កីឡាអន្តរជាតិ
អន្តរជាតិ
Zidane បដិសេធមិនទៅដឹកនាំ Juventus មុនជំនួប Juventus-Real Madrid នៅ UCL
× លោក Zinedine Zidane អ្នកចាត់ការទូទៅក្រុម Real Madrid បានបដិសេធទៅដឹកនាំ Juventus នៅថ្ងៃអនាគត ខណៈដែលក្រុមទាំងពីរត្រៀមជួបគ្នានៅក្នុងក្របខណ្ឌ UEFA Champions League វគ្គ ១/៤ ផ្តាច់ព្រ័ត្រជើងទីមួយ។
Juventus នឹងបើកទ្វារស្វាគមន៍ Real Madrid ក្នុងទឹកដី Allianz Stadium នារាត្រីថ្ងៃអង្គារ ទី៣ ខែមីនា វេលាម៉ោង ១:៤៥នាទី [ម៉ោងនៅកម្ពុជា] សម្រាប់វគ្គ ៨ក្រុមចុងក្រោយ និងជាការប្រកួតសងសឹកបន្ទាប់ពីក្រុមរបស់លោក Massimiliano Allegri បានរងបរាជ័យក្រោមថ្វីជើងរបស់ក្រុមរហស្សនាមអធិរាជសរនៅវគ្គផ្តាច់ព្រ័ត្រពានកំពូលអឺរ៉ុបនេះកាលពីរដូវកាលមុន។
មុនពេលប៉ះគ្នារវាងក្រុមទាំងពីរ អ្នកចាត់ការសញ្ជាតិបារាំង វ័យ៤៥ឆ្នាំ ដែលធ្លាប់លើកពាន Serie A ពីរដងក្នុងនាមជាកីឡាកររបស់ក្រុមរហស្សនាមសេះបង្កង់ចន្លោះឆ្នាំ ១៩៩៦-២០០១ បានច្រាលចោលការផ្លាស់ទៅដឹកនាំក្រុមនៅអ៊ីលីនេះនាពេលអានាគត។
«ជាអ្នកចាត់ការ Juventus នៅថ្ងៃណាមួយ? ខ្ញុំមិនដែលនិយាយថាទេ ប៉ុន្តែខ្ញុំសប្បាយចិត្តនូវអ្វីដែលខ្ញុំមាននៅពេលនេះ»។ នេះជាការលើកឡើងរបស់ Zidane មុនជំនួបជាមួយ Turin ជើងទី១ វគ្គ១/៤ចុងក្រោយ។
Zidane កំពុងផ្តោតខ្លាំងដើម្បីនាំ Real Madrid លើកពាន Champions League ៣ឆ្នាំជាប់គ្នា បន្ទាប់ពីការប្រជែងពានក្នុងស្រុក La Liga សម្រាប់រដូវកាលនេះបានឃ្លាតឆ្ងាយទៅហើយ។
ម្ចាស់ជើងឯកឆ្នាំចាស់ តាមពីក្រោយក្រុមកំពូលតារាង Barcelona រហូត១៣ពិន្ទុ នៃក្របខណ្ឌកំពូលអេស្ប៉ាញ ខណៈការប្រកួតសល់តែ ៨លើកទៀតប៉ុណ្ណោះ។ ចំណែកពាន Copa del Rey ក៏ក្រុមនេះអស់ឱកាសដែរ។
ដោយឡែក ការជួបគ្នាមួយគូទៀតរវាម្ចាស់ផ្ទះ Sevilla និង Bayern Munich ក៏នឹងធ្វើឡើងនៅម៉ោងដំណាលគ្នានេះដែរ សម្រាប់ការប្រកួតជើងទី១ វគ្គ៨ចុងក្រោយ៕
Tag:
បាល់ទាត់
UEFA Champions League
Zinedine Zidane
Real Madrid
© រក្សាសិទ្ធិដោយ thmeythmey.com