អន្តរជាតិ
លោក ត្រាំ ថា ការលុបបំបាត់នុយក្លេអ៊ែរកូរ៉េខាងជើងអាចជោគជ័យ ហើយក៏អាចអត់ ប្រធានាធិបតី ដូណាល់ ត្រាំ (រូបភាព AFP)
× នៅមុនជំនួបជាមួយមេដឹកនាំកូរ៉េខាងជើង ប្រធានាធិបតីអាមេរិក ដូណាល់ ត្រាំ នៅថ្ងៃទី២២ ខែមេសា បានបង្ហាញជំហរប្រុងប្រយ័ត្នជុំវិញការចរចានេះ និងបានលើកឡើងថា ការជជែកជាមួយកូរ៉េខាងជើងដើម្បីរំសាយនុយក្លេអ៊ែរអាចនឹងមិនជោគជ័យតាមការចង់បានឡើយ។ លោក ត្រាំ លើកឡើងបែបនេះ តែមួយថ្ងៃក្រោយកូរ៉េខាងជើងប្រកាសឈប់សាកល្បងនុយក្លេអ៊ែរ និងបាញ់មីស៊ីល។ នេះជាសម្បទានដ៏ធំមួយរបស់កូរ៉េខាងជើងមុនជំនួបខាងមុខ។
«យើងស្ថិតលើផ្លូវវែងឆ្ងាយទៀតលើការបញ្ចប់បញ្ហាជាមួយកូរ៉េខាងជើង»។ នេះជាសំណេរលើបណ្ដាញសង្គម Twitter របស់ប្រធានាធិបតីអាមេរិក ដូណាល់ ត្រាំ នៅថ្ងៃទី២២ ខែមេសា ជុំវិញការរំសាយនុយក្លរអ៊ែរពីឧបទ្វីបកូរ៉េ។ នេះមានន័យថា ការដោះស្រាយបញ្ហានុយក្លេអ៊ែរកន្លងមក នៅតែអាចបរាជ័យដដែល ទោះជាមានការប្រឹងប្រែងខ្លាំងពីភាគីទាំងឡាយក្ដី។
នៅថ្ងៃទី២១ ខែមេសា កូរ៉េខាងជើងបានប្រកាសថា ខ្លួនលែងសាកល្បងនុយក្លេអ៊ែរ និងមីស៊ីលបាលីស្ទិកទៀតហើយ និងកម្ទេចទីតាំងសាកល្បងនុយក្លេអ៊ែរផងដែរ។ ទោះជាកូរ៉េខាងជើងផ្លាស់ប្ដូជំហរបែបនេះក្ដី លោក ត្រាំ នៅតែមិនទាន់ជឿជាក់ថា ការដោះស្រាយបញ្ហានុយក្លេអ៊ែរនេះអាចសម្រេចបានលទ្ធផលវិជ្ជមានឡើយ។ ក្នុងសំណេរដដែល ប្រធានាធិបតីអាមេរិកនិយាយថា បញ្ហាអាចដោះស្រាយបាន ហើយប្រហែលជាមិនអាចដោះស្រាយបានដែរ ហើយមានតែពេលវេលានឹងប្រាប់ពីអ្វីដែលកើតឡើង។
ត្រង់ចំណុចនេះ លោក ត្រាំ បានរិះគន់ប្រធានាធិបតីអាមេរិកមុន ដែលមិនព្រមដោះស្រាយបញ្ហានេះឲ្យស្រេចបាច់ និងទុកឲ្យបញ្ហាកើតឡើងដល់សព្វថ្ងៃនេះ។ លើសំណុំរឿងនុយក្លេអ៊ែរកូរ៉េខាងជើងនេះ លោកសង្កត់ធ្ងន់ថា អ្វីដែលលោកកំពុងធ្វើ គួរត្រូវបានដោះស្រាយតាំងពីយូរមកហើយ។
ជុំវិញការប្រកាសផ្អាកសាកល្បងអាវុធរបស់កូរ៉េខាងជើង លោក ត្រាំ អះអាងថា អាមេរិកមិនបានធ្វើអ្វី ឬផ្ដល់អ្វីឲ្យកូរ៉េខាងជើងឡើយ។ តាមរយៈសារមួយទៀតលើ Twitter ផ្ទាល់ខ្លួន ប្រធានាធិបតីរូបនេះបញ្ជាក់ពីជំហររឹងមាំរបស់អាមេរិកប្រឆាំងកូរ៉េខាងជើង ដោយបន្ថែមថា អាមេរិកមិនបានបោះបង់អ្វីសោះឡើយ ហើយកូរ៉េខាងជើងក៏បានយល់ព្រមរំសាយនុយក្លេអ៊ែរ បិទទីតាំងសាកល្បង និងមិនធ្វើតេស្តអាវុធអ្វីឡើយ។
លោក ត្រាំ គ្រោងជួបមេដឹកនាំកំពូលកូរ៉េខាងជើង គីម ជុងអ៊ុន នៅដំណាច់ខែឧសភា ឬដើមខែមិថុនាខាងមុខ។ ការប្រកាសឈប់សាកល្បងអាវុធពីសំណាក់កូរ៉េខាងជើង បានធ្វើឲ្យក្ដីសង្ឃឹមនៃការរំសាយនុយក្លេអ៊ែរពីឧបទ្វីបកូរ៉េមានពន្លឺខ្លាំង។ មុនជួបលោក ត្រាំ លោក គីម នឹងជួបប្រធានាធិបតីកូរ៉េខាងត្បូង មូន ចេអ៊ីន នៅថ្ងៃទី២៧ ខែមេសា សិន។ លទ្ធផលនៃជំនួបនេះ នឹងក្លាយជាម៉ែត្រវាស់ស្ទង់ជោគជ័យជំនួបមេដឹកនាំអាមេរិក និងកូរ៉េខាងជើងនៅពេលខាងមុខដែរ៕
Tag:
អាមេរិក
កូរ៉េខាងជើង
ដូណាល់ ត្រាំ
នុយក្លេអ៊ែរ
© រក្សាសិទ្ធិដោយ thmeythmey.com