អន្តរជាតិ
ជំនួបមេដឹកនាំកូរ៉េ៖ គីម ជុងអ៊ុន នឹងដើរឆ្លងបន្ទាត់ព្រំដែនចូលទឹកដីកូរ៉េខាងត្បូង
× ជំនួបមេដឹកនាំកូរ៉េ នឹងចាប់ផ្ដើមនៅព្រឹកថ្ងៃទី២៧ ខែមេសា នៅឯតំបន់គ្មានកងទ័ពខណ្ឌចែកឧបទ្វីបកូរ៉េ។ ប្រធានាធិបតីកូរ៉េខាងត្បូង មូន ចេអ៊ីន នឹងទទួលមេដឹកនាំកំពូលកូរ៉េខាងជើង គីម ជុងអ៊ុន ត្រង់ខ្សែព្រំដែន ខណៈលោក គីម នឹងធ្វើដំណើរថ្មើរជើងចូលទឹកដីកូរ៉េខាងត្បូង។ ការជួបគ្នានៅបន្ទាត់សីមាព្រំដែននេះ ជានិមិត្តរូបនៃការបង្រួបបង្រួមកូរ៉េទាំងពីរ ដែលបែកបាក់ដោយសារសង្គ្រាម។
ជំនួបមេដឹកនាំកូរ៉េលើកទីបី ដែលគេឯងទន្ទឹងរង់ចាំនឹងធ្វើឡើងនៅម៉ោង៩ និង៣០នាទី [ម៉ោង៧ និង៣០នាទីនៅកម្ពុជា] នៅព្រំដែនបែងចែកកូរ៉េទាំងពីរ។ ប្រធានាធិបតីកូរ៉េខាងត្បូង មូន ចេអ៊ីន នឹងស្វាគមន៍មេដឹកនាំកំពូលកូរ៉េខាងជើង គីម ជុងអ៊ុន នៅត្រង់បេតុងដែលខណ្ឌចែកឧបទ្វីបកូរ៉េ។ នេះបើតាមការប្រកាសរបស់លោក Im Jong-seok ប្រធានសេនាធិការប្រធានាធិបតីកូរ៉េខាងត្បូងនៅថ្ងៃទី២៦ ខែមេសា។
ក្នុងសន្និសីទសារព័ត៌មាន មន្ត្រីជាន់ខ្ពស់កូរ៉េខាងត្បូងរូបនេះបានបញ្ចេញព័ត៌មានលម្អិតទាក់ទងជំនួបចរចាប្រវត្តិសាស្ត្រនេះ។ បន្ទាប់ពីចាប់ដៃគ្នានៅព្រំដែន មេដឹកនាំកូរ៉េទាំងពីរនឹងដើរសំដៅអាគារសន្តិភាព ដែលនៅប៉ែកខាងត្បូងខ្សែព្រំដែនក្នុងទឹកដីកូរ៉េខាងត្បូង ដោយមានការត្រួតពលកងកិត្តិយសផង។ ពេលឆ្លងព្រំដែន លោក គីម នឹងក្លាយជាមេដឹកនាំកូរ៉េខាងជើងទីមួយជាន់ទឹកដីកូរ៉េខាងត្បូងក្នុងពេល៦៥ឆ្នាំ។
ខណ្ឌសីមាព្រំដែនបែងចែកកូរ៉េទាំងពីរ (រូបភាព AFP)
យោងតាមទីភ្នាក់ងារព័ត៌មាន AFP លោក Im និយាយថា កូរ៉េខាងត្បូងនឹងទទួលលោក គីម ក្នុងនាមជាភ្ញៀវរដ្ឋ ដែលនឹងបញ្ចូលកម្មវិធីផ្លូវការជាច្រើន។ មុនជំនួបចរចាពេលព្រឹកដែលចាប់ផ្ដើមនៅម៉ោង១០ និង៣០នាទី លោក គីម នឹងចុះហត្ថលេខាលើសៀវភៅក្រាំងមាស ដែលចាត់ទុកជំនួបលើកនេះជាជំនូបសម្រាប់សន្តិភាព និងសុខដុមរមនីយកម្មនៅឧបទ្វីបកូរ៉េ។ ប្រធានបទសម្រាប់ការពិភាក្សា គឺការរំសាយនុយក្លេអ៊ែរកូរ៉េខាងជើង និងការបង្កើតសន្តិភាពអចិន្ត្រៃយ៍នៅឧបទ្វីបកូរ៉េ។
យ៉ាងណាមិញ ប្រតិភូកូរ៉េទាំងពីរមិនមានកម្មវិធីទទួលអាហារថ្ងៃត្រង់ជាមួយគ្នាឡើយ។ មុនជំនួបនៅពេលថ្ងៃរសៀល មេដឹកនាំកូរ៉េទាំងពីរនឹងដាំកូនឈើជានិមិត្តរូប រួចបន្តចរចាទៀត។ លោក មូន អាចនឹងស្នើឲ្យមានកិច្ចព្រមព្រៀងបញ្ចប់សង្គ្រាមកូរ៉េផ្លូវការផង។ សេចក្ដីថ្លែងការណ៍រួមនឹងត្រូវប្រកាសនៅចុងបញ្ចប់នៃកិច្ចប្រជុំ ដែលបន្តដោយកម្មវិធីអាហារពេលល្ងាច។
អ្វីគួរឲ្យចាប់អារម្មណ៍ ប្រតិភូកូរ៉េខាងជើងក៏មានបញ្ចូលលោកស្រី គីម យ៉ុងចុង ប្អូនស្រីបង្កើតលោក គីម ជុងអ៊ុន និងប្រមុខរដ្ឋកូរ៉េខាងជើងលោក គីម យ៉ុងណាម ផងដែរ។ ជាមួយនឹងវត្តមានមន្ត្រីកូរ៉េខាងជើងបែបនេះ ប្រធានាធិបតីកូរ៉េខាងត្បូងទំនងជាបង្កើតទំនាក់ទំនងដោយផ្ទាល់ជាមួយមេដឹកនាំកូរ៉េខាងជើង សំដៅពង្រីកការជៀទុកចិត្តទៅមក ក៏ដូចជាបើកផ្លូវដល់ការប្រឹងប្រែងរបស់អន្តរជាតិដើម្បីរំសាយនុយក្លេអ៊ែរកូរ៉េខាងជើងផងដែរ៕
Tag:
កូរ៉េខាងត្បូង
កូរ៉េខាងជើង
មូន ចេអ៊ីន
គីម ជុងអ៊ុន
© រក្សាសិទ្ធិដោយ thmeythmey.com