ម្ចាស់ជើងឯកឆ្នាំ១៩៦៦ អង់គ្លេស ដែលបានកៅអីទៅកាន់ការប្រកួតដណ្តើមពានរង្វាន់ FIFA World Cup ឆ្នាំ ២០១៨ នៅរុស្ស៊ី ត្រូវប៉ះជាមួយក្រុមខ្លាំងពីទ្វីបអឺរ៉ុបដូចគ្នា បែលហ្ស៊ិក ប៉ាណាម៉ាពីអាមេរិកកណ្តាល និងទុយនេស៊ីពីអាហ្វ្រិក សម្រាប់វគ្គសន្សំពិន្ទុពូល G។
គ្រូបង្វឹក៖ លោក Gareth Southgate (អង់គ្លេស)
Southgate បានឡើងដឹកនាំក្រុមជម្រើសជាតិអង់គ្លេសជំនួសលោក Sam Allardyce កាលពីខែកញ្ញាឆ្នាំ ២០១៦ មុនពេលតែងតាំងជាផ្លូវការនៅថ្ងៃទី ៣០ ខែវិច្ឆិកាឆ្នាំ ២០១៦។ អតីតខ្សែការ វ័យ៤៧ឆ្នាំនេះ ក៏ជាសមាជិកអង់គ្លេសក្នុងព្រឹត្តិការណ៍ World Cup ឆ្នាំ១៩៩៨ នៅបារាំង និង ២០០២ នៅកូរ៉េ-ជប៉ុន។ Southgate នាំក្រុមរហស្សនាមតោកំណាចបានសិទ្ធិទៅរុស្ស៊ីឆ្នាំ២០១៨ បន្ទាប់ពីដឹកនាំក្រុមឈរនៅកំពូលតារាងនៃវគ្គជម្រុះតាមពូល។
កីឡាករឆ្នើម៖ Harry Kane
ដោយត្រូវបានសរសើរថាជា «កីឡាករពេញលក្ខណៈ» ពីសំណាក់អ្នកចាត់ការទូទៅ Real Madrid លោក Zinedine Zidane ហើយនោះ ឥឡូវនេះ Kane បានបង្កើនភាពខ្លាំង និងរឹងមាំថែមទៀតក្នុងនាមជាខ្សែប្រយុទ្ធឈានមុខគេមួយរូបលំដាប់ពិភពលោក។ តារាឆ្នើមរបស់ Tottenham Hotspur វ័យ២៤ឆ្នាំរូបនេះ អាចស៊ុតបាល់បញ្ចូលទីចំនួន ៥ គ្រាប់ក្នុងការបង្ហាញខ្លួន ៦លើកឲ្យជម្រើសជាតិអង់គ្លេសអំឡុងការប្រកួតជម្រុះ ដើម្បីឆ្ពោះទៅរុស្ស៊ីនាព្រឹត្តិការណ៍បាល់ទាត់ពិភពលោក។
ប្រវត្តិក្នុង World Cup៖
ជាវត្តមានលើកទី ១៥ របស់ក្រុមជម្រើសជាតិអង់គ្លេស បន្ទាប់ពីការបង្ហាញខ្លួនលើកដំបូងក្នុងឆ្នាំ១៩៥០ និងចុងក្រោយឆ្នាំ២០១៤។ លទ្ធផលល្អបំផុតដែលពួកគេទទួលបាន គឺលើកពាននេះ១លើកក្នុងឆ្នាំ១៩៦៦ ក្នុងនាមជាម្ចាស់ផ្ទះ។ អង់គ្លេស ស្ថិតក្នុងចំណាត់ថ្នាក់លេខ ១៥ ពិភពលោក ក្នុងតារាង FIFA Ranking។
កម្មវិធីប្រកួត៖
- ១៩ មិថុនា៖ ទុយនេស៊ី Vs អង់គ្លេស (ម៉ោង ១អធ្រាត្រ ម៉ោងនៅកម្ពុជា)
- ២៤ មិថុនា៖ អង់គ្លេស Vs ប៉ាណាម៉ា (ម៉ោង ៧យប់)
-២៩ មិថុនា៖ អង់គ្លេស Vs បែលហ្ស៊ិក (ម៉ោង ១អធ្រាត្រ)