អន្តរជាតិ
ចិនទាត់ចោលរបាយការណ៍អាមេរិកដែលថា «គម្រោងខ្សែក្រវាត់និងផ្លូវ» ជាឈ្នាន់បង្កើនឥទ្ធិពល កំពង់ផែ Gwadar របស់ប៉ាគីស្ថាន ដែលសាងសង់ក្រោមគំនិតផ្ដួចផ្ដើមខ្សែក្រវាត់ និងផ្លូវរបស់ចិន
× នៅដើមសប្ដាហ៍នេះ ស្ថាប័នស្រាវជ្រាវ C4ADS ដែលមានមូលដ្ឋាននៅអាមេរិក បានចេញផ្សាយរបាយកាណ៍មួយស្ដីពីឥទ្ធិពលនៃគំនិតផ្ដួចផ្ដើមខ្សែក្រវាត់ និងផ្លូវរបស់ចិន។ បើតាម C4ADS គោលដៅពិតប្រាកដរបស់នៃគម្រោងដែលមានទឹកប្រាក់រាប់ពាន់លានដុល្លារនេះ គឺពង្រីកឥទ្ធិពលនយោបាយ និងវត្តមានយោធាចិននៅឡើពិភពលោក។ យ៉ាងណាមិញ ក្រុងប៉េកាំងបានចាត់ទុករបាយការណ៍នេះជាការមើលចិនក្នុងផ្លូវអាក្រក់។
នៅក្នុងរបាយការណ៍របស់ខ្លួន វិទ្យាស្ថានស្រាវជ្រាវ C4ADS បានវិភាគពីឯកសារផ្លូវការ និងមិនផ្លូវការរបស់មន្ត្រីចិនជុំវិញគំនិតផ្ដួចផ្ដើមខ្សែក្រវាត់ និងផ្លូវ ដែលដាក់ចេញដោយលោកប្រធានាធិបតី ស៊ី ជិនភីង ក្នុងឆ្នាំ២០១៣ ។ វិទ្យាស្ថាននេះមានគោលដៅស្វែងរកបំណងពិតរបស់ចិនលើគម្រោងអភិវឌ្ឍហេដ្ឋារចនាសម្ព័ន្ធតភ្ជាប់ប្រជាជនពិភពលោកជាង៦៥ភាគរយក្នុងប្រទេសជាង៦០នៃតំបន់អាស៊ី អាហ្វ្រិក និងអឺរ៉ុប ដែលស្ថិតតាមផ្លូវសូត្របុរាណ។
បើតាមទីភ្នាក់ងារព័ត៌មាន AP វិទ្យាស្ថាន C4ADS បានសិក្សាលើគម្រោងដែលផ្ដល់ហិរញ្ញវត្ថុដោយចិននៅតាមប្រទេសមួយចំនួនដូចជា បង់ក្លាដែស ស្រីលង្កា កម្ពុជា ឥណ្ឌូណេស៊ី អូម៉ង់ និងប្រទេសផ្សេងទៀតនៃតំបន់ឥណ្ឌូ-ប៉ាស៊ីហ្វិក។ លទ្ធផលដែលចេញផ្សាយនៅដើមសប្ដាហ៍នេះបង្ហាញថា គម្រោងរបស់ចិនមិនមែនកើតឡើងដោយសារការអភិវឌ្ឍសេដ្ឋកិច្ចឈ្នះ-ឈ្នះដូចការអះអាងឡើយ តែជាគម្រោងបង្កើតឥទ្ធិពលផ្នែកនយោបាយ ពង្រីកវត្តមានយោធា និងយុទ្ធសាស្ត្រក្នុងតំបន់ទៅវិញ។
យ៉ាងណាក្ដី ក្រុងប៉េកាំងបានទាត់ចោលរបាយការណ៍របស់ស្ថាប័នស្រាវជ្រាវអាមេរិកខាងលើនេះ។ អ្នកនាំពាក្យក្រសួងការបរទេសចិន Hua Chunying បានបកស្រាយការពារគំនិតផ្ដួចផ្ដើមខ្សែក្រវាត់ និងផ្លូវ។ ក្នុងសន្និសីទសារព័ត៌មាននៅថ្ងៃទី១៨ ខែមេសា អ្នកនាំពាក្យរូបនេះលើកឡើងថា គម្រោងដ៏ធំនេះមានគោលដៅជំវុញកិច្ចសហប្រតិបត្តិការសេដ្ឋកិច្ច និងជំរុញការអភិវឌ្ឍ ហើយចិនគោរពតាមគោលការណ៍ពិភាក្សាគ្នា តម្លាភាព និងផលប្រយោជន៍រួមគ្នា។
ដោយចង់រិះគន់អ្នកសរសេររបាយការណ៍របស់ C4ADS លោកស្រីនាំពាក្យខាងលើបានផ្ញើសារថា៖ «បើពួកគេបន្តមើលអ្នកផ្សេង និងពិភពលោកដោយគំនិតខ្មៅងងឹត និងតាមរយៈកញ្ចក់ប្រឡាក់ ពួកគេនឹងឃើញគ្រប់យ៉ាងសុទ្ធតែងងឹត និងអន្ទាក់។ ផ្ទុយទៅវិញ ប្រសិនបើពួកគេបើកចំហ និងដោយចិត្តទូលាយ ពួកគេនឹងឃើញពិភពលោកមានពន្លឺព្រះអាទិត្យ ដែលភ្លឺថ្លា និងកក់ក្ដៅ»។
តាមពិតទៅ វាជារឿងមិនអាចប្រកែកបានដែលឥទ្ធិពលចិនពិតជារីកសាយភាយក្នុងក្របខណ្ឌវិថីសូត្រថ្មីនេះ។ លោក Peter Cai អ្នកស្រាវជ្រាវនៅឯវិទ្យាស្ថាន Lowry និយាយថា ការតភ្ជាប់ថ្មីនេះនឹងបង្កើតសកម្មភាពសេដ្ឋកិច្ច ដែលនោះមានន័យថា ប្រទេសមួយនឹងមានឥទ្ធិពលផ្នែកសេដ្ឋកិច្ចដែរ ហើយដូចដែលបានដឹង ឥទ្ធិពលលើវិស័យសេដ្ឋកិច្ចនេះអាចប្រែទៅកូនជញ្ជីងផ្នែកនយោបាយ និងអំណាចតែម្ដង។ នេះបើតាមការផ្សាយរបស់សារព័ត៌មាន South China Morning Post ៕
© រក្សាសិទ្ធិដោយ thmeythmey.com