វៀតណាម៖ រដ្ឋណាក៏ដោយដែលចូលប្រជុំកោះពីរនៅសមុទ្រចិនខាងត្បូងដោយគ្មានការយល់ព្រមពីខ្លួន គឺខុសច្បាប់

អន្តរជាតិ

វៀតណាម៖ រដ្ឋណាក៏ដោយដែលចូលប្រជុំកោះពីរនៅសមុទ្រចិនខាងត្បូងដោយគ្មានការយល់ព្រមពីខ្លួន គឺខុសច្បាប់

21, Apr 2018 , 3:00 pm

រូបភាព

ដោយ:

រដ្ឋាភិបាលក្រុងហាណូយ បានចេញមុខជំទាស់ និងប្រតិកម្មជាថ្មីពាក់ព័ន្ធនឹងសកម្មភាពនានាដែលបង្កឡើយដោយរដ្ឋពាក់ព័ន្ធនៅក្នុងតំបន់មានវិវាទសមុទ្រចិនខាងត្បូង។ សម្រាប់វៀតណាម រដ្ឋណាក៏ដោយ ឲ្យតែចូលធ្វើសកម្មភាពនៅក្នុងតំបន់មានជម្លោះនោះដោយមិនមានការយល់ព្រមពីវៀតណាម គឺជាសកម្មភាពខុសច្បាប់ហើយ ។

អ្នកនាំពាក្យក្រសួងការបរទេសវៀតណាម លោកស្រី Lê Thị Thu Hằng នៅថ្ងៃទី១៩ មេសា បានថ្លែងក្នុងសន្និសីទសារព័ត៌មានប្រចាំថ្ងៃថា រាល់សកម្មភាពឯកតោភាគីរបស់រដ្ឋណាមួយ ដែលធ្វើឡើងក្នុងតំបន់ប្រជុំកោះ Paracel និង Sprately ដោយពុំមានការយល់ព្រមពីវៀតណាម នឹងត្រូវចាត់ទុកថាជាសកម្មភាពល្មើសហើយ ។ នេះបើយោងតាមការចុះផ្សាយរបស់សារព័ត៌មានវៀណាម Vietnam News ។

តាមរយៈសន្និសីទសារព័ត៌មាននោះ លោកស្រីអ្នកនាំពាក្យ បានបញ្ជាក់ពីជំហរបស់វៀតណាមជាថ្មីថា៖«វៀតណាម មានអធិបតេយ្យ និងយុត្តាធិការលើប្រជុំកោះទាំងពីរ នៃសមុទ្រចិនខាងត្បូង ដែលអធិបតេយ្យនោះ ក៏ស្របតាមបទបញ្ញត្តិនៃច្បាប់អន្តរជាតិដែលរាប់បញ្ចូលទាំងអនុសញ្ញាអង្គការសហប្រជាជាតិស្តីពីច្បាប់សមុទ្រ ឆ្នាំ១៩៨២ ផងដែរ»។ នេះបើយោងតាមប្រភពព័ត៌មានដដែល ។

អ្វីដែលគួរកត់សម្គាល់នោះ ការលើកឡើងរបស់ក្រុងហាណូយ ធ្វើឡើង ដើម្បីឆ្លើយតបទៅនឹងអ្នកសារព័ត៌មាន ដែលសួរថាតើវៀតណាម មានប្រតិកម្មបែបណាចំពោះរបាយការណ៍ ដែលបានរាយការណ៍ថា ក្រុងប៉េកាំង ទើបតែបានបញ្ចប់ការធ្វើសមយុទ្ធយោធា នៅក្នុងសមុទ្រចិនខាងត្បូងនោះ ។

សូមជម្រាបផងដែរថា សមុទ្រចិនខាងត្បូង គឺជាតំបន់វិវាទអធិបតេយ្យដែនសមុទ្រ ដែលមានរដ្ឋពាក់ព័ន្ធ ដូចជាប្រទេសអាស៊ានរួមមាន ព្រុយណេ ម៉ាឡេស៊ី ហ្វីលីពីន និងវៀតណាម ជាមួយចិន ។ ប្រទេសពាក់ព័ន្ធទាំងនេះ បានទាមទារត្រួតស៊ីគ្នាលើតំបន់ប្រជុំកោះ Paracel និង Sprately ។

ក្រោយពីហ្វីលីពីន ដែលកំពុងតែដឹកនាំដោយលោកប្រធានាធិបតី រ៉ូឌ្រីហ្គោ ឌូទើតេ បានផ្លាស់ប្តូរឥរិយាបថទន់ភ្លន់ជាមួយនឹងចិនក្នុងការដោះស្រាយជម្លោះនេះ វៀតណាម បានក្លាយជារដ្ឋអាស៊ានតែមួយគត់ ដែលតែងតែចេញមុខថ្កោលទោស និងប្រតិកម្មខ្លាំងៗទៅលើសកម្មភាពរបស់ចិន ដែលវៀតណាម ចាត់ទុកថា ជាការបំពានអធិបតេយ្យលើតំបន់ ដែលខ្លួនមានយុត្តាធិការផងនោះ ៕