ព័ត៌មានជាតិ
ខ្មែរក្រហម
កំណាព្យ
ONE Championship
ចំណេះដឹងទូទៅ
ពន្យល់ពាក្យ
នយោបាយ
សេដ្ឋកិច្ច
សង្គម
ព័ត៌មានកីឡាជាតិ
វិទ្យុ
ព័ត៌មានសុខភាព
រូបត្លុក
ពីនេះ ពីនោះ
ព័ត៌មានអន្តរជាតិ
នយោបាយ
សិល្បៈ
COVID-19
សេដ្ឋកិច្ច
សង្គម
វប្បធម៌
FIFA
កីឡាអន្តរជាតិ
សង្រ្កាន្តឆ្នាំថ្មី
អត្ថបទពាណិជ្ជកម្ម
បទយកការណ៍/សម្ភាស
ជាតិ
សេដ្ឋកិច្ច
ចាយប្រាក់រៀលចំណេញសេដ្ឋកិច្ចជាតិ ដោយគ្រាន់តែថ្លៃបោះពុម្ពប្រាក់ រដ្ឋក៏ចំណេញមិនស្ទើរដែរ
25, Mar 2018 ,
8:19 pm
រូបភាព
រូបភាពពីធនាគារជាតិកម្ពុជា
×
ដោយ:
ប្រាក់រៀលជាអត្តសញ្ញាណមួយរបស់ជាតិ។ ហើយប្រាក់រៀលក៏ជាមធ្យោបាយមួយ ដើម្បីរំលឹកដល់អ្នកជំនាន់ក្រោយ អំពីប្រវត្តិសាស្ត្រ វប្បធម៌ និងវីរបុរសរបស់ជាតិផងដែរ តាមរយៈរូបភាពដែលបោះពុម្ពលើក្រដាសប្រាក់។ នេះហើយដែលថា ចាយប្រាក់រៀលនាំមកនូវមោទកភាព និងសាមគ្គីជាតិ។
តែសព្វថ្ងៃការចរាចរប្រាក់រៀលមិនទាន់ទូលំទូលាយនោះទេ ដោយប្រាក់ដុល្លារអាមេរិកកាន់កាប់ចំណែកដល់ទៅជាង ៨០ភាគរយឯណោះក្នុងសកម្មភាពសេដ្ឋកិច្ចក្នុងស្រុក។
តើជាទ្រឹស្ដី បើការចរាចរប្រាក់រៀលមានភាពលើសលុបនៅកម្ពុជា នឹងផ្ដល់ផលប្រយោជន៍អ្វីខ្លះដល់សេដ្ឋកិច្ចជាតិ?
ចំណូលជាតិពីការបោះពុម្ពក្រដាសប្រាក់៖
ឧទាហរណ៍ក្រដាសប្រាក់ប្រភេទ ១០០០០ រៀល រដ្ឋត្រូវចំណាយថ្លៃបោះពុម្ពតែ ៣០០រៀលប៉ុណ្ណោះ។ តែក្រដាសប្រាក់នេះ អាចយកទៅទិញផលិតផលតម្លៃ ១០០០០រៀលបាន។ ដូច្នេះចំណូលពីការបោះពុម្ពស្មើនឹង ៩៧០០រៀល។ បើមានតម្រូវការប្រាក់រៀលកាន់តែច្រើន ធនាគារជាតិនៃកម្ពុជា អាចបោះពុម្ពកាន់តែច្រើន ហើយរដ្ឋអាចរកចំណូលពីការបោះពុម្ពកាន់តែច្រើនផងដែរ។
តែដោយសារសាធារណជនចាយលុយដុល្លារយ៉ាងគំហុក កត្តានេះបានដាក់កំហិតមិនឲ្យរដ្ឋរកចំណូលបានច្រើនពីការបោះពុម្ពក្រដាសប្រាក់ឡើយ។
