រោងកុននៅក្នុងទីក្រុងឡុងដ៍អនុញ្ញាតឲ្យម្ចាស់យកឆ្កែ ទៅមើលកុនជាមួយខ្លួន

អន្តរជាតិ

រោងកុននៅក្នុងទីក្រុងឡុងដ៍អនុញ្ញាតឲ្យម្ចាស់យកឆ្កែ ទៅមើលកុនជាមួយខ្លួន

24, Mar 2018 , 9:59 pm

រូបភាព

ដោយ: ធីតា

ការផ្តួចផ្តើមរបស់ផលិតកម្ម Picturehouse នៅទីក្រុងឡុងដ៍ ទទួលបានជោគជ័យដ៏គួរឲ្យសម្គាល់។ រឿងគំនូសជីវចល «កោះឆ្កែ» ដែលជាស្នាដៃរបស់លោក Wes Anderson ទទួលបានការគាំទ្រយ៉ាងខ្លាំងនៅអង់គ្លេស ក្នុងនោះក៏មានទស្សនិកជនជាសុនខ ផងដែរ។

«ស្វាគមន៍ភ្ញៀវទាំងអស់ជាមួយនឹងឆ្កែរបស់ពួកគេដែលមានការចិញ្ចឹមបីបាច់បានល្អ»។ នេះជាការផ្សព្វផ្សាយរបស់ Picturehouse ក្នុងគេហទំព័ររបស់ខ្លួន ជាមួយនឹងផ្ទាំងពាណិជ្ជកម្ម «Dog-Friendly»។

នៅ West End ដែលជាតំបន់មហោស្រពភាពយន្ត និងរោងកុន១៤ផ្សេងទៀត ទូទាំងប្រទេស ជាពិសេសនៅតាមទីប្រជុំជន មនុស្សអាចយកសុនខសំណព្វរបស់ខ្លួនទៅជាមួយ ដើម្បីមើលរឿងគំនូសជីវចល «កោះឆ្កែ» (Isle of Dogs)។

«កោះឆ្កែ» ដែលជាស្នាដៃរបស់ផលិតករអាមេរិក លោក Wes Anderson រៀបរាប់ពីដំណើរផ្សងព្រេងរបស់កុមារម្នាក់នៅកោះដាច់ស្រយាលដើម្បីស្វែងរកសត្វឆ្កែខ្លួន។ ឆ្កែរាប់សិបក្បាលត្រូវបានបញ្ជូនចេញពីក្រុង Megasaki បន្ទាប់ពីការឆ្លងមេរោគជាបន្តបន្ទាប់។

នៅក្នុងរោងភាពយន្ត ក្រុមហ៊ុន Picturehouse បានរៀបចំចានទឹក និងភួយសម្រាប់ឆ្កែ ហើយសំឡេងស្ថិតក្រោមត្រួតពិនិត្យយ៉ាងល្អិតល្អន់ដើម្បីកុំឲ្យថ្លង់លាយឡំជាមួយនឹងសំឡេងឆ្កែ។

អ្នកស្រី Kathryn Smith ម្ចាស់រោងភាពយន្តម្នាក់ បាននិយាយប្រាប់ The Times ថា តាំងពីការសាកល្បងពីខែសីហា ឆ្នាំមុន មក អ្នកស្រីមិនដែលឃើញមានបញ្ហាអ្វីធំដុំឡើយ។ អ្នកស្រី បានអះអាងថា៖ «ឆ្កែដែលជាទស្សនិកជនពេលខ្លះ មានភាពស្ងប់ស្ងាត់ជាងមនុស្សធម្មតា។ ពួកវាភាគច្រើនទទួលបាននូវការអប់រំល្អពីម្ចាស់។ ខ្ញុំមិនដែលឃើញបាតុភាពអ្វីកើតឡើងនោះឡើយ»៕