បទយកការណ៍ / បទសម្ភាសន៍
×![]()
ភ្នំពេញ៖ គន្លឹះមួយចំនួន បានធ្វើឲ្យលោក ឡុង ចំណាន ផ្លាស់ប្ដូរពីបុគ្គលិកធម្មតាម្នាក់ មកជាថ្នាក់ដឹកនាំក្រុមហ៊ុន។ សព្វថ្ងៃ លោក ឡុង ចំណាន ជានាយកប្រតិបត្តិអាជីវកម្មឥណទាន នៃគ្រឹះស្ថានផ្ដល់កម្ចី AMK ។ 
សូមស្ដាប់កិច្ចសម្ភាសរវាងលោក ញ៉ុង ហេង នៃសារព័ត៌មានថ្មីៗ និងលោក ឡុង ចំណាន ខាងក្រោមនេះ៖
លោក ឡុង ចំណាន បានចូលបម្រើការជាមន្ត្រីឥណទាននៅគ្រឹះស្ថាន AMK នៅឆ្នាំ២០០៦ ដែលកាលនោះលោកនៅជានិស្សិតឆ្នាំទី៤ផ្នែកកសិកម្ម និងអភិវឌ្ឍន៍ជនបទនៅឡើយ។ លោកត្រូវបានដំឡើងតំណែងជាច្រើនដង ហើយមុខតំណែងចុងក្រោយនេះ គឺជានាយកផ្នែកឥណទាន ដែលជាតួនាទីដ៏សំខាន់របស់ក្រុមហ៊ុនមីក្រូហិរញ្ញវត្ថុ។ ការពិតទៅ លោក ចំណាន មិនមានក្ដីប្រាថ្នាកាន់តួនាទីជាថ្នាក់ដឹកនាំអ្វីឡើយ កាលពីចូលធ្វើការដំបូង ពោលគឺលោកលៃលកឲ្យតែមានការងារធ្វើសិន។ លុះបម្រើការបានមួយរយៈ លោកចាប់ផ្ដើមមានចិត្តស្រលាញ់វិស័យធនាគារ និងចង់ក្លាយជាអ្នកចូលរួមធ្វើសេចក្ដីសម្រេចចិត្តរបស់ក្រុមហ៊ុន។
តើមានចំណុចគន្លឹះអ្វីខ្លះ ដែលដឹកនាំជីវិតការងារលោក ឡុង ចំណាន ឲ្យមានភាពជោគជ័យជាបណ្ដើរៗមកទល់សព្វថ្ងៃ?
«នៅពេលថ្នាក់លើដាក់ការងារឲ្យធ្វើ តែធ្វើមិនបានជោគជ័យ ឬធ្វើមិនបានតាមផែនការទេ ខ្ញុំមានអារម្មណ៍ថាខ្មាសមេ និងអៀនបុគ្គលិក។ ហើយអារម្មណ៍នេះ ធ្វើឲ្យខ្ញុំប្រឹងប្រែងរកវិធីធ្វើការឲ្យបានជោគជ័យដល់ខ្លួនខ្ញុំ និងស្ថាប័ន»។ នេះបើតាមការថ្លែងរបស់លោក ឡុង ចំណាន ។
តាំងពីពេលនៅជាបុគ្គលិកមកម្លេះ លោក ចំណាន មានទម្លាប់ធ្វើការឲ្យរួចរាល់ ទើបស្រលះចិត្ត។ «លុះត្រាតែធ្វើការនោះឲ្យចប់ បានខ្ញុំមានអារម្មណ៍ស្រួលក្នុងខ្លួន ហើយមិនបាច់មេមកបង្ខិតបង្ខំនោះទេ»។ នេះជាការថ្លែងរបស់លោក ចំណាន ដែលអះអាងថា នេះជាកត្តាមួយទៀតដែលធ្វើឲ្យលោកធ្វើការបានរលូន និងធ្វើឲ្យថ្នាក់លើបានមើលឃើញពីសមត្ថភាព និងការប្រឹងប្រែងរបស់លោក។
