អន្តរជាតិ
ដូណាល់ ត្រាំ ព្រមានដើរចេញពីតុចរចា បើជំនួបជាមួយ គីម ជុងអ៊ុន គ្មានផ្លែផ្កាទេ លោក ដូណាល់ ត្រាំ ក្នុងសន្និសីទសារព័ត៌មាននៅរដ្ឋ Florida (រូបភាព AFP)
× ប្រធានាធិបតីអាមេរិក ដូណាល់ ត្រាំ បានបង្ហាញក្ដីសង្ឃឹមថា ជំនួបប្រវត្តិសាស្ត្រជាមួយមេដឹកនាំកូរ៉េខាងជើង គីម ជុងអ៊ុន នឹងទទួលបានជោគជ័យមិនខាន។ លោក ត្រាំ និយាយបែបនេះ បន្ទាប់ពីបង្ហើបពីដំណឹងប្រធានទីភ្នាក់ងារចារកម្ម (CIA) លោក Mike Pompeo ទៅជួបលោក គីម នៅកូរ៉េខាងជើង ដែលលោកអះអាងថា បានបង្កើតទំនាក់ទំនងល្អទៀតផង។ យ៉ាងណាមិញ លោក ត្រាំ បានព្រមានទុកមុនដែរថា លោកនឹងមិនទៅចរចាឡើយ បើគ្មានបានផលអ្វីនោះ។
ការលុបបំបាត់នុយក្លេអ៊ែរពីឧបទ្វីបកូរ៉េ គឺជារបៀបវារៈធំសម្រាប់ជំនួបមិនធ្លាប់មានរវាងប្រធានាធិបតីអាមេរិក និងមេដឹកនាំកំពូលកូរ៉េខាងជើង។ ប្រធានាធិបតីអាមេរិក ដូណាល់ ត្រាំ មានជំហរចង់ឲ្យការចរចាលើកដំបូងនេះ ដែលមិនទាន់កំណត់ពេលវេលា និងទីកន្លែងជាក់លាក់នេះ ទទួលបានជោគជ័យ ឬក៏មានលទ្ធផលដែលអាចទទួលយកបាន។ សម្រាប់លោក ត្រាំ បើគ្រាន់តែជួបហើយគ្មានបានការអ្វីនោះ គ្មានហេតុផលអ្វីដែលលោកត្រូវទៅចរចាឡើយ។
ក្នុងសន្និសីទសារព័ត៌មានជាមួយនាយករដ្ឋមន្ត្រីជប៉ុន ស៊ីនហ្សូ អាបេ នៅថ្ងៃទី១៨ ខែមេសា លោក ត្រាំ បង្ហាញសុទិដ្ឋិនិយមខ្ពស់ចំពោះការជួបទល់មុខលើកទីមួយជាមួយមេដឹកនាំកំពូលកូរ៉េខាងជើង គីម ជុងអ៊ុន និងសង្ឃឹមថា អាចបញ្ចុះបញ្ចូលឲ្យកូរ៉េខាងជើងបោះបង់មហិច្ឆតានុយក្លេអ៊ែរ ហើយការចរចានឹងជោគជ័យ។ ក្នុងករណីមិនអាចសម្រេចលទ្ធផលអ្វីទេនោះ លោក ត្រាំ ព្រមានថា លោកនឹងមិនទៅជួបលោក គីម ឡើយ។
«ប្រសិនបើខ្ញុំគិតថា នេះជាកិច្ចប្រជុំដែលមិនមានផ្លែផ្កា យើងនឹងមិនទៅប្រជុំឡើយ»។ នេះជាការបញ្ជាក់របស់លោក ត្រាំ ក្នុងសន្និសីទនៅឯរដ្ឋ Florida ។ លោកប្រធានាធិបតីអាមេរិកក៏បន្ថែមថា ទោះជាកិច្ចប្រជុំចាប់ផ្ដើម ហើយលោកកំពុងចូលរួមក្ដី បើគ្មានលទ្ធផលផ្លែផ្កាអ្វីទេ លោកនឹងនៅតែដើរចេញដដែល។
ការរៀបជំនួបលើកដំបូងនេះ កំពុងធ្វើឡើងយ៉ាងញាប់ដៃ។ លោក ត្រាំ បានបញ្ជូនប្រធានទីភ្នាក់ងារចារកម្ម (CIA) លោក Mike Pompeo ទៅកាន់កូរ៉េខាងជើងដើម្បីពិភាក្សាគម្រោងជំនួបនេះ។ ក្នុងដំណើរទស្សនកិច្ចទៅកាន់ក្រុងព្យុងយ៉ាង លោក Pompeo ក៏បានជួបជាមួយលោក គីម ដែរ ដោយលោក ត្រាំ លើកឡើងថា កិច្ចប្រជុំនេះធ្វើឡើងដោយរលូន និងបានបង្កើតទំនាក់ទំនងល្អផងដែរ ហើយព័ត៌មានលម្អិតជុំវិញជំនួបកំពូលក៏កំពុងរៀបចំដែរ។
ជុំវិញលទ្ធផលនៃការជួបគ្នារវាងលោក ត្រាំ និងលោក គីម លោក Pompeo រំពឹងថា នឹងទទួលបានផ្លែផ្កាខ្លះ តែមិនដល់ថ្នាក់សម្រេចគោលដៅធំឡើយ។ លោកប្រាប់សមាជិកសភាអាមេរិកថា អាមេរិកចង់បានកិច្ចព្រមព្រៀងមួយដែលកូរ៉េខាងជើងបញ្ឈប់សកម្មភាពកំរាមកំហែងអាមេរិក។ លោកទំនងចង់បានន័យថា កូរ៉េខាងជើងអាចមិនបោះបង់នុយក្លេអ៊ែរក្នុងការចរចាលើកទីមួយនេះទេ ហើយជំនួបលើកក្រោយៗ នឹងលេចជារូបរាងដើម្បីសម្រេចឲ្យការរំសាយនុយក្លេអ៊ែរពីឧបទ្វីបកូរ៉េ៕
Tag:
អាមេរិក
កូរ៉េខាងជើង
ដូណាល់ ត្រាំ
គីម ជុងអ៊ុន
© រក្សាសិទ្ធិដោយ thmeythmey.com