អន្តរជាតិ
នូវែលសេឡង់ដាំដើមឈើ ១០០លានដើមមួយឆ្នាំប្រឆាំងការប្រែប្រួលអាកាសធាតុ
× ដើម្បីធ្វើឲ្យប្រទេសទាំងមូលកាន់តែបៃតង និងប្រឆាំងការប្រែប្រួលអាកាសធាតុ រដ្ឋាភិបាលនូវែលសេឡង់ចេញវិធានការដាំដើមឈើរាប់លានដើមក្នុងមួយឆ្នាំ និងជំរុញការអគ្គិសនីដើរដោយថាមពលកកើតឡើងវិញ។ នូវែលសេឡង់ក៏បង្កើនការចំណាយលើការបង្កើតផ្លូវសម្រាប់កង់ និងការដឹកជញ្ជូនតាមរថភ្លើងដូចគ្នា។
ក្រោយឡើងកាន់តំណែងនៅខែតុលាឆ្នាំ ២០១៧ លោកស្រី Jacinda Arderm នាយករដ្ឋមន្ត្រីនូវែលសេឡង់ចាប់ផ្តើមដាក់ចេញវិធានការក្នុងការការពារបរិស្ថាន និងធ្វើឲ្យទីក្រុងកាន់តែបៃតង។ វិធានការទាំងនោះមានដូចជា ការដាំដើមឈើឲ្យបាន ១០០ លានដើមក្នុងមួយឆ្នាំ និងជំរុញការផលិតថាមពលកកើតឡើងវិញផង។
យោងតាមការចុះផ្សាយរបស់គេហទំព័រ World Economic Forum ក្រៅពីការដាំដើមឈររាប់លានដើម និងផលិតថាមពលកកើតឡើងវិញ លោកស្រីក៏ជំរុញឲ្យមានការសម្រួលដល់អ្នកដំណើរដោយជិះកង់ និងជំរុញការប្រើប្រាស់រថភ្លើងដែលជាមធ្យោបាយដឹកជញ្ជូនសាធារណៈ។
នាយករដ្ឋមន្ត្រីវ័យក្មេងត្រឹម ៣៧ឆ្នាំនេះ រំពឹងថា គំនិតផ្តួចផ្តើមរបស់រដ្ឋាភិបាលលោកស្រីនឹងក្លាយជាផ្លូវដ៏ល្អមួយសម្រាប់រក្សាបរិស្ថាន និងជួយប្រយុទ្ធប្រឆាំងការប្រែប្រួលអាកាសធាតុសាកលដូចគ្នា។ លោកស្រីសង្ឃឹមថា នូវែលសេឡង់នឹងអាចបន្ថយការបញ្ចេញឧស្ម័នផ្ទះកញ្ចក់ឲ្យដល់កម្រិតសូន្យនៅត្រឹមឆ្នាំ ២០៥០ ខាងមុខ។
មកដល់បច្ចុប្បន្ននេះ នូវែលសេឡេង់បានសម្រេចបង្កើតថាមពលអគ្គិសនី ៨៥ភាគរយពីប្រភពថាមពលកកើតឡើងវិញ ដូចជាជីវម៉ាស ខ្យល់ សូឡា និងវារីអគ្គិសនីផង។ នាយករដ្ឋមន្ត្រី Ardern មានគម្រោងបង្កើនវាឲ្យដល់ ១០០ភាគរយត្រឹមឆ្នាំ ២០៣៥ ព្រោះបច្ចុប្បន្នវាមានការចាប់ផ្តើមវិនិយោគកាន់តែច្រើនលើការទាញយកថាមពលពន្លឺព្រះអាទិត្យ៕
Tag:
អាកាសធាតុ
ដាំដើមឈើ
នូវែលសេឡង់
© រក្សាសិទ្ធិដោយ thmeythmey.com