អន្តរជាតិ
នយោបាយអន្តរជាតិ
ក្រុមបក្សប្រឆាំងមីយ៉ាន់ម៉ា ត្អូញត្អែរ ថា រងការគៀបសង្កត់ពីបក្សកាន់អំណាចនៅក្នុងសភា (ពីឆ្វេង) លោក Than Tun លោក Pike Htwe និងលោក Maung Maung Htay សមាជិកបក្សប្រឆាំង សហភាពរួបរួម និងការអភិវឌ្ឍ (USDP)។ រូបថត AFP
× តំណាងរាស្ត្របក្សប្រឆាំង សហភាពរួបរួម និងការអភិវឌ្ឍ (USDP) របស់មីយ៉ាន់ម៉ា បានត្អូញត្អែរពីការមិនសូវយកចិត្តលើពួកគេនៅក្នុងសភាជាតិ ។ ក្រុមតំណាងរាស្ត្រ បានលើកឡើងពីបញ្ហាមិនស្មើភាពគ្នារវាងបក្សប្រឆាំង និងបក្សកាន់អំណាចរបស់លោកស្រី អ៊ុងសាន ស៊ូជី ។
អ្នកនាំពាក្យបក្សប្រឆាំងសហភាពរួបរួម និងការអភិវឌ្ឍរបស់មីយ៉ាន់ម៉ា លោក Pike Htwe នៅថ្ងៃ២០ មីនា បានថ្លែងក្នុងសន្និសីទសារព័ត៌មាន ថា ពេលណាក៏ដោយឲ្យតំណាងរាស្ត្របក្សប្រឆាំងលើកសំណួរ និងដាក់សំណើអ្វីមួយ តំណាងរាស្ត្របក្សកាន់អំណាចសម្ព័ន្ធជាតិដើម្បីប្រជាធិបតេយ្យ (NLD) របស់លោកស្រី អ៊ុងសាន ស៊ូជី តែងតែជំទាស់ជានិច្ច ។ នេះបើយោងតាមការចុះផ្សាយរបស់សារព័ត៌មាន Myanmar Times ។
អ្នកនាំពាក្យ បន្តទៀតថា រាល់សំណើ និងគម្រោង ដែលធ្វើដោយបក្សប្រឆាំង ជានិច្ចកាលត្រូវបានបរាជ័យតាមរយៈការបោះឆ្នោតជំទាស់ពីសមាជិកបក្សកាន់អំណាចតែម្តង ។ នេះបើយោងតាមប្រភពព័ត៌មានដែលព័ត៌មាន ដែលបានដកស្រង់សម្តីអ្នកនាំពាក្យ ដែលបានសង្កត់ធ្ងន់យ៉ាងដូច្នេះថា៖« ប្រសិនបើយើងនិយាយពីបញ្ហានៅក្នុងអាណត្តិនេះ វា ហាក់ដូចជាបក្ស USDP ត្រូវបានរុកគួនតាមមធ្យោបាយប្រជាធិបតេយ្យ» ។
យ៉ាងណាក៏ដោយ អ្នកនាំពាក្យដដែលនោះ ក៏បានថ្លែងពីការប្តេជ្ញាចិត្តរបស់បក្សប្រឆាំង បើទោះជាបក្សនេះ រងការបំពានអំណាចពីក្រុមតំណាងរាស្ត្រភាគច្រើនក៏ដោយ ។ « តំណាងរាស្ត្របក្ស USDP សន្យាបន្តការងារនៅក្នុងសភា និងព្យាយាមឲ្យអស់ពីសមត្ថភាពដើម្បីការពារ និងតំណាងផលប្រយោជន៍របស់សាធារណៈ» ។ អ្នកនាំពាក្យសង្កត់ធ្ងន់យ៉ាងដូច្នេះ ។
គួរជម្រាបផងដែរ គណបក្សសហភាពរួបរួម និងការអភិវឌ្ឍ នៅអាណត្តិមុន ធា្លប់ជាបក្សកាន់អំណាច ដែល ពេលនោះត្រូវបានដឹកនាំដោយអតីតប្រធានាធិបតីមីយ៉ាន់ម៉ា លោក ថេន សេន ។ ដោយឡែក ក្រោយចាញ់ការបោះឆ្នោតសកលភ្លូកទឹកភ្លូកដីនៅឆ្នាំ២០១៥បក្សសម្ព័ន្ធជាតិដើម្បីប្រជាធិបតេយ្យរបស់លោកស្រី អ៊ុងសាន ស៊ូជី បានកាន់កាប់ទាំងរដ្ឋាភិបាល និងសភាវិញ ។ ការផ្លាស់ប្តូរនេះ បានធ្វើឲ្យមីយ៉ាន់ម៉ា ស្គាល់អ្វីដែលហៅថា ការដឹកនាំដោយស៊ីវិលក្នុងរយៈពេលប៉ុន្មានទសវត្សរ៍ចុងក្រោយ ដ្បិតកន្លងមក ការដឹកនាំសុទ្ធសឹងតែស្ថិតក្រោមក្រុមយោធា ៕
Tag:
មីយ៉ាន់ម៉ា
អាស៊ាន
© រក្សាសិទ្ធិដោយ thmeythmey.com