រដ្ឋអាចរក្សាស្ថិរភាព ឬលំនឹងតម្លៃប្រាក់រៀល ដើម្បីជីវភាពពលរដ្ឋប្រចាំថ្ងៃ និងអ្នកវិនិយោគ៖
កាលណាបើរដ្ឋបញ្ចេញប្រាក់រៀលច្រើនលើសតម្រូវការ ធ្វើឲ្យតម្លៃប្រាក់រៀលចុះថោក ហើយនាំឲ្យពលរដ្ឋទិញផលិតផលបានកាន់តែតិច។ តែបើរដ្ឋបញ្ចេញប្រាក់រៀលទៅក្នុងទីផ្សារតិចជាងតម្រូវការ ធ្វើឲ្យតម្លៃប្រាក់រៀលហក់ឡើងមិនសមស្រប ដែលប៉ះពាល់ដល់វិនិយោគិន ដែលជាអ្នកផ្គត់ផ្គង់ទំនិញ។ ហើយករណីទាំងពីរនេះ អាចនាំទៅដល់បញ្ហា (វិបត្តិ) ម៉ាក្រូសេដ្ឋកិច្ច។ ដូចនេះជាទ្រឹស្ដី រដ្ឋអាចគ្រប់គ្រងតម្លៃរូបិយបណ្ណជាតិ ដើម្បីកុំឲ្យមានវិបត្តិសេដ្ឋកិច្ច។
តែផ្ទុយមកវិញ សព្វថ្ងៃរដ្ឋពុំមានលទ្ធភាពធំធេងដូចនោះ ព្រោះតែសន្ធឹកនៃប្រាក់ដុល្លារក្នុងសកម្មភាពសេដ្ឋកិច្ចរបស់កម្ពុជា។ ដូចនេះតម្លៃប្រាក់ដុល្លារប្រាកដជាមានឥទ្ធិពលដល់ថ្លៃទំនិញ និងសុខទុក្ខសេដ្ឋកិច្ចរបស់កម្ពុជា ព្រោះកម្ពុជាចាយលុយរបស់គេច្រើន។ ហើយប្រាក់ដុល្លារនេះ ឬប្រាក់បរទេសដទៃទៀត មិនស្ថិតក្រោមការគ្រប់គ្រងរបស់កម្ពុជាឡើយ។
បើពន្យល់ឲ្យសាមញ្ញជាងនេះ រដ្ឋ ទោះបីគ្រប់គ្រង់លុយរបស់ជាតិបានល្អ ក៏មានឥទ្ធិពលតិចតួចដល់សេដ្ឋកិច្ច ព្រោះប្រាក់រៀលចរាចរតិចពេក តែបើចង់គ្រប់គ្រងលើលុយបរទេសដែលមានឥទ្ធិពលធំដល់សេដ្ឋកិច្ច រដ្ឋក៏គ្មានសមត្ថកិច្ចដែរ។
ជំរុញពាណិជ្ចកម្ម ៖
បើកម្ពុជាចាយប្រាក់រៀលខ្លាំង រដ្ឋមានអំណាចបន្ថយតម្លៃប្រាក់រៀល ដើម្បីជំរុញការនាំចេញ ។ ឧទាហរណ៍ បើខោមួយផលិតអស់ ៤០០០រៀល ហើយអត្រាប្ដូរប្រាក់ ១ដុល្លារ ស្នើ ៤០០០រៀល។ នោះអាមេរិកចាយ១ដុល្លារដើម្បីទិញខោមួយពីកម្ពុជា។ តែបើប្រាក់រៀលកាន់តែថោក ១ដុល្លារ ស្មើ ៤២០០រៀល នោះអាមេរិកចំណាយមិនដល់ ១ដុល្លារផង អាចទិញខោបានហើយ។ តម្លៃខោកាន់តែទាប អ្នកប្រើប្រាស់អាចទិញកាន់តែច្រើន ដែលជំរុញការនាំចេញ។
