កីឡាអន្តរជាតិ
អន្តរជាតិ
Alvarez ត្រូវហាមឡើងសង្វៀន៦ខែ ចំជំនួបជម្រះបញ្ជីជាមួយ Golovkin
× កីឡាករប្រដាល់សកលលំដាប់ពិភពលោក Saul Canelo Alvarez ត្រូវបានហាមឃាត់មិនឲ្យប្រកួតរយៈពេល ៦ ខែ គិតចាប់ពីថ្ងៃទី ១៧ ខែកុម្ភៈតទៅ បន្ទាប់ពីរកឃើញថាមានផ្ទុកសារធាតុហាមឃាត់ ក្រោយធ្វើតេស្តវិជ្ជមានចំនួន២លើកនៅក្នុងឆ្នាំនេះ។ នេះបើតាមការផ្សាយរបស់ BBC។
អ្នកប្រដាល់ម៉ិកស៊ិក វ័យ២៧ឆ្នាំរូបនេះត្រូវបានធ្វើតេសត្តដោយស្ម័គ្រចិត្តម្តងហើយកាលពីថ្ងៃទី ១៧ ខែកុម្ភៈ ឆ្នាំ២០១៨ ដែលរកឃើញថាមានស្លាកស្នាមកាកសំណល់នៃសារធាតុ Clenbuterol នៅក្នុងរាងកាយបន្ទាប់ពីរូបគេបានបរិភោគសាច់កខ្វក់ ដែលជាសារធាតុត្រូវបានហាមឃាត់ក្នុងសកម្មភាពកីឡា។ Clenbuterol ត្រូវបានគេប្រើដើម្បីព្យាបាលជំងឺហឺតប៉ុន្តែវាក៏អាចជួយបង្កើតម៉ាសសាច់ដុំខ្លាញ់ និងដុតជាតិខ្លាញ់ពីរាងកាយផងដែរ។ ការធ្វើតេស្តលើកទី២ រូបគេនៅតែរកឃើញថាមានផ្ទុកសារធាតុហាមឃាត់នេះដដែល។
ការហាមមិនឲ្យមានសកម្មភាពប្រដាល់រហូតដល់ទៅ ៦ខែ នឹងធ្វើឲ្យប៉ះពាល់ដល់ជំនួបរវាង Alvarez ជាមួយអ្នកប្រដាល់មិនដែលចាញ់ Gennadyevich Golovkin ជាលើកទី២ ដែលប្រព្រឹត្តិទៅនៅថ្ងៃទី ៥ ខែឧសភា ឆ្នាំ២០១៨ ដោយត្រូវលើកពេលវិញ ហើយត្រូវរង់ចាំទាល់តែផុតបម្រាមនៅថ្ងៃទី ១៧ ខែសីហា ឆ្នាំ២០១៨។
បើតាមសម្តីរបស់អ្នកផ្គូផ្គងកីឡាប្រដាល់ Golden Boy (លោក Oscar De La Hoya) ថា Alvarez នឹងត្រឡប់ទៅកាន់សង្វៀនវិញនៅខែកញ្ញា នាថ្ងៃបុណ្យឯករាជ្យជាតិរបស់ម៉ិកស៊ិក។
ទាក់ទិននឹងករណីខាងលើ អ្នកប្រដាល់ដែលធ្លាប់ប្រកួត ៥១ដង ឈ្នះ៤៩ ស្មើ១ និងចាញ់ម្តងបានលើកឡើងក្នុងសវនាការគណៈកម្មាធិការអត្តពលកម្មរដ្ឋ Nevada សហរដ្ឋអាមេរិក នៅថ្ងៃទី១៨ ខែមេសានេះថា រូបគេមានការភ្ញាក់ផ្អើល និងរំខានដោយសារការរកឃើញនៃការធ្វើតេស្តនេះ។ លើសពីនេះទៀតរូបគេ ក៏បានបន្ទោសទៅលើការចម្លងរោគសាច់ដែលបានប៉ះពាល់ដល់អត្តពលិករាប់សិបនាក់នៅម៉ិកស៊ិកក្នុងរយៈពេលប៉ុន្មានឆ្នាំចុងក្រោយនេះ។ ហើយដោយសារបញ្ហានេះ បច្ចុប្បន្ន Alvarez ត្រូវផ្លាស់ទីហ្វឹកហាត់របស់គេ ពីម៉ិកស៊ីកទៅសហរដ្ឋអាមេរិកទៀតផង៕
Tag:
ប្រដាល់
សារធាតុហាមឃាត់
Saul Canelo Alvarez
Gennady Golovkin
© រក្សាសិទ្ធិដោយ thmeythmey.com