អន្តរជាតិ
អង្គការសហប្រជាជាតិ អំពាវនាវជំនួយជាង ១០០លានដុល្លារ ដើម្បីសង្គ្រោះជីវិតប្រជាជនកូរ៉េខាងជើង
រូបភាព Reuters
×![]()
អង្គការសហប្រជាជាតិ និងដៃគូពាក់ព័ន្ធរបស់ខ្លួន កំពុងតែអំពាវនាវស្វែងរកជំនួយបន្ទាន់ចំនួន ១១១ លានដុល្លារដើម្បីជួយសង្គ្រោះ និងផ្គត់ផ្គង់ប្រជាជនកូរ៉េខាងជើងជាច្រើននាក់ ដែលកំពុងតែរស់នៅក្នុងស្ថានភាពស្រេកឃ្លាន ជាពិសេសនោះកុមារៗតែម្តង ដែលពួកគេ មិនអាចទទួលអាហារឧបត្ថម្ភគ្រប់គ្រាន់ ។
មន្ត្រីជំនាញសម្របសម្រួលអង្គការសហប្រជាជាតិប្រចាំតំបន់អាស៊ីខាងជើងលោក Tapan Mishra នៅថ្ងៃ ១២ មេសា បានអះអាងថា ជំនួយមនុស្សធម៌ ពិតជាមានសារៈសំខាន់ណាស់សម្រាប់ប្រជាជនរាប់លាននាក់ ដែលរស់នៅក្នុងប្រទេសកូរ៉េខាងជើង ។ នេះបើយោងតាមការចុះផ្សាយរបស់មជ្ឈមណ្ឌលព័ត៌មានអង្គការសហប្រជាជាតិ ។
ខណៈទទួលស្គាល់ថាភាគរយនៃភាពស្រេកឃ្លានរបស់ប្រជាជននៅទីនោះមានការថយចុះបន្តិច លោក Tapan Mishra ក៏បានឲ្យដឹងផងដែរថា នៅឆ្នាំ២០១៧កន្លងទៅ អង្គការសហប្រជាជាតិ និងដៃគូរបស់ខ្លួន បាននាំយកជំនួយទៅដល់ប្រជាជន ៦ លាននាក់ ក៏ប៉ុន្តែ បញ្ហានេះ មិនអាចព្រងើយកន្តើយបានឡើយ ។
បើតាមរបាយការណ៍របស់ភ្នាក់ងារជំនាញជំនួយមនុស្សធម៌អង្គការសហប្រជាជាតិ (OCHA) មានប្រជាជនជាង ១០លាននាក់ ដែលស្មើនឹង៤០ភាគរយនៃប្រជាជនកូរ៉េខាងជើងសរុប កំពុងតែត្រូវការជំនួយមនុស្សធម៌ ខណៈបញ្ហាកុមារមិនទទួលបានអាហារឧបត្ថម្ភគ្រប់គ្រាន់ បានកើតឡើងស្ទើរតែពាសពេញប្រទេស ។
គួរជម្រាបផងដែរថា មហិច្ឆតាក្នុងការកសាងប្រទេសឲ្យក្លាយជាប្រទេសបរមាណូរបស់មេដឹកនាំត្រកូលគីម នៃកូរ៉េខាងជើង ប៉ុន្មានជំនាន់មកនេះ បានធ្វើឲ្យប្រទេសក្រីក្របំផុតលើពិភពលោកមួយនេះ ទទួលរងទណ្ឌកម្មយ៉ាងធ្ងន់ធ្ងរពីសហគមន៍អន្តរជាតិ ។ ក៏ប៉ុន្តែទណ្ឌកម្មនេះ មិនបានធ្វើឲ្យរដ្ឋាភិបាលកូរ៉េខាងជើង ថមថយឥរិយាបថខ្លួនក្នុងការបោះឆ្នោតមហិច្ឆតាខ្លួនឡើយ ហើយចុងក្រោយគឺប្រជាជននោះទេ ដែលជាអ្នករងគ្រោះ ជាពិសេសលើវិស័យសេដ្ឋកិច្ច ៕
Tag:
កូរ៉េខាងជើង
ភាពក្រីក្រ
UN
© រក្សាសិទ្ធិដោយ thmeythmey.com
