ជាតិ
លោក សម រង្ស៊ី និងអតីត CNRP ងាកមកសុំអន្តរាគមន៍ពីប្រទេសនៅតំបន់អាស៊ី លោក សម រង្ស៊ី និងភរិយា រួមទាំងសហការី ជួបជាមួយសមាជិករដ្ឋសភានិងសមាជិកព្រឹទ្ធសភាជប៉ុន កាលពីថ្ងៃទី១២ ខែមេសា ឆ្នាំ២០១៨។ រូបពីទំព័រហ្វេសប៊ុករបស់លោក សម រង្ស៊ី
× ភ្នំពេញ៖ លោក សម រង្ស៊ី ចាប់ផ្តើមបំពេញបេសកកម្មនៅតាមបណ្តាប្រទេសក្នុងតំបន់អាស៊ី ដើម្បីសុំឲ្យជួយស្រោចស្រង់ប្រជាធិបតេយ្យនៅកម្ពុជា ហើយជាពិសេស ជួយឲ្យគណបក្សសង្គ្រោះជាតិរបស់លោក បានចូលរួមក្នុងការបោះឆ្នោត។ អ្នកនាំពាក្យបក្សកាន់អំណាច ចំអកថា ការស្វែងរកជំនួយពីបរទេសរបស់លោក សម រង្ស៊ី ប្រៀបដូចជាការរាវរកម្ជុលក្នុងបាតសមុទ្រ។
មួយរយៈចុងក្រោយនេះ ក្រុមប្រឆាំង ដោយមានលោក សម រង្ស៊ី ជាបង្គោល ប្រឹងប្រែងរឹតតែខ្លាំង ក្នុងការស្វែងរកជំនួយពីបរទេស ដើម្បីជួយឲ្យខ្លួន បានចូលរួមក្នុងការបោះឆ្នោតថ្នាក់ជាតិ នៅថ្ងៃទី២៩ ខែកក្កដា ឆ្នាំ២០១៨។ បន្ទាប់ពីសុំអន្តរាគមន៍ពីប្រទេសធំៗមួយចំនួន ដូចជាសហរដ្ឋអាមេរិក សហភាពអឺរ៉ុប អូស្ត្រាលី និងកាណាដា ជាដើម លោក សម រង្ស៊ី អតីតប្រធានគណបក្សសង្គ្រោះជាតិ និងបច្ចុប្បន្នជាប្រធានចលនាសង្គ្រោះជាតិ ក៏ងាកទៅពឹងពាក់ប្រទេសក្នុងតំបន់អាស៊ីវិញម្តង។
ប្រទេសក្នុងតំបន់អាស៊ី ដែលលោក សម រង្ស៊ី និងសហការី ឈានជើងចូលមុនគេ ដើម្បីស្វែងរកជំនួយ គឺជប៉ុន។ លោក បានជួបសមាជិករដ្ឋសភា និងសមាជិកព្រឹទ្ធសភាជប៉ុន មកពីគណបក្សកាន់អំណាចផង និងមកពីគណបក្សប្រឆាំងផង។
លោក សម រង្ស៊ី ក៏បានជួបសំណេះសំណាលជាមួយអ្នកគាំទ្រ ក្នុងប្រទេសជប៉ុនផងដែរ។ ក្នុងពិធីសំណេះសំណាលនោះ លោក បានបង្ហាញជំនឿថា ដំណោះស្រាយ នឹងកើតមានឡើង មុនការបោះឆ្នោតមកដល់។
អតីតមេបក្សប្រឆាំង បានប្រាប់អ្នកគាំទ្រ យ៉ាងដូច្នេះថា៖«ដោយសារយើង មានមិត្តភក្តិដ៏សំខាន់ក្នុងពិភពលោក គួបផ្សំនឹងការគាំទ្រពីប្រជារាស្ត្រយ៉ាងខ្លាំងក្លាផងដែរ ដូច្នេះ ខ្ញុំមានសង្ឃឹមយ៉ាងមោះមុតថា ការរៀបចំ ដែលគេចង់បិទបាំង ចង់រារាំងមិនឲ្យគណបក្សសង្គ្រោះជាតិចូលរួមក្នុងការបោះឆ្នោត នឹងអាចរកច្រកណាមួយចេញជាមិនខាន។ ហើយរឿងដែលគេមិនចង់ឲ្យកឹម សុខា-សម រង្ស៊ី ចូលរួមដឹកនាំគណបក្សសង្គ្រោះជាតិ ក៏អាចរកដំណោះស្រាយណាមួយដែរ»។
