អន្តរជាតិ
IMF៖ ៥ ឆ្នាំទៀត ស្ថានភាពបំណុលអាមេរិកអាក្រក់ជាងរដ្ឋអាហ្វ្រិកខ្លះទៅទៀត
× មូលនិធិរូបិយវត្ថុអន្តរជាតិ (IMF) បានព្យាករថា អត្រាបំណុលរបស់អាមេរិកនឹងកើនឡើងខ្ពស់នៅរយៈពេល៥ឆ្នាំមុខ។ ការកើនឡើងបំណុលនេះ នឹងធ្វើឲ្យស្ថានភាពនៃបំណុលរបស់មហាអំណាចមួយនេះយ៉ាប់យ៉ឺនជាងប្រទេសនៃតំបន់អាហ្វ្រិកខ្លះទៅទៀត។ កំណើនការចាយវាយ និងការបាត់បង់ចំណូលដោយសារនយោបាយកាត់បន្ថយពន្ធ ជាមូលហេតុធ្វើឲ្យបំណុលអាមេរិកកើនឡើងខ្លាំង ទោះជារដ្ឋបាលលោក ដូណាល់ ត្រាំ រំពឹងយកចំណូលពីសេដ្ឋកិច្ចដើម្បីទូទាត់ការចំណាយដ៏ច្រើនក្ដី។
នៅត្រឹមឆ្នាំ២០២៣ អត្រាបំណុលធៀបនឹងផលិតក្នុងស្រុករបស់អាមេរិក នឹងកើនដល់១១៦.៩ភាគរយ ដោយនាំមុខអ៊ីតាលីដែលជាសមាជិកនៃប្រទេសមានសេដ្ឋកិច្ចរីកចម្រើនទាំង៧របស់ពិភពលោក។ អត្រាបំណុលរបស់រដ្ឋអឺរ៉ុបអ៊ីតាលីមានកម្រិត ១១៦.៦ភាគរយ។ របាយការណ៍របស់មូលនិធិរូបិយវត្ថុអន្តរជាតិ (IMF) ដែលចេញផ្សាយនៅថ្ងៃ ១៨ ខែមសា បានផ្ដល់ចំណាត់ថ្នាក់ឲ្យអាមេរិកស្ថិតនៅពីលើរដ្ឋអាហ្វ្រិកដូចជាម៉ូសំប៊ិក និងប៊ូរុនឌីទៅទៀត។
របាយការណ៍របស់ IMF ធ្វើឲ្យគេងាកទៅចាប់អារម្មណ៍ការធ្លាក់ចុះថវិកាជាតិរបស់អាមេរិក បន្ទាប់ពីការអនុម័តច្បាប់កាត់បន្ថយពន្ធចំនួន១.៥ទ្រីលានដុល្លារ និងថវិកាសម្រាប់ចំណាយ៣០០ពាន់ដុល្លារ។ រដ្ឋបាលប្រធានាធិបតី ដូណាល់ ត្រាំ អះអាងថា ការកាត់បន្ថយពន្ធ រួមគ្នានឹងការកាត់បន្ថយបញ្ញត្តិសម្រាប់ការរកស៊ី នឹងជួយជំរុញសេដ្ឋកិច្ច ដែលត្រឡប់មកវិញនឹងបង្កើតចំណេញដើម្បីការពារហានិភ័យហិរញ្ញវត្ថុ។
យ៉ាងណាមិញ មន្ត្រីធនាគារអាមេរិក និងការិយាល័យថវិកាសភា (CBO) ហាក់សង្ស័យក្ដីរំពឹងរបស់រដ្ឋបាលលោក ត្រាំ ដោយសារការព្យាករណ៍ពីកំណើនសេដ្ឋកិច្ចអាមេរិកនៅរយៈពេលវែងរបស់ស្ថាប័នទាំងពីរមានកម្រិតទាប។ នេះមានន័យថា អាមេរិកនឹងមិនអាចរកប្រាក់ដើម្បីទូទាត់ការចំណាយរបស់ខ្លួនបាន។ ធនាគារអាមេរិកវាយតម្លៃថា អត្រាកណ្ដាលនៃការរីកចម្រើនសេដ្ឋកិច្ចនឹងធ្លាក់ចុះដល់២ភាគរយនៃឆ្នាំ២០២០ ឯ CBO ព្យាករថា កំណើន GDP នឹងមានអត្រា១.៨ភាគរយនៅឆ្នាំ២០២០។
តាំងពីឆ្នាំ២០០១ មក ការចំណាយរបស់អាមេរិកបានកើនឡើងយ៉ាងរហ័ស នៅពេលដែលសម័យកាលថវិកាលើសរបស់អាមេរិកត្រូវបានបញ្ចប់។ ការកាត់បន្ថយពន្ធដែលមិនអាចទូទាត់វិញបានដោយការកាត់បន្ថយចំណាយ និងកំណើនសេដ្ឋកិច្ច, សង្គ្រាមអ៊ីរ៉ាក់ និងយុទ្ធនាការប្រឆាំងភេរវកម្ម ក៏ដូចជាផលប៉ះពាល់វិបត្តិហិរញ្ញវត្ថុ ជាមូលហេតុនៅពីក្រោយការរីករាលដាលឱនភាពសេដ្ឋកិច្ច និងកំណើនបំណុលជាតិ។
ជុំវិញបរិមាណបំណុលនេះដែរ ទំហំបំណុលជាតិរបស់អាមេរិកមានដល់ទៅ ២១.៤ទ្រីលានដុល្លារ ឯចិន គឺជាម្ចាស់ធំជាងគេរបស់អាមេរិក។ ស្ថិតិរបស់ក្រសួងរតនាគារអាមេរិកបង្ហាញថា បំណុលរដ្ឋាភិបាលអាមេរិកជំពាក់ចិនមានចំនួន១.២ទ្រីលានដុល្លារ ដែលភាគច្រើនក្នុងរូបភាពជាហ៊ុន។ មានន័យថា ចិននាំចូលទំនិញជាច្រើនចូលទីផ្សារអាមេរិក ហើយអាមេរិកទូទាត់ជាហ៊ុនវិញ។ នេះបើតាមការផ្សាយរបស់ CNN Money ៕
Tag:
អាមេរិក
អាហ្វ្រិក
បំណុល
IMF
© រក្សាសិទ្ធិដោយ thmeythmey.com