ម្ចាស់ជើងឯកឆ្នាំ ២០១០ អេស្ប៉ាញ ដែលសម្បូរទៅដោយកីឡាករឆ្នើមប្រកបអាជីពក្នុងក្រុមល្បីៗនៅតំបន់អឺរ៉ុប ទទួលបានកៅអីទៅកាន់ព្រឹត្តិការណ៍ FIFA World Cup 2018 នៅរុស្ស៊ី ដោយស្ថិតក្នុងពូល B ត្រូវជួបជាមួយព័រទុយហ្គាល់មកពីតំបន់អឺរ៉ុបដូចគ្នា ម៉ារ៉ុកពីអាហ្វ្រិក និងអ៊ីរ៉ង់ក្រុមខ្លាំងមកពីអាស៊ី។
គ្រូបង្វឹក៖ Julen Lopetegui (អេស្ប៉ាញ)
អតីតអ្នកចាំទីក្រុម Barcelona និង Real Madrid ហើយធ្លាប់ជាសមាជិកក្រុមជម្រើសជាតិអេស្ប៉ាញសម្រាប់ឈុត World Cup ឆ្នាំ ១៩៩៤ លោក Lopetegui ត្រូវបានតែងតាំងឲ្យឡើងកាន់តំណែងជំនួសលោក Vicente Del Bosque បន្ទាប់ពីចប់ភារកិច្ចដឹកនាំអេស្ប៉ាញពានរង្វាន់ UEFA EURO ឆ្នាំ២០១៦ នៅបារាំង។
មុនពេលចូលកាន់តំណែងជាអ្នកចាត់ការទូទៅជម្រើសជាតិអេស្ប៉ាញ បុរសវ័យ៥១ឆ្នាំ ធ្លាប់ដឹកនាំក្លឹប FC Porto និងក្រុមយុវជនអេស្ប៉ាញដោយយកឈ្នះពានពីរ ជើងឯកអឺរ៉ុប UEFA European Championships ក្រោមអាយុ១៩ឆ្នាំ (U-19) និងក្រោមអាយុ២១ឆ្នាំ (U-21)។
កីឡាករឆ្នើម៖ Sergio Ramos
Ramos គឺជាកីឡាករដែលជាប់កំណត់ត្រាក្នុងការបង្ហាញខ្លួនឲ្យជម្រើសជាតិអេស្ប៉ាញបានច្រើនលំដាប់ទី២ គឺចំនួន១៤៩ដង បន្ទាប់ពីអ្នកចាំទី Iker Casillas បាន ១៦៧ដង។
ខ្សែការពាររឹងមាំរបស់ក្រុមស្តេចស Real Madrid វ័យ៣១ឆ្នាំរូបនេះ ក៏ជាតួអង្គសំខាន់ជួយឲ្យអេស្ប៉ាញលើកពានអឺរ៉ុប Euro ២លើក និង World Cup ១លើក ចន្លោះពីឆ្នាំ ២០០៨ ដល់ ២០១២។
ប្រវត្តិក្នុង World Cup៖
នេះជាវត្តមានលើកទី ១៥ របស់ក្រុមជម្រើសជាតិអេស្ប៉ាញបន្ទាប់ពីការបង្ហាញខ្លួនលើកដំបូងក្នុងឆ្នាំ១៩៣៤ និងចុងក្រោយឆ្នាំ២០១៤។ លទ្ធផលល្អបំផុតដែលពួកគេទទួលបាន គឺលើកពាននេះលើកទី១ក្នុងប្រវត្តិសាស្ត្រ គឺក្នុងឆ្នាំ២០១០ ដែលអាហ្វ្រិកខាងត្បូងធ្វើម្ចាស់ផ្ទះ។
អេស្ប៉ាញបច្ចុប្បន្ន ស្ថិតក្នុងចំណាត់ថ្នាក់លេខ៦ ពិភពលោក ក្នុងតារាង FIFA Ranking។
កម្មវិធីប្រកួត៖
-១៦ មិថុនា៖ ព័រទុយហ្គាល់ vs អេស្ប៉ាញ (ម៉ោង១អាធ្រាត)
-២១ មិថុនា៖ អ៊ីរ៉ង់ vs អេស្ប៉ាញ (ម៉ោង១អាធ្រាត)
-២៦ មិថុនា៖ អេស្ប៉ាញ vs ម៉ារ៉ុក (ម៉ោង១អាធ្រាត)