លោក ម៉ាក្រុង ថា អាមេរិក បារាំង និងសម្ព័ន្ធមិត្តត្រូវចាំជួយកសាងស៊ីរីជាថ្មី ពេលជម្លោះចប់

អន្តរជាតិ

លោក ម៉ាក្រុង ថា អាមេរិក បារាំង និងសម្ព័ន្ធមិត្តត្រូវចាំជួយកសាងស៊ីរីជាថ្មី ពេលជម្លោះចប់

23, Apr 2018 , 4:20 pm

រូបភាព

ដោយ: តន ចាន់រិទ្ធារ៉ា

ប្រធានាធិបតីបារាំង អេម៉ានុយអែល ម៉ាក្រុង និយាយថា អាមេរិក បារាំង និងសម្ព័ន្ធមិត្ត គួរបន្តស្ថិតនៅស៊ីរីទៀត ទោះជាវិបត្តិរ៉ាំរៃនេះត្រូវបញ្ចប់ក៏ដោយ។ វត្តមានរបស់បស្ចិមប្រទេសនៅស៊ីរី បើតាមលោក ម៉ាក្រុង គឺការពារស៊ីរីពីការធ្លាក់ចូលសង្គ្រាមថ្មីទៀតដែលបង្កដោយអ៊ីរ៉ង់ និងរដ្ឋាភិបាលលោក បាសា អាល់អាសាដ ។ ប៉ុន្តែក្នុងកិច្ចសម្ភាសជាមួយប្រព័ន្ធផ្សព្វផ្សាយអាមេរិក ប្រធានាធិបតីបារាំងរូបនេះមិនបាននិយាយទេថា ជម្លោះនៅស៊ីរីនឹងត្រូវចប់នៅពេលណាឡើយ។

មុនដំណើរទស្សនកិច្ចផ្លូវរដ្ឋទៅកាន់អាមេរិក ប្រធានាធិបតីបារាំង អេម៉ានុយអែល ម៉ាក្រុង បានលើកឡើងថា ក្រុមសម្ព័ន្ធមិត្តមិនគួរចាកចេញពីស៊ីរីភ្លាមៗឡើយ ពេលជម្លោះចប់។ ការបន្តវត្តមានរបស់អាមេរិក បារាំង និងសម្ព័ន្ធមិត្តនៅទឹកដីស៊ីរីត្រូវបានលោក ម៉ាក្រុង លើកជាគំនិតថា ដើម្បីស្ថាបនាស៊ីរីឡើងវិញ។ សង្គ្រាមក្នុងស្រុករយៈពេល ៧ ឆ្នាំមកនេះពិតជាបានបំផ្លាញស៊ីរីស្ទើរដល់ចំណុចសូន្យតែម្ដង ហើយត្រូវចំណាយថវិកាសន្ធឹកសន្ធាប់ដើម្បីស្ដារប្រទេសមួយនេះវិញ។

ក្នុងសម្ភាសជាមួយទូរទស្សន៍អាមេរិក Fox News ដែលផ្សាយនៅថ្ងៃទី២២ ខែមេសា លោក ម៉ាក្រុង បញ្ជាក់ថា៖ «យើងត្រូវសាងសង់ ស៊ីរីថ្មីមួយ ក្រោយចប់សង្គ្រាម។ ចំណែកឯអាមេរិកត្រូវដើរតួនាទីសំខាន់ណាស់ក្នុងដំណើរការនេះ»។ លោក ម៉ាក្រុង បន្ថែមថា មិនមែនទាល់តែមានទាហានអាមេរិកទើបអនុវត្តផែនការនេះបានឡើយ តែជានយោបាយការបរទេសរបស់អាមេរិក និងលោកប្រធានាធិបតីដូណាល់ ត្រាំ ផ្ទាល់ផង។

គោលដៅសំខាន់មួយទៀតដែលអាមេរិក និងសម្ព័ន្ធមិត្តត្រូវរក្សាវត្តមាននៅស៊ីរី គឺទប់ទល់អ៊ីរ៉ង់ និងកម្លាំងលោកប្រធានាធិបតី បាសា អាល់អាសាដ ។ បើតាមប្រធានាធិបតីបារាំង នៅថ្ងៃដែលក្រុមសម្ព័ន្ធមិត្តលោកខាងលិចកម្ចាត់ក្រុមរដ្ឋឥស្លាមបាន ហើយចាកចេញពីស៊ីរីភ្លាម នោះមានន័យថា លោកខាងលិចទុកឱកាសឲ្យរបបដឹកនាំអ៊ីរ៉ង់ និងលោក អាសាដ ហើយពួកគេនឹងធ្វើសង្គ្រាមថ្មីទៀត ព្រមទាំងបង្កើតភេរវករថ្មីដែរ។

នៅពេលថ្មីៗនេះ បារាំងបានចេញមុខចេញមាត់ស្នើឲ្យអាមេរិករក្សាវត្តមាននៅស៊ីរីឲ្យបានយូរអង្វែង បន្ទាប់ពីលោក ដូណាល់ ត្រាំ ចង់ដកទាហានអាមេរិកឲ្យបានឆាប់។ កាលពីសប្ដាហ៍មុន លោក ម៉ាក្រុង បាននិយាយក្ដែងៗថា លោកជាអ្នបញ្ចុះបញ្ចូលឲ្យលោក ត្រាំ រក្សាទុកកងទ័ពអាមេរិកនៅស៊ីរីដដែលដើម្បីសម្រេចគោលដៅមួយចំនួនផ្សេងទៀត។ ប្រធានាធិបតីអាមេរិកក៏ជាអ្នកទទូចឲ្យសមភាគីអាមេរិកវាយប្រហារលើស៊ីរីក្រោមហេតុផលថា លោក អាសាដ ប្រើអាវុធគីមីលើជនស្លូតត្រង់ផង។

នៅដើមសប្ដាហ៍នេះ លោក ម៉ាក្រុង នឹងជួបជាមួយសមភាគីអាមេរិករបស់លោកចាប់ពីថ្ងៃ ២៣ ដល់ថ្ងៃ ២៥ ខែមេសា ហើយសំណុំរឿងស៊ីរីទំនងជាប្រធានបទសំខាន់មួយផង ខណៈបារាំង និងអាមេរិកទើបចាប់ដៃគ្នាបាញ់មីស៊ីលដាក់របបលោក អាសាដ រួចមក។ យ៉ាងណា លោក ម៉ាក្រុង ក៏មិនភ្លេចតួនាទីរបស់រុស្ស៊ី និងតួកគីក្នុងដំណើរការសាងសង់ស៊ីរីវិញដែរ៕