តែធាតុចូលផលិតកម្មនៅកម្ពុជា ដូចជាវត្ថុធាតុដើម និងប្រាក់ឈ្នួល ត្រូវបានគិតជាប្រាក់ដុល្លារអាមេរិក ដូចនេះការធ្លាក់ថ្លៃនៃប្រាក់រៀលនឹងមិនមានឥទ្ធិពលលើថ្លៃទំនិញនាំចេញនោះទេ ដែលធ្វើឲ្យកម្ពុជាបាត់បង់ឱកាសជំរុញការនាំចេញ តាមវិធីនេះ។
បន្ទាបអត្រាការប្រាក់៖
ប្រទេសដែលចាយលុយរបស់គេផ្ទាល់ នោះធនាគារកណ្ដាលនឹងមានឥទ្ធិពលដល់អត្រាការប្រាក់។ ព្រោះថា ធនាគារកណ្ដាលជាប្រភពទុនដ៏សំខាន់របស់គ្រឹះស្ថានផ្ដល់កម្ចី។ ធនាគារកណ្ដាលអាចញាក់ឲ្យអត្រាការប្រាក់ទាប ដែលជាការល្អសម្រាប់វិនិយោគិន និងពលរដ្ឋ។
តែផ្ទុយមកវិញ ធនាគារជាតិកម្ពុជាអាចផ្ដល់កម្ចីដល់គ្រឹះស្ថានសម្រាប់តែប្រាក់រៀលប៉ុណ្ណោះ ខណៈដែលតម្រូវការកម្ចីប្រាក់ដុល្លារមានចំនួនលើសលុប។ នេះហើយជាគុណវិបត្តិមួយចំពោះអ្នកជំនួញ និងកសិករ ដែលត្រូវខ្ចីប្រាក់ក្នុងអត្រាការប្រាក់ខ្ពស់។
មួយវិញទៀត ការពឹងផ្អែកជោគវាសនាលើដុល្លារអាមេរិក ធ្វើឲ្យអត្រាការប្រាក់សម្រាប់កម្ចីជាប្រាក់រៀលខ្ពស់ជាងកម្ចីជាដុល្លារ ដែលជាផលអាក្រក់ដល់ប្រជាជននៅទីជនបទដែលត្រូវការកម្ចីប្រាក់រៀល។ ព្រោះថា គ្រឹះស្ថានផ្ដល់កម្ចី ត្រូវប្ដូរប្រាក់ដុល្លារ ដែលខ្លួនបានមកពីប្រភពផ្សេងៗទៅជាប្រាក់រៀលសម្រាប់ពលរដ្ឋមួយចំនួន។ គ្រឹះស្ថានទាំងនេះត្រូវប្រឈមនឹងហានិភ័យនៃការប្ដូរប្រាក់ ដូចនេះពួកគេកំណត់អត្រាការប្រាក់កម្ចីជាប្រាក់រៀលខ្ពស់។
កាត់បន្ថយចំណាយប្រតិបត្តិការរបស់អាជីវករ៖
ការចរាចរលុយកាក់ចម្រុះបែបនេះ ធ្វើអ្នកលក់ និងអ្នកទិញ ត្រូវខាតពេលវេល និងការចំណាយលើអត្រាប្ដូរប្រាក់ ដើម្បីប្ដូរក្រដាសប្រាក់ពីមួយទៅមួយសម្រាប់ការទូទាត់ទំនិញរបស់ខ្លួន។ តែបើការចាយវាយត្រូវបានធ្វើឡើងជាប្រាក់រៀលតែមួយ នោះនឹងបង្កភាពងាយស្រួលដល់ប្រតិបត្តិការអាជីវកម្ម និងមិនរងហានិភ័យនៃអត្រាប្ដូរប្រាក់ឡើយ។
គរពូនទុនបម្រុងអន្តរជាតិ៖
