ក្រុមកីឡាបាល់ទាត់ជម្រើសជាតិក្រូអាស៊ី បានកៅអីឆ្ពោះទៅរុស្ស៊ីសម្រាប់ការប្រកួតពានរង្វាន់ FIFA World Cup ឆ្នាំ២០១៨ ត្រូវជួបជាមួយក្រុមខ្លាំងអាហ្សង់ទីន អ៊ីស្លង់ និងនីហ្សេរីយ៉ា ក្នុងវគ្គសន្សំពិន្ទុពូល D។ ក្រុមមកពីទ្វីបអឺរ៉ុបមួយនេះធ្លាប់បង្ហាញខ្លួន ៤លើករួចមកហើយ ចាប់តាំងពីចូលរួមដំបូងឆ្នាំ១៩៩៨។
គ្រូបង្វឹក៖ លោក Zlatko Dalic (ក្រូអាស៊ី)
ក្រោយពីបានឡើងជំនួសលោក Ante Cacic ជាអ្នកចាត់ការក្រូអាស៊ីនៅខែតុលាឆ្នាំ ២០១៧ លោក Dalic បាននាំក្រុមដែលស្ថិតនៅតំបន់បាល់កង់មួយនេះឆ្ពោះទៅ World Cup នៅរុស្ស៊ី តាមរយៈការប្រកួតមួយដែលពួកគេបានផ្តួលក្រិក ៤-១ ក្នុងវគ្គជម្រុះ Play-off។
មុនឡើងកាន់តំណែងនេះ អ្នកចាត់ការវ័យ៥១ឆ្នាំខាងលើក៏ធ្លាប់ជួយក្លិប Al-Ain នៃលីកកំពូលអេមីរ៉ាតអារ៉ាប់រួម ឈានដល់វគ្គផ្តាច់ព្រ័ត្រ AFC Champions League កាលពីឆ្នាំ២០១៦ផងដែរ។
កីឡាករឆ្នើម៖ Luka Modric
ថ្មីៗនេះវីរបុរស AC Milan លោក Andriy Shevchenko បានសរសើរ Modric ថា ជា«ខ្សែបម្រើកណ្តាលដ៏ល្អបំផុតមួយរូបលើកលោក»។ អតីតសមាជិក Tottenham Hostspur វ័យ៣២ឆ្នាំរូបនេះ បានជួយ Real Madrid ឈ្នះ Champions League ៣លើក ព្រមទាំងជួយក្រូអាស៊ីបានកៅអីទៅរុស្ស៊ីឆ្នាំ២០១៨ទៀតផង។
ប្រវត្តិក្នុង World Cup៖
នេះជាវត្តមានលើកទី៤ សម្រាប់ក្រុមជម្រើសជាតិក្រូអាស៊ី បន្ទាប់ពីបង្ហាញខ្លួនលើកដំបូងក្នុងឆ្នាំ ១៩៩៨ និងចុងក្រោយឆ្នាំ ២០១៤។ លទ្ធផលល្អបំផុតដែលពួកគេធ្វើបាន គឺទទួលបានចំណាត់ថ្នាក់ទី៣ នៃពានរង្វាន់ World Cup កាលពីឆ្នាំ១៩៩៨ ដែលបារាំងធ្វើជាម្ចាស់ផ្ទះ។ ក្រូអាស៊ី ឈរនៅចំណាត់ថ្នាក់ទី ១៧ ពិភពលោកក្នុងតារាង FIFA Ranking។
កម្មវិធីប្រកួត៖
- ១៧មិថុនា៖ ក្រូអាស៊ី Vs នីហ្សេរីយ៉ា (ម៉ោង ២រំលងអធ្រាត្រ ម៉ោងនៅកម្ពុជា)
- ២២មិថុនា៖ អាហ្សង់ទីន Vs ក្រូអាស៊ី (ម៉ោង ១ រំលងអធ្រាត្រ)
- ២៧មិថុនា៖ អ៊ីស្លង់ Vs ក្រូអាស៊ី (ម៉ោង ១ រំលងអធ្រាត្រ)