ជាតិ
នយោបាយជាតិ
អ្នកនាំពាក្យ៖ រដ្ឋាភិបាល មានបំណងរៀបចំច្បាប់កំហិតទោសអ្នកបង្កើតព័ត៌មានមិនពិត
×![]()
ភ្នំពេញ៖ កម្ពុជា នឹងមានច្បាប់ដាក់ទោសអ្នកបង្កើតព័ត៌មានមិនពិត នាពេលខាងមុខ។ នេះបើតាមអ្នកនាំពាក្យគណបក្សប្រជាជនកម្ពុជា ដែលបានសន្និដ្ឋានលើគោលបំណងរបស់រដ្ឋាភិបាល ក្រោយពីជំនួបជាមួយនាយករដ្ឋមន្ត្រីវៀតណាម ង្វៀន សួនហ្វ៊ុក។
ក្នុងជំនួបពិភាក្សាគ្នានោះ លោកនាយករដ្ឋមន្ត្រីវៀតណាម បានស្នើសុំឲ្យសម្ដេច ហ៊ុន សែន បន្តកិច្ចសហប្រតិបត្តិការបន្ថែមទៀត ក្នុងការផ្លាស់ប្តូរព័ត៌មានគ្នាឲ្យកាន់តែខ្លាំងក្លា ដើម្បីចៀសវាងការទទួលព័ត៌មានមិនពិត។ ត្រង់ចំណុចនេះលោក សុខ ឥសាន អ្នកនាំពាក្យគណបក្សប្រជាជន បាននិយាយថា កម្ពុជាអាចមានច្បាប់ដាក់ទោសអ្នកបង្កើនព័ត៌មានមិនពិត ដើម្បីការពារសន្តិសុខ និងសុវត្ថិភាពប្រជាជលរដ្ឋ។ ជាពិសេសរក្សាទំនាក់ទំនងជាមួយប្រទេសជិតខាង ដូចជាវៀតណាមជាដើម។ ទស្សនរបស់លោក សុខ ឥសាន នេះ គឺផ្ដោតទៅលើកិច្ចពិភាក្សារបស់នាយករដ្ឋមន្ត្រីប្រទេសទាំងពីរ។
ថ្លែងប្រាប់សារព័ត៌មានថ្មីៗ លោក សុខ ឥសាន បានបង្ហើបយ៉ាងដូច្នេះថា៖«បើតាមខ្ញុំមើលទៅ ការពិភាក្សាគ្នារវាងនាយករដ្ឋមន្ត្រីកម្ពុជា-វៀតណាម ពីរឿងបញ្ហាព័ត៌មានមិនពិត គឺមានន័យថា ប្រមុខរដ្ឋាភិបាលទាំងពីរចង់ឲ្យមានការទប់ស្កាត់ព័ត៌មានក្លែងក្លាយ(Fake News)ហើយ។ ដូច្នេះខ្ញុំយល់ថា ឲ្យតែប្រមុខរដ្ឋាភិបាលទាំងពីរលើកឡើងបែបនេះហើយ ខ្ញុំជឿថា ប្រាកដជាក្រុមប្រឹក្សាច្បាប់ នឹងសិក្សា ឬពិភាក្សាគ្នា ផ្នែកច្បាប់ ដើម្បីធ្វើសេចក្ដីព្រាងច្បាប់ ដាក់ទៅស្ថាប័នពាក់ព័ន្ធពិនិត្យពិភាក្សា ដើម្បីយកមកអនុវត្តហើយ»។
បើមានការដាក់កំហិតទោសមែន តើរូបភាព ឬព័ត៌មានបែបណា ដែលចាត់ទុកជាព័ត៌មានមិនពិត (Fake News) ? លោក សុខ ឥសាន មិនទាន់អាចបញ្ជាក់ឲ្យច្បាស់ពីចំណុចនេះបានទេ ព្រោះវាអាស្រ័យលើក្រុមប្រឹក្សាច្បាប់។ «ខ្ញុំពិបាកឆ្លើយបន្តិចព្រោះខ្ញុំមិនដឹងថា តើច្បាប់នេះនឹងមានស្ដង់ដាបែបណាទេ ប៉ុន្តែអ្វីខ្ញុំយល់នោះ សេចក្តីព្រាងច្បាប់ដែលតាក់តែងឡើង វាគួបផ្សំតែពីស្ថានភាពបរិបទនៅក្នុងប្រទេសកម្ពុជាប៉ុណ្ណោះ»។ នេះបើតាមលោក សុខ ឥសាន ដែលបានបន្ថែមថា សេចក្តីផ្ដួចផ្ដើមរបស់ប្រមុខរដ្ឋាភិបាលកម្ពុជា-វៀតណាម ពីរឿងព័ត៌មានមិនពិតនេះ គឺជាចំណុចល្អ ដើម្បីរក្សាស្ថេរភាព និងសន្ដិភាពអារម្មណ៍របស់ប្រជាពលរដ្ឋ ដើម្បីប្រឆាំងនិងក្រុមដែលតែងតែប្រឆាំងរដ្ឋាភិបាល ហើយបង្កើតព័ត៌មានក្លែងក្លាយ។
