស់ប្រមុខរដ្ឋបារាំងទៅកាន់អាមេរិក គិតចាប់ពីពេលដែលលោក ដូណាល់ ត្រាំ ឡើងកាន់តំណែងកាលពីខែមករាឆ្នាំមុន។
ទីភ្នាក់ងារព័ត៌មាន AFP បានស្រង់សម្តីការិយាល័យប្រធានាធិបតីបារាំងដូច្នេះ៖« ការអញ្ជើញនេះឆ្លុះបញ្ចាំងឲ្យឃើញពីចំណងមិត្តភាព និងសម្ព័ន្ធភាពយូរអង្វែងរវាងប្រទេសយើងទាំងពីរ ហើយក៏ដូចជាភាពរឹងមាំងនៃទំនាក់ទំនងរវាងប្រធានាធិបតីទាំងពីរដែរ»។
កាលវិភាគពេញលេញនៃដំណើរទស្សនកិច្ចនេះមិនទាន់ត្រូវបានគេរៀបចំជាផ្លូវការនៅឡើយទេ។ ប៉ុន្តែប្រភពការទូតបង្ហើបថា លោក ម៉ាក្រុង អាចនឹងទៅទស្សនកិច្ចទីក្រុង New Orleans នៃរដ្ឋល្វីស្យាណា ព្រោះឆ្នាំនេះជាខួប ៣០០ ឆ្នាំ នៃការបង្កើតក្រុងនេះឡើងដោយបារាំងផ្ទាល់។
តាមពិតទៅ លោក ដូណាល់ ត្រាំ បានអញ្ជើញលោក ម៉ាក្រុង កាលពីខែមករា ក្រោយពេលដែលលោកត្រូវបានមេដឹកនាំបារាំងទទួលស្វាគមន៍យ៉ាងកក់ក្តៅកាលពីខែកក្កដាក្នុងពិធីបុណ្យឯករាជ្យជាតិបារាំង។ ពេលនោះ លោក ត្រាំ ក៏រីករាយ និងកោតស្ញប់ស្ញែងក្បួនព្យុហយាត្រារបស់កងទ័ពបារាំងស្វាគមន៍មេដឹកនាំបរទេស និងបង្អួតសាធារណជនបារាំង នៅពេលនោះផងដែរ។
ដោយសារពេញចិត្តខ្លាំង លោក ត្រាំ ក៏បានបញ្ជាឲ្យមន្ត្រីពាក់ព័ន្ធរៀបចំក្បួនព្យុហយាត្រាយោធាឲ្យដូចបារាំងដែរនៅខែកុម្ភៈនេះ ហើយក្នុងនាមជាមេបញ្ជាការកំពូលកងទ័ពអាមេរិក លោក ត្រាំ ក៏មានចេតនាយកព្យុហយាត្រាកងទ័ពនេះបង្អួតអំណាចយោធារបស់អាមេរិកទៅកាន់ពិភពលោកដូចគ្នា។
ដោយឡែក បើទោះបីជាលោក ត្រាំ និងលោក ម៉ាក្រុង ហាក់មានទំនាក់ទំនងល្អ និងធ្លាប់ជួបគ្នាច្រើនដងក៏ដោយ មេដឹកនាំទាំងពីរមិនចុះសម្រុងនឹងគ្នាលើបញ្ហាធំៗមួយចំនួនជាពិសេសបញ្ហាប្រែប្រួលអាកាសធាតុ។ មេដឹកនាំបារាំងប្តេជ្ញាឈរជាមួយពិភពលោកដើម្បីប្រឆាំងការប្រែប្រួលអាកាសធាតុ ខណៈដែលលោក ត្រាំ អះអាងថា ការប្រែប្រួលអាកាសធាតុជារឿងបោកប្រាស ហើយលោកក៏សម្រេចដកសហរដ្ឋអាមេរិកពីកិច្ចព្រមព្រៀងអាកាសធាតុក្រុងប៉ារីសថែមទៀតកាលពីឆ្នាំមុន៕
Tag:
ដូណាល់ ត្រាំ
អេម៉ានុយអែល ម៉ាក្រុង
អាមេរិក
បារាំង
© រក្សាសិទ្ធិដោយ thmeythmey.com