ស្គរដៃមួយ និងគម្របឆ្នាំង២ រួមជាមួយអ្នកច្រៀងម្នាក់ ក្លាយជាតន្ត្រីទាក់ចិត្តយុវជនយ៉ាងច្រើន

ជាតិ

បទយកការណ៍ / បទសម្ភាសន៍

ស្គរដៃមួយ និងគម្របឆ្នាំង២ រួមជាមួយអ្នកច្រៀងម្នាក់ ក្លាយជាតន្ត្រីទាក់ចិត្តយុវជនយ៉ាងច្រើន

17, Apr 2018 , 8:39 pm

រូបភាព

ដោយ: ប៉ូ សាគុន

ភ្នំពេញ៖ ព្រោះតែការស្រឡាញ់ និងចង់ថែរក្សាសិល្បៈបុរាណ លោក ថាំង សុខអាន បានបង្កើតក្រុមតន្ត្រីមួយឈ្មោះថា «ក្រុមតន្ត្រីឬស្សីស្រុករីករាយ» ដើម្បីច្រៀងលេងកម្សាន្តនៅក្នុងពីធីបុណ្យចូលឆ្នាំ ភ្ជុំបិណ្ឌ និងបុណ្យដទៃទៀត ជាលក្ខណៈគ្រួសារ។ ក្រុមតន្ត្រីនេះមានសមាជិកតែ៣ទៅ៤នាក់ ហើយមានតែស្គរដៃមួយ គម្របឆ្នាំង២ជាឧបករណ៍ភ្លេង និងអ្នកច្រៀងម្នាក់ឬពីរនាក់ប៉ុណ្ណោះ តែទទួលបានការចាប់អារម្មណ៍យ៉ាងច្រើនពីយុវជន។

លោក ថាំង សុខអាន គឺជាតន្ត្រីករលេខឧបករណ៍ស្គរដៃ ក្នុងវង់ភ្លេងតន្ត្រីឬស្សីស្រុករីករាយនេះ បាននិយាយថា ក្រុមតន្ត្រីនេះបង្កើតឡើងនៅឆ្នាំ១៩៨៧មកម្ល៉េះ ពោលតាំងពីលោកនៅក្មេងៗម្ល៉េះ។ លោកថាសមាជិកក្រុមភ្លេងនេះ ដោយមានសុទ្ធតែជាបងប្អូនរបស់លោក។ ព្រោះតែការស្រឡាញ់តន្ត្រី និងចង់ថែរក្សាសិល្បៈបុរាណ ទើបបានជាលោកបង្កើតក្រុមតន្ត្រីនេះឡើង។ បើតាមលោក សុខអាន ក្រុមតន្ត្រីនេះតែងលេងជាលក្ខណៈគ្រួសារនៅផ្ទះ ពេលជួបជុំបងប្អូន និងនៅក្នុងពិធីបុណ្យចូលឆ្នាំ ភ្ជុំ ជាដើម។ លោក សុខអាន បញ្ជាក់៖« ក្រុមតន្ត្រីនេះបង្កើតឡើងគ្រាន់តែជាការកម្សាន្តសម្រាប់គ្រួសារ ពេលជួបជុំគ្នាពេលបុណ្យទាន។ ទាំងខ្ញុំនិងបងប្អូនខ្ញុំស្រឡាញ់តន្ត្រីតាំងពីតូចៗ ចូលចិត្តច្រៀងលេង ជាពិសេសច្រៀងរាំវង់ស្គរដៃហ្នឹង»។

អ្នកស្រី ស៊ង សារី ជាសមាជិកក្រុមតន្ត្រីនេះដែរ បានឱ្យដឹងថា តន្ត្រីស្គរដៃរបស់ក្រុមអ្នកស្រីអាចច្រៀងបទចម្រៀង រាំវង់ សារវ៉ាន់ ឡាំលាវ កន្ទ្រឹម ជាដើម។ អ្នកមកពីខេត្តតាកែវរូបនេះ បញ្ជាក់ថា មូលហេតុដែលក្រុមតន្ត្រីរបស់អ្នកស្រីដាក់ឈ្មោះ «ក្រុមតន្ត្រីឬស្សីស្រុករីករាយ» គឺតំណាងឱ្យភូមិរបស់អ្នកស្រី។ «ឈ្មោះ ក្រុមតន្ត្រីឬស្សីស្រុករីករាយ នេះ តំណាងឱ្យភូមិរបស់ខ្ញុំ ឈ្មោះឬស្សីស្រុក ហើយក៏តំណាងឱ្យថា ក្រុមរបស់ខ្ញុំទៅដល់ទីណា រីករាយដល់ទីនោះដែរ»។ នេះជាការបញ្ជាក់របស់អ្នកស្រី សារី។

ក្រុមតន្ត្រីឬស្សីស្រុករីករាយនេះ បង្កើតឡើងដើម្បីថែរក្សាទម្រង់សិល្បៈតន្ត្រីបុរាណ និងដើម្បីរាំលេងកម្សាន្តជាលក្ខណៈគ្រួសារ តែកន្លងមកក្រុមនេះទទួលបានការគាំទ្រច្រើនពីសំណាក់យុវជន នៅតាម បណ្ដាញសង្គមហ្វេសប៊ុក និងនៅក្នុងកម្មវិធីបុណ្យភូមិផងដែរ៕