ជាតិ
សង្គមជាតិ
សមត្ថកិច្ច ចុះពិនិត្យសិប្បកម្មមួយកន្លែង ក្នុងស្រុកស្អាង ដែលផលិតភេសជ្ជៈខ្វះស្ដង់ដារ និងមិនស្របតាបច្បាប់
×![]()
សមត្ថកិច្ចចម្រុះដែលដឹកនាំដោយ ឧត្តមសេនីយ៍ឯក ចាន់ វ៉ាន់ធឿន ប្រធាននាយកដ្ឋាននគរបាលប្រឆាំងបទល្មើសសេដ្ឋកិច្ច បានចុះត្រួតពិនិត្យសិប្បកម្មមួយកន្លែង នៅជិតរាជធានីភ្នំពេញ ដោយរកឃើញថា ការផលិតភេសជ្ជៈមិនទៅតាមស្តង់ដារ ហើយមិនអនុលោមតាមច្បាប់។ នេះបើតាមគេហទំព័រអគ្គស្នងការដ្ឋាននគរបាលជាតិ។
សមត្ថកិច្ច បានរកឃើញ ការផលិតភេសជ្ជៈជាច្រើនប្រភេទដែលមានម៉ាកដូចជា B-Smart Grean Tea, Honey, Strawberry, Energy Drinkប៉ៃតង Energy Drink ខៀវ ក្នុងរោងចក្រសិប្បកម្មនេះ។ នេះបើតាមលោក ម៉ាត់ យូសុះ នាយការិយាល័យប្រឆាំងបទល្មើសកម្មសិទ្ធបញ្ញា ដែលគេហទំព័រអគ្គស្នងការនគរបាលជាតិបានស្រង់សម្ដី។
អគ្គស្នងការនគរបាលជាតិ បានចុះផ្សាយពីការលើកឡើងរបស់លោក លោក ម៉ាត់ យូសុះ ទៀតថា ការផលិតមិនបានអនុលោមត្រឹមត្រូវតាមការចុះបញ្ជី នៅវិទ្យាស្ថានស្តង់ដាកម្ពុជានៅឡើយទេ។ លោក បន្ថែមថា សូម្បីទីតាំង ក៏មិនបានរៀបចំទៅតាមបទដ្ឋានត្រឹមត្រូវដែរ និងខ្វះអនាម័យក្នុងការផលិត។
សមត្ថកិច្ចចម្រុះដឹកនាំដោយ លោក ចាន់ វ៉ាន់ធឿន ដែលបានចុះទៅត្រួតពិនិត្យ មិនបានបិទការផលិតភេសជ្ជៈនោះឡើយ គ្រាន់តែណែនាំម្ចាស់សិប្បកម្ម ឲ្យផលិតភេសជ្ជៈស្របតាមស្តង់ដារ និងមានអនាម័យប៉ុណ្ណោះ។ នេះជាអះអាងរបស់លោក ម៉ាត់ យូសុះ ដដែល ដោយបន្តថា ករណីដែលមិនបិទសិប្បកម្ម តម្រូវឲ្យម្ចាស់ផលិតភេសជ្ជៈកែប្រែ និងធ្វើទៅតាមបទដ្ឋានបច្ចេកទេសដែលមានអនាម័យត្រឹមត្រូវ។
សូមបញ្ជាក់ថា ទីតាំងដែលសមត្ថកិច្ចចម្រុះចុះទៅត្រួតពិនិត្យសិប្បកម្មផលិតភេសជ្ជៈនេះ ស្ថិតនៅឃុំស្វាយរលំ ស្រុកស្អាង ខេត្ត កណ្តាល ដែលនៅមិនឆ្ងាយប៉ុន្មានឡើយពីរាជធានីភ្នំពេញ៕
Tag:
រោងចក្រសិប្បកម្ម
ភេសជ្ជៈខុសច្បាប់
© រក្សាសិទ្ធិដោយ thmeythmey.com
