អន្តរជាតិ
អាបេ ទៅជួប ត្រាំ សុំឲ្យលើករឿងចាប់ជំរិតជនជាតិជប៉ុនក្នុងជំនួបជាមួយមេដឹកនាំកូរ៉េខាងជើង នាយករដ្ឋមន្រ្តីជប៉ុន និងប្រធានាធិបតីអាមេរិកនាជំនួបកន្លងមក (រូបភាព AFP)
× នាយករដ្ឋមន្ត្រីជប៉ុន ស៊ីនហ្សូ អាបេ នឹងធ្វើដំណើរទៅកាន់អាមេរិកនៅពាក់កណ្ដាលខែមេសានេះ ដើម្បីជជែកជាមួយប្រធានាធិបតីអាមេរិក ដូណាល់ ត្រាំ ជុំវិញគម្រោងជំនួបរវាងលោក ត្រាំ និងមេដឹកនាំកូរ៉េខាងជើង គីម ជុងអ៊ុន ។ ក្នុងដំណើរលើកនេះ លោក អាបេ នឹងស្នើឲ្យលោក ត្រាំ បញ្ចូលសំណុំរឿងចាប់ជំរិតជនជាតិជប៉ុនពីសំណាក់កូរ៉េខាងជើងទៅជជែកជាមួយលោក គីម ។ ជំនួបត្រាំ-គីម គ្រោងធ្វើនៅខែឧសភា។
ជប៉ុន ត្រូវបានគេមើលឃើញថា ហាក់ត្រូវបានទុកឲ្យនៅមួយឡែកក្នុងទំនាក់ទំនងរវាងអាមេរិក និងកូរ៉េខាងជើង ខណៈលោកប្រធានាធិបតី ដូណាល់ ត្រាំ ដូចជាមិនសូវខ្វល់ខ្វាយពីជប៉ុនឡើយចំពោះមុខការផ្លាស់ប្ដូរកាយវិការរបស់កូរ៉េខាងជើងនោះ។ លោក ត្រាំ បានផ្ដោតការយកចិត្តទុកខ្លាំងលើកូរ៉េខាងជើងដូចជាយល់ព្រមជួបមេដឹកនាំកំពូល គីម ជុងអ៊ុន ជាដើម ដែលរឿងនេះធ្វើមានការបារម្ភថា ក្រុងវ៉ាស៊ីនតោនអាចឃ្លាតចេញពីក្រុងតូក្យូ។
ទំនងជាខ្លាចអាមេរិកចរចាជាមួយកូរ៉េខាងជើងដោយមិនបានគិតគូរដល់សម្ព័ន្ធមិត្តអាស៊ីនេះ នាយករដ្ឋមន្ត្រីជប៉ុន ស៊ីនហ្សូ អាបេ បានប្រញាប់ប្រញាល់ទៅកាន់អាមេរិកឲ្យមុនជំនួបមេដឹកនាំអាមេរិក និងកូរ៉េខាងជើង។ បើតាមទីភ្នាក់ងារ Reuters លោក អាបេ ប្រកាសថា លោកនឹងធ្វើទស្សនកិច្ចនៅអាមេរិកចាប់ពីថ្ងៃទី១៧ ដល់ថ្ងៃទី២០ ខែមេសា ដើម្បីជួបពិភាក្សាជាមួយលោក ត្រាំ ។ បញ្ហាកូរ៉េខាងជើងចាប់ជំរិតពលរដ្ឋជប៉ុន គឺជាប្រធានសំខាន់ក្នុងដំណើររបស់លោក អាបេ ។
នាយករដ្ឋមន្ត្រីជប៉ុន ដែលកំពុងធ្លាក់ចុះប្រជាប្រិយភាព ចង់ឲ្យលោក ត្រាំ លើកយកសំណុំរឿងចាប់ជំរិតនេះក្នុងជំនួបជាមួយលោក គីម ជុងអ៊ុន ។ សំណុំរឿងនេះ គឺជាការទាមទាររបស់ជប៉ុនតាំងពីដើមមកក្នុងការចរចាណាមួយជាមួយកូរ៉េខាងជើង ប៉ុន្តែអាមេរិកមិនសូវយកចិត្តទុកដាក់លើបញ្ហានេះឡើយ។ ក្រុងតូក្យូពិតជាមិនសប្បាយចិត្តឡើយ ដ្បិតបញ្ហាភ័យព្រួយរបស់ខ្លួនមិនសូវទទួលបានការចាប់អារម្មណ៍ឡើយ។
ក្នុងឆ្នាំ២០០២ កូរ៉េខាងជើងសារភាពថា ខ្លួនបានចាប់ជំរិតជនជាតិជប៉ុនចំនួន១៣នាក់ក្នុងទសវត្សរ៍ទី៧០ និងទី៨០ ដើម្បីបង្ហាត់ជាចារកម្ម។ ប៉ុន្តែក្រុងតូក្យូអះអាងថា ជនជាតិជប៉ុនចំនួន១៧នាក់ត្រូវភ្នាក់ងារសម្ងាត់កូរ៉េខាងជើងចាប់យកទៅ ហើយក្នុងនោះ ៥នាក់បានត្រឡប់ចូលប្រទេសវិញក្នុងឆ្នាំ២០០២ ។ ក្រុងតូក្យូចង់បានការស៊ើបអង្កេតស៊ីជម្រៅមួយពាក់ព័ន្ធរឿងនេះ ក៏ដូចជាស្រាវជ្រាវរកពលរដ្ឋដែលនៅតែបាត់ខ្លួន។
ជាការកត់សម្គាល់ ជប៉ុនដែលជាតួអង្គសំខាន់មួយក្នុងវិបត្តិកូរ៉េខាងជើង ហាក់នៅឯកោតែឯង ខណៈតួអង្គផ្សេងទៀតសកម្មខ្លាំង។ លោក គីម ជុងអ៊ុន បានជួបរួចហើយជាមួយមេដឹកនាំចិន ស៊ី ជិនភីង ។ នៅថ្ងៃទី២៧ ខែមេសា មេដឹកនាំកូរ៉េខាងជើងរូបនេះនឹងបន្តជួបប្រធានាធិបតីកូរ៉េខាងត្បូង មូន ចេអ៊ីន មុននឹងជួបជាមួយលោក ត្រាំ នៅចុងខែឧសភា។ នៅមុននេះ ជប៉ុនក៏បានបង្ហាញបំណងរៀបចំជំនួបរវាងលោក អាបេ និងលោក គីម ដែរ៕
Tag:
អាមេរិក
ជប៉ុន
កូរ៉េខាងជើង
ដូណាល់ ត្រាំ
ស៊ីនហ្សូ អាបេ
គីម ជុងអ៊ុន
© រក្សាសិទ្ធិដោយ thmeythmey.com