អន្តរជាតិ
សង្គ្រាមពាណិជ្ជកម្មជាមួយចិន? លោក ត្រាំ ថា អាមេរិកចាញ់ចិនច្រើនឆ្នាំហើយ រូបភាព AFP
× រយៈពេលចុងក្រោយ អាមេរិក និងចិនបានដំឡើងពន្ធនាំចូលលើផលិតផលរបស់គ្នាទៅវិញទៅមក។ សកម្មភាពរបស់មហាអំណាចសេដ្ឋកិច្ចពិភពលោកលំដាប់ទីមួយ និងទីពីរ ធ្វើឲ្យគេឯងបារម្ភថា ជម្លោះពាណិជ្ជកម្មអាចផ្ទុះពេញបន្ទុកមិនខាន។ ប៉ុន្តែប្រធានាធិបតីអាមេរិក ដូណាល់ ត្រាំ បែរជានិយាយថា ស្ថានភាពបច្ចុប្បន្នមិនមែនអាមេរិកធ្វើសង្គ្រាមពាណិជ្ជកម្មជាមួយចិនឡើយ តែអាមេរិកបានចាញ់ចិនយូរឆ្នាំមកហើយ។
នៅថ្ងៃទី៤ ខែមេសា ប្រធានាធិបតីអាមេរិក ដូណាល់ ត្រាំ បានទាត់ចោលការព្រួយបារម្ភជុំវិញសង្គ្រាមពាណិជ្ជកម្មដែលអាចផ្ទុះឡើងរវាងអាមេរិក និងចិន។ អាមេរិកបានបង្កើនពន្ធលើផលិតផលរបស់ចិនរាប់សិបមុខ ដែលជាផ្នែកនៃយុទ្ធនាការរបស់លោក ត្រាំ ក្នុងការកាត់បន្ថយឱនភាពពាណិជ្ជកម្មជាមួយចិន។ ឯចិនវិញក៏មិនបាននៅស្ងៀមឡើយ និងបានចាត់វិធានការដំឡើងពន្ធលើទំនិញរបស់អាមេរិកដូចគ្នាដែរ។
តាមរយៈបណ្ដាញសង្គម Twitter របស់ខ្លួន លោក ត្រាំ អះអាងថា អាមេរិកមិនស្ថិតក្នុងសង្គ្រាមជាមួយចិនឡើយ តែអាមេរិកបានចាញ់សង្គ្រាមនេះជាច្រើនឆ្នាំមកហើយ។ ប្រធានាធិបតីអាមេរិករូបនេះបានបន្ទោសរដ្ឋបាលប្រធានាធិបតីមុនៗ ដែលគ្មានសមត្ថភាព និងឆ្កួតលីលា។ លោក ត្រាំ បានលើកយកឱនភាពពាណិជ្ជកម្មទំហំ៥០០ពាន់លានដុល្លារក្នុងមួយឆ្នាំ និងចោទចិនថា បានលួចយកកម្មសិទ្ធិបញ្ញាពីក្រុមហ៊ុនអាមេរិក ដែលមានទំហំដល់ទៅ៣០០ពាន់ដុល្លារ។ លោកនឹងមិនអនុញ្ញាតឲ្យរឿងបែបនេះបន្តកើតឡើងឡើយ។
ការលើកឡើងខាងលើរបស់លោក ត្រាំ អាចកាត់បន្ថយការបារម្ភខ្លះក្នុងចំណោមក្រុមហ៊ុនរកស៊ីប្រទេសទាំងពីរ។ យ៉ាងណាមិញ ការប្រកាន់ជំហរដាច់ខាតក្នុងការដោះស្រាយឱនភាពពាណិជ្ជកម្មឲ្យបាន គឺជាបញ្ហាប្រឈមមួយក្នុងទំនាក់ទំនងសេដ្ឋកិច្ចទ្វេភាគី ខណៈដែលចិនចំណេញច្រើនមែនទែនក្នុងការរកស៊ីជាមួយចិន។
ការដំឡើងពន្ធលើទំនិញចិន និងការចេញផ្សាយបញ្ជីទំនិញដែលប្រឈមមុខការបង់ពន្ធដ៏ច្រើន គឺជាវិធានការមួយក្នុងការដោះស្រាយអតុល្យភាពជញ្ជីងពាណិជ្ជកម្មដែលផ្អៀងទៅខាងចិន។ លោក ត្រាំ អះអាងថា ស្ថានភាពសព្វថ្ងៃមិនអាចនៅដដែលឡើយ ហើយក៏មិនអាចបណ្ដោយឲ្យក្រុមហ៊ុនអាមេរិកទៅរកស៊ីនៅចិន ត្រូវផ្ទេរបច្ចេកវិទ្យារបស់ខ្លួនទៅឲ្យចិន ដែលការណ៍នេះជួយឲ្យចិនយកឈ្នះអាមេរិកក្នុងទីផ្សារដែលមិនយុត្តិធម៌ទៅទៀត។
គោលដៅរបស់លោក ត្រាំ គឺផ្លាស់ប្ដូរប្រព័ន្ធសេដ្ឋកិច្ចបច្ចុប្បន្នដែលលោកជឿថា ធ្វើឲ្យអាមេរិកខាតបង់ជាច្រើនពាន់លានដុល្លារក្នុងមួយឆ្នាំៗ តែដៃគូរបស់អាមេរិកបែរជាទទួលបានប្រយោជន៍សន្ធឹកសន្ធាប់ទៅវិញ។ ជំនួសមកវិញ លោក ត្រាំ ចង់បានប្រព័ន្ធពាណិជ្ជកម្មមួយដែលយុត្តិធម៌ មានទៅមានមក និងមានតុល្យភាពក្នុងចំណោមប្រទេសនានា៕
Tag:
អាមេរិក
ចិន
ដូណាល់ ត្រាំ
សង្គ្រាមពាណិជ្ជកម្ម
© រក្សាសិទ្ធិដោយ thmeythmey.com