ជាតិ
ស្ពានអាកាសផ្សារដីហុយ៖ រថយន្តមួយគ្រឿងបើកបុករនាំងសញ្ញាម្តងទៀត រូបពីហ្វេសប៊ុកអ្នកសារព័ត៌មាន
× ភ្នំពេញ៖ រនាំងស្លាកសញ្ញានៅស្ពានអាកាសផ្សារដីហុយ ដែលតម្រូវឲ្យអ្នកបើកបរគោរពតាមនេះ ត្រូវបានរថយន្តធុនធំ បុកធ្លាក់ចំនួនពីរលើកហើយ បើគិតចាប់ពីថ្ងៃដាក់ឲ្យប្រើប្រាស់បណ្ដោះអាសន្ន កាលពីថ្ងៃទី១២ មេសា។
អ្នកនាំពាក្យសាលារាជធានីភ្នំពេញ លោក ម៉េត មាសភក្តី បានឲ្យដឹងថា រនាំងដែលបានខូចខាតដោយសាររថយន្តមួយគ្រឿងបុកកាលពីថ្ងៃទី១៧ មេសា ត្រូវបានអាជ្ញាធររៀបចំឡើងវិញហើយ។ ចំណែករថយន្តបង្កហេតុ ត្រូវបានយកទៅរក្សាទុកនៅស្នងការនគរបាលរាជធានីភ្នំពេញ ដើម្បីដោះស្រាយទៅតាមនីតិវិធីច្បាប់។ លោក មាសភក្តី បានបញ្ជាក់ថាករណីបុករនាំងនេះ មិនបណ្តាលឲ្យមានរបួសស្នាមលើនរណាម្នាក់ឡើយ គ្រាន់តែខូចខាតរនាំង ដោយសារអ្នកបើកបរមិនមានការប្រុងប្រយ័ត្នប៉ុណ្ណោះ។
បើតាមអ្នកនាំពាក្យរូបនេះ រនាំងដែលបានខូចខាតម្ដងទៀត គឺជារនាំងស្លាកសញ្ញា ដែលត្រូវបានរថយន្តបើកបុកម្តងរួចមកហើយ កាលពីថ្ងៃទី១២ មេសា។
បើមើលតាមស្លាកសញ្ញាក្រសួងសាធារណការ និងដឹកជញ្ជូន ដែលដាក់បារ៉ាស់លើស្ពានអាកាសផ្សារដីហុយនោះ មានការបង្ហាញពីកម្ពស់រថយន្តត្រឹមតែ៣ម៉ែត្រចុះក្រោម និងអាចផ្ទុកទម្ងន់បាន៣០តោន ហើយអនុញ្ញាតឲ្យរថយន្តធុនតូចធ្វើដំណើរបាន ពោលគឺរថយន្តធុនធំត្រូវបានហាមចរាចរណ៍។
ស្ពានអាកាសផ្សារដីហុយ បានដាក់ឲ្យប្រើប្រាស់ជាបណ្តោះអាសន្ន នៅថ្ងៃទី ១២ រហូតដល់ថ្ងៃនេះទី១៨ ខែមេសា ឆ្នាំ២០១៨។ តាមរយៈសេចក្តីថ្លែងការណ៍ក្នុងពិធីដាក់ឲ្យប្រើប្រាស់ស្ពានអាកាសជាបណ្តោះអាសន្ន លោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានឲ្យដឹងថា ស្ពានអាកាសផ្សារដីហុយ ដែលជាស្ពានអាកាសទី៥ ក្នុងរាជធានីភ្នំពេញ។ ស្ពាននេះអាចធ្វើដំណើរត្រឹមតែ២ជួរ ហើយស្ពាននេះបានចំណាយថវិកាសាងសង់ចំនួន ៦១លានដុល្លារអាមេរិក ដែលជាកម្ចីសម្បទានពីរដ្ឋាភិបាលចិន និងរដ្ឋាភិបាលកម្ពុជា៕
Tag:
ស្ពានអាកាសផ្សារដីហ៊ុយ
ម៉េត មាសភក្តី
© រក្សាសិទ្ធិដោយ thmeythmey.com