កីឡាជាតិ
ជាតិ
ទ័ព លត់វេស្ទើន ៨-០ រីឯអង្គរថាយហ្គឺរធ្វើឲ្យស្វាយរៀងស្គាល់បរាជ័យជាលើកដំបូង ជំនួបក្រុមទ័ពលត់ក្រុមវេស្ទើនភ្នំពេញ ៨-០ នៅពហុកីឡដ្ឋានជាតិ
× ក្រុមក្រសួងការពារជាតិ(ទ័ព)បានផ្តល់មេរៀនយ៉ាងជូរចត់ដល់ក្រុមវេស្ទើនភ្នំពេញ តាមរយៈការលត់ ៨-០ នាការប្រកួតសប្តាហ៍ទី៤នៃក្របខណ្ឌលីគកំពូលកម្ពុជាកាលពីថ្ងៃអាទិត្យ ទី៨ ខែមេសា ឆ្នាំ២០១៨ នៅពហុកីឡដ្ឋានជាតិ។ ក្រុមមានមូលដ្ឋានមកពីខេត្តសៀមរាប អង្គរថាយហ្គឺរ ធ្វើឲ្យព្រះខ័នរាជស្វាយរៀងស្គាល់បរាជ័យជាលើកដំបូង បន្ទាប់ពីពួកគេបានយកឈ្នះក្រុមម្ចាស់ផ្ទះស្វាយរៀងក្នុងលទ្ធផល ៣-១។ ចំណែកក្រុមអគ្គិសនីកម្ពុជាបន្តបរាជ័យជាលើកទី៤ក្រោយចាញ់អគ្គស្នងការនគរបាលជាតិ ៤-១ នៅលើទឹកដីខ្លួនឯង។
ក្រុមវេស្ទើនភ្នំពេញរងភាពអាម៉ាស់ជាលើកទី៤ បន្ទាប់ពីពួកគេត្រូវបានក្រុមជើងឯករងឆ្នាំចាស់ក្រសួងការពារជាតិ លត់មិនឲ្យតដៃរួចក្នុងលទ្ធផល ៨-០ នាការប្រកួតសប្តាហ៍ទី៤នៃក្របខណ្ឌលីគកំពូលកម្ពុជា។ មេរៀនដ៏ជូរចត់នេះ បានធ្វើឲ្យវេស្ទើនភ្នំពេញបន្តឈរបាតតារាង ដោយគ្មាន១ពិន្ទុ ខណៈក្រសួងការពារជាតិឡើងទៅឈរលេខរៀងទី៣ដោយមាន៩ពិន្ទុ។
នាការប្រកួតនៅពហុកីឡដ្ឋានជាតិកាលពីថ្ងៃទី៨ មេសា ខ្សែបម្រើជប៉ុន Yudai Ogawa បានរកគ្រាប់បើកឆាកសម្រាប់ទ័ពនៅ៣នាទីដំបូងនៃវគ្គទី១។ បន្ទាប់មកកីឡាករ រ៉ឹង ប៊ុនហៀង បានសម្រេចពីរគ្រាប់ជាបន្តបន្ទាប់នៅនាទីទី៧ និងទី៣៩ មុនខ្សែប្រយុទ្ធ Daiki Matsumoto បន្ថែម១គ្រាប់ទៀតនៅនាទីទី៤៨។ ៤នាទីក្រោយមក Yudai Ogawa បានសម្រេចគ្រាប់ទី២របស់ខ្លួន ដើម្បីបង្កើនការនាំមុខ ៥-០ សម្រាប់ទ័ព។
ខ្សែប្រយុទ្ធ ណារ៉ុង កក្កដា បានសម្រេចគ្រាប់ទី៦សម្រាប់ទ័ពនៅនាទីទី៧៩ មុនប្រធានក្រុម រ៉ឹង ប៊ុនហៀង សម្រេចគ្រាប់ទី៣របស់ខ្លួននៅនាទី៨៣។ ក្រោយមកនៅនាទីទី៨៦ កីឡាករ កាន់ ពិសាល សម្រេចបាន១គ្រាប់បន្ថែម ហើយក៏ជាគ្រាប់បាល់ជ័យជម្នះ ៨-០ សម្រាប់ទ័ពលើវេស្ទើនភ្នំពេញផងដែរ។
ការប្រកួតនៅកីឡដ្ឋានខេត្តស្វាយរៀង ក្រុមភ្ញៀវអង្គរថាយហ្គឺរបានផ្តល់ការខកចិត្តជាលើកដំបូងសម្រាប់ក្រុមម្ចាស់ផ្ទះព្រះខ័នរាជស្វាយរៀង តាមរយៈការយកឈ្នះក្នុងលទ្ធផល ៣-១។ នាជំនួបដ៏ស្វិតស្វាញកាលពីម្សិលមិញ កីឡាករ តាំង សុភ័ក្ត្រ បានរកគ្រាប់បាល់នាំមុខ ១-០ សម្រាប់អង្គរថាយហ្គឺរនៅនាទីទី៣៨ មុនកីឡាករ ណុប តុលា រកគ្រាប់បាល់តាមស្មើសម្រាប់ម្ចាស់ផ្ទះនៅនាទីទី៤៥ មុនបញ្ចប់វគ្គទី១។
ការប្រកួតវគ្គទី២សំណើរកាន៣នាទី កីឡាករជប៉ុន Kazuteru Okamoto បានសម្រេចគ្រាប់ទី២ ដើម្បីនាំមុខ ២-១ សារជាថ្មីសម្រាប់អង្គរថាយហ្គឺរ មុនកីឡាករ Baldwin Afanwi Ngwa សម្រេចគ្រាប់ជ័យជម្នះ ៣-១ សម្រាប់អង្គរថាយហ្គឺរ នៅនាទី៩០+៣មុនចប់វគ្គទី២។ នេះជាជ័យជម្នះលើកដំបូងសម្រាប់អង្គរថាយហ្គឺរ ហើយវាក៏ជាបរាជ័យជាលើកដំបូងសម្រាប់ព្រះខ័នរាជស្វាយរៀងផងដែរ។ ៣ប្រកួតកន្លងមក អង្គរថាយហ្គឺរបានចាញ់ទាំង៣ប្រកួត ខណៈស្វាយរៀងឈ្នះ១ ស្មើ២។
នៅកីឡដ្ឋានអគ្គិសនីកម្ពុជា ក្រុមអគ្គស្នងការនគរបាលជាតិបានយកឈ្នះក្រុមម្ចាស់ផ្ទះអគ្គិសនីកម្ពុជាក្នុងលទ្ធផល ៤-១។ បួនគ្រាប់របស់ប៉ូលិសសម្រេចដោយកីឡាករ Noh Sangmin និង Suzuki Yuta ម្នាក់មួយគ្រាប់ និងកីឡាករ NO Daeko ពីរគ្រាប់ ខណៈ១គ្រាប់របស់អគ្គិសនីសម្រេចដោយកីឡាករ ជិន ជុំ។ ក្នុងជំនួបនេះដែរខ្សែប្រយុទ្ធ នួន បូរី បានរងរបួសស្មាយ៉ាងធ្ងន់ធ្ងរ ហើយត្រូវបានដឹកបញ្ជូនទៅសង្គ្រោះបន្ទាន់នៅបន្ទីរពេទ្យទៀតផង៕
Tag:
បាល់ទាត់
Cambodian League 2018
© រក្សាសិទ្ធិដោយ thmeythmey.com