ជាតិ
សង្គមជាតិ
សមត្ថកិច្ច ចាប់បានជនល្មើសពីរនាក់ ដែលវាយលោក ស៊ុយ សារ៉េត ក្នុងគ្រោះថ្នាក់ចរាចរណ៍
សកម្មភាពដែលពលរដ្ឋ ព្រួតគ្នាវាយលោក ស៊ុយ សារ៉េត ក្នុងហេតុការណ៍គ្រោះថ្នាក់ចរាចរណ៍
×![]()
ដោយ: សារព័ត៌មានថ្មីៗ
ភ្នំពេញ៖ ជនសង្ស័យពីរនាក់ ក្នុងចំណោមជនសង្ស័យផ្សេងទៀត ដែលព្រួតគ្នាវាយដំលោកបណ្ឌិត ស៊ុយ សារ៉េត ក្នុងហេតុការណ៍គ្រោះថ្នាក់ចរាចរណ៍ បណ្តាលឲ្យរបួសយ៉ាងធ្ងន់ធរ ត្រូវបានចាប់ខ្លួន នៅល្ងាចថ្ងៃទី១៣ ខែមីនា ឆ្នាំ២0១៨នេះ។ នេះបើតាម Fresh News ដែលស្រង់ប្រសាសន៍របស់លោក ជួន សុវណ្ណ ស្នងការរាជធានីភ្នំពេញ ទៅចុះផ្សាយ។
លោក ជួន សុវណ្ណ មិនទាន់បញ្ជាក់ពីអត្តសញ្ញាណ និងឈ្មោះរបស់ជនល្មើសទាំងពីរនាក់ ដែលត្រូវបានចាប់ខ្លួននោះទេ។ ប៉ុន្តែ សមត្ថកិច្ច ធ្លាប់បង្ហាញពីមុនថា ជនសង្ស័យម្នាក់ ឈ្មោះ ភាជ គឺមហាក់ ដែលជាអតីតសន្តិសុខខណ្ឌដូនពេញ ស្ថិតនៅក្រោមការតាមចាប់ខ្លួន។
សារព័ត៌មានថ្មីៗមិនអាចទាក់ទងលោក សុខ ពេញវុធ អភិបាលខណ្ឌដូនពេញ ដើម្បីសុំការបំភ្លឺបានទេ ដោយសារតែហៅទូរសព្ទមិនចូល។ លោក សុខ ពេញវុធ បានគាំទ្រចំណាត់ការរបស់សមត្ថកិច្ចក្នុងតាមចាប់ជនសង្ស័យជាអតីតសន្តិសុខអភិបាលខណ្ឌដូនពេញ យកទៅផ្តន្ទាទោស។
កាលពីថ្ងៃទី១១ ខែមីនា ឆ្នាំ២0១៨ លោក ស៊ុយ សារ៉េត ត្រូវបានប្រជាពលរដ្ឋជាច្រើននាក់ បានចោមរោមវាយ រហូតដល់បែកក្បាល បែកមុខមាត់ និងទ្រោមខ្លួន ហើយក៏ត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យកាល់ម៉ែត។ ចំណែក រថយន្តរបស់លោក ក៏ត្រូវបានពលរដ្ឋវាយកម្ទេចខូចខាតទាំងស្រុង មុនពេលសមត្ថកិច្ច ចុះទៅធ្វើអន្តរាគមន៍ នៅកន្លែងកើតហេតុ។ ប្រជាពលរដ្ឋមួយចំនួន អះអាងថា លោក ស៊ុយ សារ៉េត បានបើករថយន្ត បង្កឲ្យមានគ្រោះថ្នាក់ចរាចរណ៍ ចាប់ពីម្តុំទួលសង្កែ ខណ្ឌប្ញស្សីកែវ រហូតដល់ម្តុំមន្ទីរពេទ្យលោកសង្ឃ។
កូនស្រីរបស់លោក ស៊ុយ សារ៉េត បានពឹងពាក់លោកមេធាវី ឈី សម្បត្តិ ឲ្យដាក់បណ្តឹងទៅសមត្ថកិច្ច ដើម្បីតាមចាប់ជនល្មើសយកទៅផ្តន្ទាទោស។ ក្រោយទទួលការពឹងពាក់ លោកមេធាវី ឈី សម្បត្តិ ក៏បានដាក់បណ្តឹងទៅកាន់លោក ជួន សុវណ្ណ ស្នងការរាជធានីភ្នំពេញ ដោយទាមទារសំណង៣សែនដុលា្លរពីជនល្មើស ដើម្បីយកជូនកូនក្តីរបស់ខ្លួន។
នៅថ្ងៃទី១៣ ខែមីនា ឆ្នាំ២0១៨នេះ ស្នងការរាជធានីភ្នំពេញ បានអំពាវនាវឲ្យប្រជាពលរដ្ឋ បញ្ឈប់ការប្រើអំពើហិង្សាលើអ្នកបើកបរ និងយានយន្ដ ក្នុងករណីគ្រោះថ្នាក់ចរាចរណ៍។ តាមរយៈសេចក្តីអំពាវនាវ ស្នងការរាជធានីភ្នំពេញ ស្នើឲ្យប្រជាពលរដ្ឋ ចូលរួមចាប់ឬឃាត់ជនបង្កគ្រោះថ្នាក់ចរារចារណ៍ ហើយប្រគល់ជូនសមត្ថកិច្ចបានហើយ ដោយមិនត្រូវប្រើអំពើហិង្សាឡើយ៕
Tag:
ស៊ុយ សារ៉េត
© រក្សាសិទ្ធិដោយ thmeythmey.com