សម្រាប់លោក សន ជ័យ នាយកអង្គការសម្ព័ន្ធគណនេយ្យភាពសង្គមកម្ពុជា ហៅកាត់ថា ANSA យល់ថា ការរៀបចំសេចក្តីព្រាងច្បាប់ ឬច្បាប់ ទាក់ទងនឹងការកំហិតទោស អ្នកបង្កើតព័ត៌មានក្លែងក្លាយនោះ វាមិនទាន់ជារឿងចាំបាច់ សម្រាប់ប្រទេសកម្ពុជានៅឡើយទេ ខណៈដែលកម្ពុជានៅមានបញ្ញត្តិក្នុងក្រមព្រហ្មទណ្ឌ ដែលអាចយកមកអនុវត្តបាន។
«ខ្ញុំយល់ថាព័ត៌មានក្លែងក្លាយវាឧបករណ៍បំពុលការពិត។ ប៉ុន្តែអ្វីដែលយើងព្រួយបារម្ភនោះ ថាតើការអនុវត្តច្បាប់ បើមានច្បាប់ហើយ តើវាមានផលប៉ះពាល់អ្វីខ្លះ ដល់សិទ្ធិសេរីភាពសម្ដែងមតិ ខណៈពេលដែលការអនុវត្តច្បាប់ ចំណុចខ្លះត្រូវបានគេមើលឃើញថា ការអនុវត្តច្បាប់មានស្ដង់ដារពីរ។ ដូច្នេះព័ត៌មានខ្លះ វាជាព័ត៌មានពិត ក៏ប៉ុន្តែវាក៏បែជាមានការសន្និដ្ឋានណាមួយថា វាជាព័ត៌មានមិនពិតវិញ ដូច្នេះវាអាចបង្កឲ្យអ្នកចេញព័ត៌មានពិតទៅជាអ្នករងគ្រោះវិញ។ ចំណុចនេះខ្ញុំយល់ថា កម្រិតនៃក្រមសីលធម៌នៃអ្នកបញ្ចេញព័ត៌មាន ហើយនឹងការអប់រំទូន្មានកម្រិតរដ្ឋបាល វាជារឿងមួយល្អ ព្រោះយើងបារម្ភទៅសិទ្ធិ ជាពិសេសរឿងស្ដង់ដារនៃការអនុវត្តច្បាប់»។ នេះជាការយល់ឃើញរបស់លោក សន ជ័យ។
អ្នកនាំពាក្យក្រសួងយុត្តិធម៌ លោក ជិន ម៉ាលីន បាននិយាយថា ក្រសួងមិនទាន់ទទួលព័ត៌មានជុំវិញគោលបំណងចង់បង្កើតច្បាប់ដាក់កំហិតអ្នកបញ្ចេញព័ត៌មានក្លែងក្លាយនៅឡើយទេ ។ ប៉ុន្តែអ្វីដែលលោក អាចបញ្ជាក់បាននោះ គឺបច្ចុប្បន្នកម្ពុជា មានបញ្ញត្តិមួយចំនួន ដាក់ទោសអ្នកបង្កើតព័ត៌មានប្រឌិត ឬក្លែងក្លាយ ដែលមានចែងនៅក្នុងក្រមព្រហ្មទណ្ឌកន្លងមក។
អ្នកនាំពាក្យរូបនេះ បានបញ្ជាក់ដូច្នេះថា៖« ឥឡូវនេះយើងមិនទាន់មានគម្រោង ឬផែនការនៃការរៀបចំច្បាប់ទេ ប៉ុន្តែទៅទៀតអាចមានយ៉ាងណានោះ ខ្ញុំមិនទាន់ច្បាស់ដែរ។ ប៉ុន្តែគ្រាន់តែថា បច្ចុប្បន្នបញ្ញត្តិច្បាប់យើង មានលក្ខណៈច្បាប់មួយចំនួនក្នុងការដាក់ទោស អ្នកដែលបង្ហោះព័ត៌មានមិនពិត (Fake News) ក្នុងចេតនាបំផ្លាញសន្តិសុខជាតិ ឬសណ្ដាប់ធ្នាប់សាធារណៈ ឬក៏ទំនាក់ទំនងការទូតជាមួយបណ្ដាប្រទេសជិតខាង ។ ដូច្នេះយើងមានបញ្ញត្តិក្នុងការទប់ស្កាត់ដាក់ទោសទណ្ឌនេះហើយ ប៉ុន្តែនៅពេលខាងមុខ ក្រែងលោយើងមានចង់ច្បាប់ពិសេស ដើម្បីគ្រប់គ្រងឲ្យកាន់តែមានសណ្ដាប់ធ្នាប់ជាងនេះទៀត យើងអាចពិចារណាបន្តទៀត ហើយឥឡូវខ្ញុំមិនទាន់ទទួលបានព័ត៌មានអ្វីច្បាស់ទេ»៕
Tag:
សុខ ឥសាន
Fake News
© រក្សាសិទ្ធិដោយ thmeythmey.com
