សិស្សថ្នាក់ទី១១ពីររូប បង្កើតប្រព័ន្ធបិទ-បើកភ្លើងស្វ័យប្រវត្តិបញ្ជាពីទូរសព្ទ

ជាតិ

បច្ចេកវិទ្យា

សិស្សថ្នាក់ទី១១ពីររូប បង្កើតប្រព័ន្ធបិទ-បើកភ្លើងស្វ័យប្រវត្តិបញ្ជាពីទូរសព្ទ

13, Apr 2018 , 7:59 pm

រូបភាព

ដោយ: អ៊ូ សុខមាន (OU Sokmean)

ភ្នំពេញ៖ យុវតី ថន សិរីរដ្ឋា និងយុវជន ពូ គុណវឌ្ឍន៍ ជាសិស្សថ្នាក់ទី១១ នៃវិទ្យាល័យព្រះស៊ីសុវត្ថិសាលារៀនជំនាន់ថ្មី ដែលបានរួមគ្នាបង្កើតប្រព័ន្ធបិទ-បើកភ្លើងក្នុងផ្ទះស្វ័យប្រវត្តិ (Home Automation) ។ ពួកគេ បង្កើតបច្ចេកវិទ្យានេះ ក្នុងបំណងបន្ថយការចំណាយ និងការពារហានិភ័យនៅក្នុងផ្ទះ។

យុវសិស្សកម្ពុជា២រូប ដែលជាសិស្សថ្នាក់ទី១១ នៃវិទ្យាល័យព្រះស៊ីសុវត្ថិសាលារៀនជំនាន់ថ្មី បានស្រាវជ្រាវការបង្កើតប្រព័ន្ធបិទ-បើកភ្លើងក្នុងផ្ទះស្វ័យប្រវត្តិ (Home Automation) បញ្ជាពីទូរស័ព្ទ។ យុវតី ថន សិរីរដ្ឋា បានបញ្ជាក់ប្រាប់សារព័ត៌មានថ្មីៗថា មនុស្សម្នាក់ៗតែងតែចង់ប្រើប្រាស់អ្វីដែលកាន់តែងាយស្រួលទៅៗ និងឆាប់រហ័ស ព្រមទាំងមិនចាំបាច់រំខានដល់អ្នកដទៃ។ ដូច្នេះហើយ ទើបបានជាកញ្ញា និងមិត្តភក្តិគាត់ម្នាក់ទៀត នឹកឃើញបង្កើតប្រព័ន្ធបិទ-បើកភ្លើងក្នុងផ្ទះស្វ័យប្រវត្តិនេះឡើង។ យុវតី ថន សិរីរដ្ឋា បន្ថែមដូច្នេះថា៖«វាអាចជួយសន្សំសំចៃការប្រើប្រាស់អគ្គិសនីនៅក្នុងផ្ទះបានច្រើន និងជាពិសេសជួយសម្រួលដល់មនុស្សចាស់ជរា និងជនពិការដែលពិបាកធ្វើចលនា ដោយពុំចាំបាច់ឡើងចុះបិទ-បើកកុងតាក់ភ្លើង»។

ការស្រាវជ្រាវលើប្រព័ន្ធបិទ-បើកភ្លើងក្នុងផ្ទះស្វ័យប្រវត្តិនេះ គឺបានចំណាយពេល២សប្តាហ៍ ដោយ ដោយមានការចង់ប្រព័ន្ធកូដ(Code) និងដាក់លេខសម្ងាត់ (Password) ភ្ជាប់ជាមួយប្លូធូ (Bluetooth) នឹងបញ្ជាបិទ-បើកភ្លើងដោយAppនៅក្នុងទូរស័ព្ទ។ នេះបើតាម យុវជន ពូ គុណវឌ្ឍន៍ ដៃគូស្រាវជ្រាវរបស់ សិរីរដ្ឋា។ យុវជន ពូ គុណវឌ្ឍន៍ ក៏បានសាកល្បងប្រព័ន្ធបច្ចេកវិទ្យានេះរៀងរាល់ថ្ងៃដែរ មុននឹងយកប្រព័ន្ធនេះ ទៅប្រជែងក្នុងកម្មវិធី Asean Student Science Project Competition 2018 (ASPC) នៅប្រទេសថៃ ជាមួយសិស្ស នៅក្នុងប្រទេសសមាជិកអាស៊ាន និងប្រទេសផ្សេងៗទៀត។ ការប្រកួតប្រជែង ចាប់ផ្តើមពីថ្ងៃទី២១ ដល់ថ្ងៃទី២៧ ខែកក្កដា ឆ្នាំ២០១៨ខាងមុខ។

យុវសិស្ស ពូ គុណវឌ្ឍន៍ រៀបរាប់ដូច្នេះ៖«ខ្ញុំបានបំពាក់វានៅក្នុងបន្ទប់គេងរបស់ខ្ញុំរួចហើយ និងប្រើប្រាស់វាជារៀងរាល់ថ្ងៃ។ ខ្ញុំបានដាក់ប្រព័ន្ធកំណត់នាទី នៅក្នុងទូរស័ព្ទដៃរបស់ខ្ញុំ។ ឧទាហរណ៍ ខ្ញុំកំណត់ពេលវេលា១ម៉ោង នៅពេលមើលមេរៀន ឬធ្វើលំហាត់នៅយប់ ចៃដន្យខ្ញុំគេងមុនម៉ោងកំណត់ ដូច្នេះប្រព័ន្ធភ្លើងដែលខ្ញុំបានកំណត់ វានឹងបិទដោយខ្លួនឯង»។

ពូ គុណវឌ្ឍន៍ បានឲ្យដឹងថា បច្ចុប្បន្នប្រព័ន្ធនេះអាចបញ្ជាបិទ-បើកភ្លើង បានលើសពី១០០ម៉ែត្រដោយគ្មានរបាំង និងបានចម្ងាយ៣០ម៉ែត្រ ពេលមានរបាំងផ្សេងៗ ដូចជា កញ្ចក់ ទ្វារ ជាដើម៕