ជាជាងការប្រកែក មិនព្រមធ្វើគម្រោងការងារថ្មីៗ លោក ចំណាននិយាយពីពិសោធន៍របស់ខ្លួនថា ទទួលធ្វើសិន ហើយបើរកឃើញចំណុចខ្វះខាត ចាំជជែកជាមួយថ្នាក់ដឹកនាំឲ្យកែប្រែ។ លោកលើកឡើងដូចនេះថា៖«អ្វីដែលដាក់មកពីថ្នាក់លើ ខ្ញុំមិនព្យាយាមប្រកែកនោះទេ ខ្ញុំយកទៅអនុវត្ត ហើយបើជួបបញ្ហាត្រង់ណាត្រូវយកមកនិយាយជាមួយថ្នាក់លើវិញ។ ខ្ញុំមិនជឿថា ក្រុមហ៊ុនមួយមិនកែផលិតផលដើម្បីឲ្យសមស្របអាចលក់បាននោះទេ»។ ផ្ទុយមកវិញ បើបុគ្គលិកបដិសេធគម្រោងថ្មី គេនឹងគ្មានអ្វីទៅជជែកជាមួយថ្នាក់គ្រប់គ្រងឡើយ ព្រោះថាគេមិនទាន់បានចុះអនុវត្តផងនោះ។ លោក ចំណាន បន្ថែមបែបនេះ។
មិនត្រឹមតែចាំទទួលផែនការពីថ្នាក់លើ តែលោក ចំណាន ហ៊ានស្នើធ្វើលើសផែនការ បើសិនឃើញឱកាសល្អដល់ក្រុមហ៊ុន។
តើមានឧបសគ្គ ដែលលោក ឡុង ចំណាន ជួបប្រទះក្នុងរយៈពេល ១១ឆ្នាំនេះដែរទេ? លោកដោះស្រាយដូចម្ដេច?
មុនបានមកអង្គុយក្នុងការិយាល័យមានម៉ាស៊ីនត្រជាក់ លោក ចំណាន ដែលជាអ្នកទីក្រុង បានជម្នះចិត្តម្ដាយ ទៅធ្វើការនៅតំបន់ដាច់ស្រយាលតាមទីជនបទក្នុងនាមជាភ្នាក់ងារឥណទាន។
ទំនងជាងាយស្រួលជាងបើរៀនផ្នែកធនាគារ ហើយមកធ្វើការក្នុងគ្រឹះស្ថានហិរញ្ញវត្ថុ តែចំពោះលោក ចំណាន មិនបានរៀនផ្នែកនេះពីមុនមកទេ។ ទោះយ៉ាងណា អតីតនិស្សិតកសិកម្ម និងអភិវឌ្ឍន៍ជនបទរូបនេះ ឲ្យដឹងថា សំខាន់បុគ្គលផ្ទាល់ខ្លួនប្រឹងខ្នះខ្នែងចាប់យកអ្វីដែលថ្មី។ លោកមានប្រសាសន៍យ៉ាងនេះថា៖«តើយើងបើកចិត្តរៀន ឬអត់ទេ? បើកចិត្តទទួល (អ្វីថ្មី) ដែរទេ? ព្រោះចូលធ្វើការក្នុងស្ថាប័នណា ក៏គេបង្រៀនយើងដែរ។ ពេលខ្ញុំចូលធ្វើការដំបូង អាចដល់ម៉ោង២ម៉ោង៣ជិតភ្លឺ ដើម្បីប្រឹងរៀន ប្រឹងធ្វើឯកសារឲ្យត្រូវ ព្រោះខ្ញុំមិនមានជំនាញនេះពីមុនមកទេ»។ នេះជាឧបសគ្គ ពេលលោកចូលធ្វើការក្នុងឆ្នាំបូងៗ។
លោក ចំណាន ក៏បានបញ្ចប់ថ្នាក់អនុបណ្ឌិតផ្នែកធនាគារ និងហិរញ្ញវត្ថុផងដែរ។ នេះបើនិយាយពីកម្រិតសញ្ញាបត្ររបស់លោក។
