ក្រោយបាត់បង់ឱកាសឡើងទៅវគ្គបន្ត នៃការប្រកួតកីឡាអុកចត្រង្គជ្រើសរើសជើងឯកប្រចាំព្រឹត្តិការណ៍អង្គរសង្ក្រាន្តឆ្នាំ២០១៨ ម្ចាស់ជើងឯកឆ្នាំចាស់ ហេង សៅឌី ទទួលស្គាល់ថា កីឡាករចូលរួមឆ្នាំនេះមានសមត្ថភាពកើនឡើងខ្លាំង បើធៀបនឹងឆ្នាំមុនៗ។ ការធ្វេសប្រហែស និងខ្វះភាពអត់ធ្មត់ ត្រូវបានអតីតជើងឯករូបចាត់ទុកថា ក៏ជាកត្តារួមចំណែកមួយឲ្យរូបកេបាត់បង់ឱកាសផងដែរ។ តែយ៉ាងណា រូបគេហាក់ដូចជាសប្បាយចិត្តពេលបានឃើញពីភាពរីកចម្រើននៃវិស័យកីឡាអុកចត្រង្គនាពេលបច្ចុប្បន្ន។
ម្ចាស់ជើងឯកកីឡាអុកចត្រង្គប្រចាំព្រឹត្តិការណ៍អង្គរសង្ក្រាន្តឆ្នាំ២០១៧ ហេង សៅឌី ទទួលស្គាល់ថា កីឡាករដែលបានទម្លាក់ខ្លួនចេញពីព្រឹត្តិការណ៍អង្គរសង្ក្រាន្តត្រឹមវគ្គជម្រុះឆ្នាំនេះសុទ្ធសឹងមានសមត្ថភាពនិងបច្ចេកទេសខ្ពស់។ ហើយការធ្វេសប្រហែស និងភាពអំណត់ក្នុងការប្រកួតដែលធ្វើរូបគេចាញ់ដៃគូផ្នែកចិត្តសាស្ត្រ ក៏ជាកត្តារួមចំណែកមួយផងដែរ។
«ខ្ញុំទទួលស្គាល់ថា ពួកគាត់ពិតជាមានសមត្ថភាពខ្លាំងៗពិតប្រាកដមែន ពិសេសឆ្នាំនេះសមត្ថភាពកីឡាករមានសន្ទុះកើនឡើងខ្លាំងមែនទែន បើធៀបនឹងឆ្នាំមុនមិនបានប្រហែលនឹងនោះទេ។ ម្យ៉ាងទៀតពួកគាត់មកឆ្នាំនេះ គឺបានហ្វឹកហាត់ត្រៀមខ្លួនយ៉ាងល្អក្នុងការប្រយុទ្ធ»។ នេះជាការលើកឡើងរបស់កីឡាករ ហេង សៅឌី ដែលបានបន្ថែមថា ការបរាជ័យនេះមិនបានជះឥទ្ធិពលធ្ងន់ធ្ងរ ឬប៉ះពាល់អារម្មណ៍សម្រាប់ការហ្វឹកហាត់ក្នុងក្រុមជម្រើសជាតិរបស់គេឡើយ។ មិនត្រឹមតែប៉ុណ្ណោះរូបគេប្តេជ្ញាថា នឹងបង្កើនការហ្វឹកហាត់ឲ្យកាន់តែខ្លាំងថែមទៀតផង។
ទន្ទឹមនឹងនេះ ហេង សៅឌី មើលឃើញថា បច្ចុប្បន្នសម្រាប់វិស័យកីឡាអុកចត្រង្គពុំមានកីឡាករណាម្នាក់ល្អលេចធ្លោដាច់គេនៅឡើយទេ ពោលគឺមានសមត្ថភាពប្រហាក់ប្រហែលគ្នា បើធ្វេសប្រហែសអាចរងបរាជ័យគ្រប់ពេលវេលា។ «អ្នកលេងអុកនៅខ្មែរយើងគឺប្រហាក់ប្រហែលគ្នា បើប្រហែសបន្តិចដៃគូអាចឆក់ឱកាសបាន យើងអាចចាញ់គ្រប់ពេល។ យើងមិនទាន់មានអ្នកណាល្អដាច់គេនៅឡើយទេ គឺល្អៀងគ្នាបន្តិចបន្តួច»។ នេះជាការរៀបរាប់បន្ថែមរបស់កីឡាករ ហេង សៅឌី។
សម្រាប់ការប្រកួតវគ្គជម្រុះពូល F កីឡាករ ហេង សៅឌី បានចាញ់កីឡាករ ប៊ិន គាសេង ជើងឯករងដែលខ្លួនធ្លាប់យកឈ្នះក្នុងវគ្គផ្តាច់ព្រ័ត្រក្នុងព្រឹត្តិការណ៍អង្គរសង្ក្រាន្តឆ្នាំ២០១៧ ក្នុងជំនួបទី១ ហើយបានបន្តចាញ់កីឡាករ ឃុត ប្រិមប្រិយ ក្នុងជំនួបទី២។ ហើយបានយកឈ្នះកីឡាករ សុខ សំបូរ ក្នុងជំនួបទី៣ ដើម្បីឈរលខរៀងទី៣ក្នុងពូល F ដែលជាលេខរៀងមិនអាចទៅវគ្គបន្ត។
កីឡាករ ហេង សៅឌី បានបញ្ជាក់ថា រូបគេចាញ់កីឡាករ ប៊ិន គាសេង ក្នុងជំនួបទី១ដោយសារចិត្តសាស្ត្រ ពោលគឺរូបគេខ្វះការអត់ធ្មត់ក្នុងការប្រកួត។ ហើយសម្រាប់ការចាញ់កីឡាករ ឃុត ប្រិមប្រិយ គឺបណ្តាលមកពីការធ្វេសប្រហែស ដោយរូបគេបាត់បង់ការផ្តោតអារម្មណ៍។
កីឡាករដែលទទួលបានកៅអីឡើងទៅប្រកួតវគ្គ១/៤ក្នុងព្រឹត្តិការណ៍អង្គរសង្ក្រាន្តនាខេត្តសៀមរាប រួមមានកីឡាករ ឈាវ បូរ៉ា, សុខ លឹមហេង, កែវ វឌ្ឍនា, ប៊ិន គាសេង, ធីម ឌីណា, ស៊ីវ ស៊ីន, អេង សេងហៀក និង ប៊ូ ប៉ុណ្ណម៉ូលីកា៕