ជាតិ
ព័ត៍មានសុខភាព
សុខភាព
ការផ្អាកសេវាស្ម័គ្រចិត្តតាមភូមិជាផ្នែកមួយដែលនាំឲ្យករណីជំងឺគ្រុនចាញ់កើនឡើងទ្វេ ហ្វេវប៊ុកក្រសួងសុខាភិបាល
× នៅឆ្នាំ ២០១៧ ពលរដ្ឋកម្ពុជា កើតជំងឺគ្រុនចាញ់ សរុបចំនួន ៤៥,៩៩១ករណី ពោលគឺកើនឡើង ៩៥ភាគរយ នេះបើបៀបធៀបទៅនឹងឆ្នាំ២០១៦ អ្នកជំងឺមានចំនួនត្រឹមតែ ២៣,៦២៧ករណី។ ការផ្អាកសេវាកម្មអ្នកស្ម័គ្រចិត្តភូមិនៅតាមសហគមន៍ គឺជាកត្តាចម្បងមួយ។
មជ្ឈមណ្ឌលជាតិប្រយុទ្ធនឹងជំងឺគ្រុនចាញ់ ប៉ារ៉ាស៊ីតសាស្ត្រ និងបាណកសាស្ត្រ នៃក្រសួងសុខាភិបាល បានរៀបចំសន្និបាតបូកសរុបលទ្ធផលការងារខ្លួន កាលពីថ្ងៃទី២២ ខែកុម្ភៈ កន្លងមក នៅខេត្តសៀមរាប។ លទ្ធផលសរុបកាលពីឆ្នាំ២០១៧ បានបង្ហាញថា តួលេខអ្នកកើតជំងឺគ្រុនចាញ់ បានកើនឡើងជិតទ្វេដង ពោលគឺរហូតដល់ទៅ៩៥ភាគរយ។
លទ្ធផលបែបនេះ បានតម្រូវឲ្យមន្ត្រីត្រូវពង្រឹងការងារខ្លួនបន្ថែមទៀត ក្នុងការអនុវត្តការងារនៅឆ្នាំ២០១៨។ «សេវាអ្នកស្ម័គ្រចិត្តភូមិនៅសហគមន៍ត្រូវបានផ្អាកស្ទើរតែទាំងស្រុងនៅទូទាំងប្រទេស ដែលអាចជាហេតុធ្វើឲ្យអ្នកជំងឺ នៅសហគមន៍ទៅទទួលសេវាព្យាបាលយឺតយ៉ាវ និងបង្កលក្ខណៈឲ្យអត្រាចំលងប៉ារ៉ាស៊ីត ដោយមូសដែកគោលកើនឡើងខ្ពស់»។ នេះបើតាមការលើកឡើងក្នុងរបាយការណ៍។
ស្របពេលជាមួយគ្នានេះដែរ ប្រសិទ្ធភាពមុងជ្រលក់ថ្នាំដល់អាយុកាល បន្ទាប់ពីប្រើប្រាស់ប្រាស់រយៈពេល ៣ឆ្នាំ និងមានការរហែកច្រើន។ អាកាសធាតុមានការប្រែប្រួល ដោយមានភ្លៀងធ្លាក់អូសបន្លាយពេលយូរ ដែលអាចជាកត្តាធ្វើឲ្យមានភាពអំណោយផល ដល់ការកកើតរបស់ភ្នាក់ងារចម្លងផងដែរ។ ម្យ៉ាងវិញទៀត ប្រជាជនចល័ត មានការតាំងទីលំនៅស្ថានថ្មីនៅតំបន់អភិវឌ្ឍន៍ថ្មីៗ នៅកន្លែងប្រឈមការចំលងជំងឺគ្រុនចាញ់ខ្ពស់។
«ការផ្លាស់ប្តូរថ្នាំថ្មីជំនួសថ្នាំចាស់ ដែលស៊ាំមានការយឺតយ៉ាវប្តូរពី DHA-PIP ទៅ AS-MQ និងការងារអប់រំសុខភាពនៅឆ្នាំកន្លងមក មិនសូវមានសន្ទុះខ្លាំងក្លា ដោយកញ្ចប់ថវិកាមិនមែនគ្រប់គ្រងផ្ទាល់ដោយមជ្ឈមណ្ឌលជាតិប្រយុទ្ធនឹងជំងឺគ្រុនចាញ់»។ នេះតាមការបញ្ជាក់ លោកវេជ្ជបណ្ឌិត ហ៊ុយ រ៉េកុល ប្រធានមជ្ឈមណ្ឌលជាតិប្រយុទ្ធនឹងជំងឺគ្រុនចាញ់ ប៉ារ៉ាស៊ីតសាស្ត្រ និងបាណកសាស្ត្រ ។
លោក ហ៊ុយ រ៉េកុល បានបញ្ជាក់ថា កម្ពុជានឹងលុបបំបាត់ជំងឺគ្រុនចាញ់ ដោយធ្វើឲ្យអត្រាអាំងស៊ីដង់ជំងឺមកនៅត្រឹម ម្នាក់ក្នុងចំណោមមនុស្ស ១,០០០នាក់ ចាប់ពីឆ្នាំ២០១៨ទៅ នៅខេត្តចំនួន៦ គឺខេត្តបាត់ដំបង កំពង់ឆ្នាំង កំពង់ធំ សៀមរាប ប៉ៃលិន និងកំពង់ស្ពឺ។
បន្ថែមពីលើនេះ លោកបានលើកឡើងពីកិច្ចសហការ និងជំរុញឲ្យសេវាសហគមន៍ (អ្នកស្ម័គ្រចិត្តភូមិព្យាបាលជំងឺគ្រុនចាញ់ និងសេវាឯកជន) ឲ្យបានដំណើការប្រក្រតីឡើងវិញ ១០០ភាគរយ រួមទាំងការរៀបចំចែកមុងជ្រលក់ថ្នាំប្រសិទ្ធភាពបានយូរ ក្នុងនោះមានមុងគ្រែ និងមុងអង្រឹង ដល់ប្រជាជនគោលដៅ និងប្រជាជនចល័តស្រុក៕
Tag:
គ្រុនចាញ់
ហ៊ុយ រ៉េកុល
© រក្សាសិទ្ធិដោយ thmeythmey.com