សម្រាប់ប្រទេសដែលលុយជាតិត្រូវបានប្រើប្រាស់ជាទូទៅ លុយបរទេសដែលហូរចូលក្នុងប្រទេស ត្រូវប្ដូរទៅលុយជាតិសិន មុននឹងចូលក្នុងសកម្មភាពសេដ្ឋកិច្ចក្នុងស្រុក។ ធនាគារកណ្ដាលមានតួនាទីស្រូបយកលុយបរទេសទាំងនោះ។
ប្រមូលទុនបម្រុងអន្តរជាតិកាន់តែច្រើន បង្កើនការទុកចិត្តលើប្រាក់រៀល។ ព្រោះថា ធនាគារជាតិអាចយកទុនបម្រុងទាំងនោះ យកទៅអន្តរាគមន៍ក្នុងទីផ្សារប្ដូរប្រាក់ ដើម្បីកាត់បន្ថយការប្រែប្រួលខ្លាំងរបស់អត្រាប្ដូរប្រាក់។
រដ្ឋាភិបាលអាចបង្កើនការវិនិយោគសាធារណច្រើនជាងមុន និងកាត់បន្ថយកម្ចីបរទេស៖
បច្ចុប្បន្ន រដ្ឋាភិបាលប្រមូលចំណូលថវិកាជាតិជាប្រាក់រៀល ប៉ុន្តែចំណាយលើហេដ្ឋារចនាសម្ព័ន្ធ និងគម្រោងអភិវឌ្ឍន៍ផ្សេងទៀតជាលុយដុល្លារ។ ដូចនេះ បើទោះបីមានយន្តការមួយ ដែលអាចឲ្យរដ្ឋាភិបាលខ្ចីប្រាក់ពីក្នុងស្រុកយកទៅវិនិយោគសាធារណៈ តាមរយៈការបោះបណ្ណបំណុលជាដើមក៏ដោយ ក៏រដ្ឋាភិបាលមិនអាចធ្វើបែបនេះបានដែរ ព្រោះនឹងធ្វើឲ្យតម្រូវការប្រាក់ដុល្លារកាន់តែច្រើនក្នុងសេដ្ឋកិច្ចកម្ពុជា។
តែបើនៅកម្ពុជាចាយប្រាក់រៀលច្រើន រដ្ឋាភិបាលអាចពិចារណាបោះបណ្ណបំណុលចារឹកជាប្រាក់រៀលលើទីផ្សារ ដែលនឹងកាត់បន្ថយកម្ចីពីក្រៅប្រទេស។
ខ្លឹមសារនៃការបកស្រាយខាងលើ ត្រូវបានដកស្រង់មួយផ្នែកធំពីកូនសៀវភៅកម្រាស់ ២១ទំព័ររបស់ធនាគារជាតិនៃកម្ពុជា ដែលមានចំណងជើងថា សារៈសំខាន់នៃប្រាក់រៀលសម្រាប់កម្ពុជា៕
សូមចុចត្រង់នេះដើម្បីអានថ្មីៗជាភាសាអង់គ្លេស (Cambodianess.com)
Tag:
ប្រាក់រៀល
© រក្សាសិទ្ធិដោយ thmeythmey.com
អត្ថបទពេញនិយម
តើពាក្យ «សិទ្ធិ, សិទ្ធ» ប្រើខុសគ្នាដូចម្តេច?
3 ថ្ងៃ
កម្ពុជា នឹងមានភ្លៀងធ្លាក់ ពីថ្ងៃទី៤-៦ឧសភា
4 ថ្ងៃ
«ស្មើរនេះ», «ថ្មើរនេះ» និង«ថ្មារនេះ» មួយណាត្រូវ?
ភ្នំពេញ
5 ថ្ងៃ
តើពាក្យងារជា «សម្តេច» មានន័យដូចម្តេច?
1 សប្តាហ៍
«នាំអាត» និង«នាំអាទិ៍»មួយណាត្រឹមត្រូវ?
50 វិនាទី
អត្ថបទពេញនិយមបន្ថែម