ជាតិ
អតីតតំណាងរាស្ត្របក្សប្រឆាំង ស្នើសុំចូលជួបគ្នីគ្នា ដែលកំពុងជាប់ឃុំក្នុងពន្ធនាគារ (ពីឆ្វេងទៅស្តាំ) លោក អ៊ុំ សំអាន និងលោក មាជ សុវណ្ណារ៉ា
× អតីតតំណាងរាស្ត្រមួយចំនួននៃគណបក្សសង្គ្រោះជាតិ ដែលមិនបានគេចខ្លួនទៅក្រៅប្រទេស បានរួមគ្នាដាក់សំណើមួយ ទៅកាន់អគ្គនាយកដ្ឋានពន្ធនាគារ ដើម្បីសុំចូលជួបអតីតតំណាងរាស្ត្រដូចគ្នា គឺលោក អ៊ុំ សំអាន ដែលកំពុងជាប់ឃុំក្នុងពន្ធនាគារ។ ក្រៅពីលោក អ៊ុំ សំអាន នៅមានលោក មាជ សុវណ្ណារ៉ា អតីតមន្ត្រីជាន់ខ្ពស់នៃគណបក្សសង្គ្រោះជាតិ និងសកម្មជនជាង១0ផ្សេងទៀត ដែលកំពុងជាប់ឃុំក្នុងពន្ធនាគារ ក៏ត្រូវបានស្នើសុំការអនុញ្ញាត ដើម្បីចូលជួបផងដែរ។
លោក អ៊ូ ច័ន្ទរ័ត្ន អតីតតំណាងរាស្ត្របក្សប្រឆាំង១រូប ដែលដឹកនាំនិងចុះហត្ថលេខាលើសំណើ ដើម្បីសុំចូលជួបសហការីក្នុងពន្ធនាគារ បានប្រាប់សារព័ត៌មានថ្មីៗថា រហូតមកដល់ពេលនេះ លោក មិនទានប់ទទួលបានការឆ្លើយតបពីអគ្គនាយកដ្ឋានពន្ធានាគារ នៅឡើយទេ។ លោក ប្រាប់ពីគោលបំណងយ៉ាងដូច្នេះថា៖«យើង អត់មានរឿងអ្វីផ្សេងទេ។ យើង គ្រាន់តែចង់ចូលទៅសួរសុខទុក្ខពួកគាត់ធម្មតាប៉ុណ្ណោះ»។
កន្លងមកអតីតតំណាងរាស្ត្របក្សប្រឆាំង ក៏ធ្លាប់ស្នើសុំចូលជួបអ្នកខាងលើដែរ ប៉ុន្តែត្រូវបានបដិសេធ។
កាលពីអំឡុង ខែតុលា ឆ្នាំ២០១៦ លោក អ៊ុំ សំអាន ត្រូវបានតុលាការ កាត់ទោសជាប់ពន្ធនាគារ ២ឆ្នាំ ៦ខែ និងពិន័យជាប្រាក់៤លានរៀល ពីបទ«ញុះញង់នាំឲ្យមានការរើសអើង និងប្រព្រឹត្តបទឧក្រិដ្ឋជាអាទិ៍» ទាក់ទងនឹងការរិះគន់ពីបញ្ហាព្រំដែន។
រីឯ លោក មាជ សុវណ្ណារ៉ា រួមទាំងសកម្មជនបក្សប្រឆាំងជាង១០នាក់ទៀត ត្រូវបានកាត់ទោសឲ្យជាប់ពន្ធគារ ពី៧ឆ្នាំ ទៅ២០ឆ្នាំ។ តុលាការ បានចោទពួកគេថា បានចូលរួម និងដឹកនាំធ្វើកុបកម្មប្រឆាំងអាជ្ញាធរសាធារណៈ នៅក្បែរទីលានប្រជាធិបតេយ្យ កាលពីខែកក្កដា ឆ្នាំ២០១៤៕
© រក្សាសិទ្ធិដោយ thmeythmey.com