ផ្ទុយមកវិញ លោក សម រង្ស៊ី បានអំពាវនាវមិនឲ្យប្រជាពលរដ្ឋ ទៅចូលរួមបោះឆ្នោត ប្រសិនបើគ្មានគណបក្សសង្គ្រោះជាតិ។ លោក បន្តថា ប្រសិនបើ គ្មានគណបក្សសង្គ្រោះជាតិ ហើយប្រជាពលរដ្ឋ ដែលចូលរួមបោះឆ្នោត មានចំនួនតិច ការបោះឆ្នោត នឹងគ្មានន័យ និងមិនមានភាពស្របច្បាប់ ចំណែកសហគមន៍អន្តរជាតិ នឹងមិនទទួលស្គាល់ឡើយ។
ក្រោយពីបញ្ចប់បេសកកម្មនៅជប៉ុនភ្លាម លោក សម រង្ស៊ី និងភរិយា រួមទាំងសហការីមួយចំនួនទៀត ក៏បន្តដំណើរទៅឥណ្ឌូណេស៊ី។ លោក បានជួបពិភាក្សាជាមួយលោក Fadli Zon អនុប្រធានរដ្ឋសភាឥណ្ឌូនេស៊ី និងតំណាងរាស្ត្រឥណ្ឌូណេស៊ីមួយចំនួនទៀត។
សុខ ឥសាន អ្នកនាំពាក្យគណបក្សប្រជាជនកម្ពុជា ចំអកថា ការរត់ទៅពឹងពាក់ពីប្រទេសមួយ ទៅប្រទេសមួយ គឺគ្រាន់តែជាដំណើរផ្សងព្រេងរបស់លោក សម រង្ស៊ី ប៉ុណ្ណោះ។ លោក ហ៊ានសន្និដ្ឋានជាមុនថា បំណងរបស់លោក សម រង្ស៊ី និងបក្សពួក ដែលទៅសុំឲ្យបរទេសជួយ មិនអាចទទួលបានផលវិជ្ជមានឡើយ។
អ្នកនាំពាក្យបក្សកាន់អំណាចរូបនេះ បានសរសេរសារក្នុងបណ្តាញទំនាក់ទំនងតេឡេក្រាមទៅកាន់អ្នកកាសែត យ៉ាងដូច្នេះថា៖«ការធ្វើពនេចរនេះ គឺគ្រាន់ជាការផ្សងសំណាង ដូចចាក់កន្ទុយលេខអ៊ីចឹង ឬជាការរាវរកម្ជុលតូចមួយនៅក្នុងលំហសមុទ្រដូច្នោះដែរ»។
បើគិតទៅ នៅសល់តែជាង២ខែទៀតប៉ុណ្ណោះ ការបោះឆ្នោតជ្រើសតាំងតំណាងរាស្ត្រ នីតិកាលទី៦ នឹងឈានមកដល់។ ប៉ុន្តែគណបក្សសង្គ្រោះជាតិ ដែលគេចាត់ទុកថាគណបក្សប្រឆាំងធំជាងគេ និងជាគូប្រកួតតែមួយគត់របស់គណបក្សប្រជាជនកម្ពុជា នៅមិនទាន់រស់ឡើងវិញនោះទេ។
សហគមន៍អន្តរជាតិមួយចំនួន ទាមទារឲ្យមានដំណោះស្រាយជាបន្ទាន់ ដោយធ្វើយ៉ាងណា ឲ្យគណបក្សសង្គ្រោះជាតិ បានចូលរួម ទើបការបោះឆ្នោត ប្រព្រឹត្តទៅតាមគន្លងប្រជាធិបតេយ្យ និងមានលក្ខណស្របច្បាប់។ ពួកគេ អាចនឹងមិនទទួលស្គាល់ការបោះឆ្នោត បើគ្មានការចូលរួមពីគណបក្សសង្គ្រោះជាតិ។
យា់ងណាក៏ដោយ គណបក្សកាន់អំណាច ក៏ដូចជារដ្ឋាភិបាល មិនទាន់ផ្តល់សញ្ញាវិជ្ជមានណាមួយដល់គណបក្សប្រឆាំងនោះទេ មកដល់ពេលនេះ។ រដ្ឋាភិបាល នៅតែប្រកាន់ជំហរថា ចំណាត់ការរបស់តុលាការ ទៅលើគណបក្សប្រឆាំង គឺស្របនឹងច្បាប់ ដោយមិនអាចលើកលែងឲ្យបាន។ រដ្ឋាភិបាល ថែមទាំងប្រកាសថា ការបោះឆ្នោត នឹងដំណើរការតាមការគ្រោងទុក ដោយមិនខ្វល់ថាមានឬគ្មានគណបក្សប្រឆាំង ហើយសហគមន៍អន្តរជាតិទទួលស្គាល ឬមិនទទួលស្គាលនោះទេ៕
© រក្សាសិទ្ធិដោយ thmeythmey.com