តែក្រោយមកលោក ចំណាន ត្រូវបានផ្ដល់តំណែងកាន់តែខ្ពស់ជាងមុន ហើយការទទួលខុសត្រូវក៏ធំជាងមុន ពោលគឺមិនត្រឹមតែចាំទទួលផែនការ តែត្រូវយកផែនការទៅពន្យល់បុគ្គលិកក្រោមមុខងាររបស់ខ្លួន។ លោកចាត់ទុក ការបង្ហាញផ្លូវដល់បុគ្គលិកមុននឹងដាក់ឲ្យធ្វើគម្រោង គឺជាភាពចាំបាច់ ក្នុងការជំរុញការងារឲ្យទៅមុខ។
ឧបសគ្គធំមួយ តែក្រោយមកក៏ក្លាយជាសមិទ្ធផលមិនអាចបំភ្លេចបាន ដែលលោក ចំណាន សម្រេចបានជូនក្រុមហ៊ុន នោះគឺការលក់ផលិតផលឥណទាន ដែលធ្លាប់តែផ្ដល់សេវានៅជនបទ តែត្រូវយកមកភ្នំពេញ។ ពេលនោះលោកត្រូវបានតែងតាំងជាប្រធានសាខារបស់ AMK ដំបូងនៅភ្នំពេញ។ លោក ចំណាន ឲ្យដឹងថា ជាការលំបាក ចំពោះការផ្ដល់សេវាកម្មឥណទានតូចៗ ដែលធ្លាប់តែពេញនិយមនៅស្រុកស្រែ សម្រាប់បម្រើឲ្យអ្នកទីក្រុង។ តែពេលនោះលោកធ្វើបានជោគជ័យ ដោយលោកបានឃើញឱកាសពីអ្នករស់នៅក្នុងសំណង់អនាធិបតេយ្យ ដែលត្រូវការកម្ចីស្ដួចស្ដោងទាំងនេះ។
លោក ចំណាន និយាយដូចនេះថា៖«ពេលនោះជាឧបសគ្គ តែផ្គួបផ្សំនឹងការសប្បាយចិត្តព្រោះក្រុមហ៊ុនទុកចិត្តរូបខ្ញុំ។ តែខ្ញុំអត់ទាន់និយាយថាលំបាកទេ គឺខ្ញុំធ្វើសិន។ ខ្ញុំសប្បាយចិត្តដែលបានធ្វើឲ្យសាខាភ្នំពេញមួយជោគជ័យ»។
«អ្នកបោះបង់មិនដែលជោគជ័យទេ តែបើយើងនៅអង្គុយធ្វើ អង្គុយកែច្នៃទាំងអស់គ្នា រឿងប្រាកដជាជោគជ័យកើតមកលើយើង បើមិនជោគជ័យក៏បានបទពិសោធន៍ពីនោះដែរ វាអត់មានខាតឡើយ»។ នេះជាយល់ឃើញរបស់នាយកឥណទានរូបនេះ។
ក្រៅពីចំណុចខាងលើ លោក ឡុង ចំណាន មានទម្លាប់ជជែកសួរ ដេញដោល ក្នុងពេលធ្វើការ។ លោកសួរនាំបុគ្គលិកពីសកម្មភាពការងារ និងសួរទៅថ្នាក់លើជាប្រចាំ។ លោកចាត់ទុកការពិភាក្សាដេញដោលក្នុងក្រុមហ៊ុនជាប្រចាំ និងភ្លាមៗតាមកាលៈទេសៈ គឺជារឿងល្អសម្រាប់ការរីកចម្រើនក្នុងក្រុមហ៊ុន៕
Tag:
ឡុង ចំណាន
AMK
© រក្សាសិទ្ធិដោយ thmeythmey.com
