អន្តរជាតិ
ប្រធានាធិបតីកូរ៉េខាងត្បូង៖ ជប៉ុនគ្មានសិទ្ធិនិយាយថាបញ្ហាស្ត្រីទាសករផ្លូវភេទចប់សព្វគ្រប់ឡើយ ប្រធានាធិបតីកូរ៉េខាងត្បូង មូន ចេអ៊ីន ក្នុងពិធីរំឭកខួបការងើបតស៊ូប្រឆាំងជប៉ុន (រូបភាព៖ AFP)
× សំណុំរឿងស្ត្រីទាសករផ្លូវភេទសម័យសង្គ្រាម នៅតែជារបួសព្យាបាលមិនជាដាច់ក្នុងទំនាក់ទំនងរវាងកូរ៉េខាងត្បូង និងជប៉ុន។ ទោះជាមានកិច្ចព្រមព្រៀងឆ្នាំ២០១៥ ដែលជប៉ុនសុំទោស និងសងប្រាក់ក្ដី កូរ៉េខាងត្បូងនៅតែមិនទាន់អស់ចិត្ត និងទាមទារឲ្យជប៉ុនសុំទោសដោយស្មោះត្រង់។ ប្រធានាធិបតីកូរ៉េខាងត្បូង មូន ចេអ៊ីន អះអាងថា បញ្ហាស្ត្រីទាសករផ្លូវភេទនេះ នៅមិនទាន់ចប់នៅឡើយទេ។ ជប៉ុន មិនសប្បាយចិត្តនឹងការទាមទារម្ដងហើយម្ដងទៀតរបស់កូរ៉េខាងត្បូងឡើយ។
ឆ្លៀតឱកាសចូលរួមការរំឭកខួបថ្ងៃងើបតស៊ូប្រឆាំងជប៉ុន ប្រធានាធិបតីកូរ៉េខាងត្បូង មូន ចេអ៊ីន បាននិយាយវាយប្រហារក្រុងតូក្យូជុំវិញបញ្ហាស្ត្រីទាសករផ្លូវភេទកូរ៉េខាងត្បូង។ លោក មូន ចេអ៊ីន ចាត់ទុកសកម្មភាពរបស់ទាហានជប៉ុនដែលបង្ខំឲ្យស្ត្រីកូរ៉េខាងត្បូងបម្រើតណ្ហាអំឡុងពេលសង្គ្រាម ជាឧក្រិដ្ឋកម្មប្រឆាំងមនុស្សជាតិ និងទាមទារឲ្យជប៉ុនសុំទោសឲ្យអស់ពីបេះដូង ហើយជប៉ុនក៏គ្មានសិទ្ធិនិយាយថា បញ្ហានេះត្រូវបានបញ្ចប់ដែរ។
ក្នុងពិធីថ្ងៃទី១ ខែមីនា នៅឯគុក Seodaemun ជាទីរដ្ឋាភិបាលអាណានិគមជប៉ុនចាប់ និងកាត់ទោសមនុស្សជាងមួយសែននាក់ លោក មូន ចេអ៊ីន និយាយថា៖ «ចំពោះការដោះស្រាយបញ្ហាទាសករផ្លូវភេទ រដ្ឋាភិបាលជប៉ុនដែលជាឧក្រិដ្ឋជន មិនអាចនិយាយថា បញ្ហាចប់ហើយបានទេ»។ លោកប្រធានាធិបតីកូរ៉េខាងត្បូងចង់សំដៅដល់កិច្ចព្រមព្រៀងឆ្នាំ២០១៥ រវាងក្រុងសេអ៊ូល និងក្រុងតូក្យូជុំវិញការបញ្ចប់បញ្ហារ៉ាំរ៉ៃនេះ ដោយក្នុងនោះជប៉ុនសុំទោស និងសងប្រាក់ជិត១០លានដុល្លារ។
ដោយមានកិច្ចព្រមព្រៀងនេះ រដ្ឋាភិបាលជប៉ុនតែងលើកឡើងថា សំណុំរឿងស្ត្រីទាសករផ្លូវភេទ គឺចប់សព្វគ្រប់ និងមិនអាចបកក្រោយបានឡើយ។ ប៉ុន្តែរដ្ឋាភិបាលលោក មូន ចេអ៊ីន បានជំទាស់កិច្ចព្រមព្រៀងដែលបង្កើតដោយអតីតរដ្ឋបាលលោកស្រីប្រធានាធិបតី ប៉ាក ហ្គឺនហេ ។ ក្រុមការងារវាយតម្លៃកិច្ចព្រមព្រៀងរកឃើញថា កិច្ចព្រមព្រៀងឆ្នាំ២០១៥ នេះ មានចន្លោះប្រហោងច្រើន និងមិនបានពិចារណាគំនិយោបល់ជនរងគ្រោះឡើយ។
ក្រុងតូក្យូបានប្រតិកម្មភ្លាមៗទៅនឹងការអធិប្បាយរបស់ប្រធានាធិបតីកូរ៉េខាងត្បូង។ មន្ត្រីជាន់ខ្ពស់ជប៉ុនលោក Yoshihide Suga បានហៅសម្ដីរបស់លោក មូន ចេអ៊ីន ជារឿងមិនអាចទទួលយកបាន និងគួរឲ្យសោកស្ដាយបំផុត។ នេះបើតាមការផ្សាយរបស់ទីភ្នាក់ងារព័ត៌មាន AFP ។ លើសពីនោះ រដ្ឋាភិបាលក្រុងតូក្យូក៏បានដាក់ពាក្យតវ៉ាជាផ្លូវការទៅកាន់ក្រុងសេអ៊ូលចំពោះពាក្យពេជន៍របស់មេដឹកនាំកូរ៉េខាងត្បូងដែរ។
ជុំវិញរឿងដដែលនេះ លោក មូន ចេអ៊ីន បញ្ជាក់ថា អ្វីដែលរដ្ឋាភិបាល និងជនរងគ្រោះកូរ៉េខាងត្បូងចង់បាន គឺការសុំទោសដោយសុទ្ធចិត្ត។ «ខ្ញុំចង់ឲ្យជប៉ុនតបស្នងប្រទេសជិតខាងដែលខ្លួនធ្លាប់ធ្វើបាប និងដើរលើផ្លូវសន្តិសហវិជ្ជមានជាមួយគ្នា។ ខ្ញុំមិនទាមទារឲ្យជប៉ុនធ្វើអ្វីពិសេសឡើយ។ ខ្ញុំចង់ឲ្យជប៉ុនបន្តដំណើរទៅអនាគតជាមួយកូរ៉េខាងត្បូង ជាមួយនឹងការដឹងកំហុស និងការសុំទោសប៉ុណ្ណោះ»។ នេះជាសំណើជាថ្មីរបស់ប្រធានាធិបតីកូរ៉េខាងត្បូង៕
Tag:
កូរ៉េខាងត្បូង
ជប៉ុន
មូនចេអ៊ីន
© រក្សាសិទ្ធិដោយ thmeythmey.com