អ៊ីរ៉ង់ ប្រកាសបើកពិភាក្សាជាមួយរដ្ឋអារ៉ាប់ពីបញ្ហាសន្តិសុខតំបន់ដើម្បីបញ្ចប់ការប្រជែងឥទ្ធិពលគ្នាក្នុងតំបន់

អន្តរជាតិ

អ៊ីរ៉ង់ ប្រកាសបើកពិភាក្សាជាមួយរដ្ឋអារ៉ាប់ពីបញ្ហាសន្តិសុខតំបន់ដើម្បីបញ្ចប់ការប្រជែងឥទ្ធិពលគ្នាក្នុងតំបន់

25, Apr 2018 , 4:32 pm

រូបភាព

ដោយ: ថ្មីៗ

នៅក្នុងកិច្ចប្រជុំអង្គការសហប្រជាជាតិ អ៊ីរ៉ង់បានប្រកាសបើកចំហរសម្រាប់ការពិភាក្សាជាមួយបណ្តារដ្ឋ ឈូងសមុទ្រជុំវិញបញ្ហាសន្តិសុខតំបន់មជ្ឈិមបូព៌ា ដើម្បីបញ្ចប់រាល់ផ្នត់គំនិតប្រជែងគ្នាពង្រឹងឥទ្ធិពល និងគ្រប់គ្រងក្នុងតំបន់ទាំងមូល។ បើផ្នត់គំនិតបែបនេះមិនបញ្ចប់ តំបន់គ្មានស្គាល់សន្តិភាពឡើយ។

ថ្ងៃអង្គារទី ២៤ ខែមេសា រដ្ឋមន្ត្រីការបរទេសអ៊ីរ៉ង់លោក ចាវ៉ាត់ ហ្សារីវ (Javad Zarif) បានប្រកាសអញ្ជើញបណ្តារដ្ឋឈូងសមុទ្រឲ្យចូលរួមការជជែកពិភាក្សាដោយបើកចំហរលើបញ្ហាសន្តិសុខតំបន់។ គោលដៅនៃការអញ្ជើញនេះគឺដើម្បីធ្វើយ៉ាងណាបង្កើតឱកាសជួបពិភាក្សាគ្នាទល់មុខដើម្បីបញ្ចប់រាល់ការមើលឃើញគ្នាជាសត្រូវ និងប្រកួតប្រជែងកសាងឥទ្ធិពលរៀងខ្លួននោះ។

ទីភ្នាក់ងារព័ត៌មាន AFP បានស្រង់សម្តីរដ្ឋមន្ត្រីខាងលើពេលថ្លែងទៅកាន់កិច្ចប្រជុំអង្គការសហប្រជាជាតិដូច្នេះ៖ «យើងនៅទីនេះអញ្ជើញប្រទេសជិតខាងរបស់យើងទាំងអស់ ដែលមើលឃើញបញ្ហាប្រឈមច្រើនជាងពិសេសជម្លោះ និងសង្គ្រាមក្នុងតំបន់ឲ្យចូលរួមជាមួយយើង។ វាជាពេលដែលត្រូវដើរចេញឲ្យផុតពីផ្នត់គំនិតប្រជែងឥទ្ធិពលគ្រប់គ្រងតំបន់ដែលបញ្ឆេះជម្លោះ និងសង្គ្រាមហើយ»។

លោក ហ្សារីវ បានពន្យល់ថា វាគួរតែបញ្ចប់ការព្យាយាមពង្រឹងសន្តិសុខរបស់ខ្លួនដោយមិនខ្វល់ពីសន្តិសុខប្រទេសដទៃនោះ ហើយវាដល់ពេលបញ្ចប់ក្រុមសម្ព័ន្ធសន្តិសុខ ដោយជំនួសវិញនូវការបង្កើតបណ្តាញសន្តិសុខដែលអាចដោះស្រាយបញ្ហាប្រឈមរួមគ្នាវិញម្តង។

អ៊ីរ៉ង់ប្រកាសបើកចំហរចំពោះការពិភាក្សាគ្នានេះ កើតឡើងស្របពេលដែលប្រធានាធិបតីអាមេរិកលោក ដូណាល់ ត្រាំ ជួបជាមួយសមភាគីបារាំងលោក អេម៉ានុយអែល ម៉ាក្រុងនៅវ៉ាស៊ីនតោន។ ពេលនោះលោក ត្រាំ បានទិតៀនអ៊ីរ៉ង់ជាថ្មីដោយលោកនិយាយថា រាល់ជម្លោះនៅមជ្ឈិមបូព៌ា សុទ្ធតែមានស្នាមម្រាមដៃអ៊ីរ៉ង់។ លោកក៏គំរាមលុបចោលកិច្ចព្រមព្រៀងនុយក្លេអ៊ែរឆ្នាំ ២០១៥ ផងដោយលោកអះអាងថា កិច្ចព្រមព្រៀងនេះមិនដាក់គំនាបលើកម្មវិធីនុយក្លេអ៊ែរអ៊ីរ៉ង់ និងទប់ស្កាត់សកម្មភាពបង្ករឿងរបស់អ៊ីរ៉ង់នៅស៊ីរី យេម៉ែននិងលីបង់ឡើយ។

តាមពិតទៅអ៊ីរ៉ង់ជាសម្ព័ន្ធមិត្តចាក់ទឹកមិនលិចរបស់របបដឹកនាំស៊ីរីរបស់លោក បាសា អាល់អាសាដ ហើយរដ្ឋឥស្លាមនេះក៏គាំទ្រក្រុមហេស្បូឡានៅលីបង់ និងក្រុមឧទ្ទាមហ៊ូធី នៅយេម៉ែនផងដែរ។ អង្គការសហប្រជាជនកំពុងប្រឹងប្រែងធ្វើយ៉ាងណាជំរុញការចរចានយោបាយនៅយេម៉ែនដើម្បីបញ្ចប់សង្គ្រាមរ៉ាំរ៉ៃ ជាពិសេសការបន្តប្រយុទ្ធគ្នា និងការទម្លាក់គ្រាប់បែកដោយរដ្ឋឈូងសមុទ្រដឹកនាំដោយអារ៉ាប៊ីសាអូឌីត។ ពាក់ព័ន្ធនឹងវិបត្តិយេម៉ែននេះ មន្ត្រីទូតអង្គការសហប្រជាជាតិបានបង្ហើបថា អ៊ីរ៉ង់បង្ហាញការត្រៀមខ្លួនរួចរាល់ហើយក្នុងការចាប់ផ្តើមដាក់សម្ពាធលើក្រុមឧទ្ទាមហ៊ូធីឲ្យត្រឡប់ចូលតុចរចាវិញ ដើម្បីបង្ហាញទៅកាន់លោកខាងលិចនិងរដ្ឋឈូងសមុទ្រថា ខ្លួនមិនបង្កបញ្ហាដោយពួកគេចោទឡើយ៕