ដោយសារការពារព្រៃឈើ លោក ឈុត វុទ្ធី ត្រូវបានបាញ់សម្លាប់ ក្នុងថ្ងៃនេះ កាលពី៦ឆ្នាំមុន

ជាតិ

ដោយសារការពារព្រៃឈើ លោក ឈុត វុទ្ធី ត្រូវបានបាញ់សម្លាប់ ក្នុងថ្ងៃនេះ កាលពី៦ឆ្នាំមុន

26, Apr 2018 , 3:57 pm

រូបភាព

រូបថត លោក ឈុត វុទ្ធី កាលលោកនៅមានជីវិត

ដោយ: ថ្មីៗ

លោក ឈុត វុទ្ធី សកម្មជនមួយរួប ដែលប្តូរផ្តាច់និងចូលរួមយ៉ាងខ្លាំងក្លាក្នុងការការពារព្រៃឈើនិងបរិស្ថាន ត្រូវបានបាញ់សម្លាប់កាលពីថ្ងៃទី២៦ ខែមេសា ឆ្នាំ២០១២។ អង្គការក្រៅរដ្ឋាភិបាលមួយចំនួន បានបង្ហោះសារលើគេហទំព័ររបស់ខ្លួន និងលើបណ្តាញសង្គមហ្វេសប៊ុក ជុំវិញឃាតកម្មលើសកម្មជនការពារព្រៃឈើរូបនេះ ដែលកើតឡើងកាលពី៦ឆ្នាំមុន។

អង្គការលីកាដូ ដែលធ្វើការផ្នែកសិទ្ធិមនុស្ស បានចូលរួមរម្លឹកខួប៦ឆ្នាំ នៃការបាញ់សម្លាប់លោក ឈុត វុទ្ធី តាមរយៈការបង្ហោះសារលើទំព័រហ្វេសប៊ុក។ សាររបស់អង្គការក្រៅរដ្ឋាភិបាលមួយនេះ គឺគ្រាន់តែរម្លឹកឡើយវិញ នូវព្រឹត្តិការណ៍នៃការបាញ់សម្លាប់លោក ឈុត វុទ្ធី ប៉ុណ្ណោះ។

អង្គការលីកាដូ បានសរសេរយ៉ាងដូច្នេះថា៖«សកម្មជនបរិស្ថាន លោក ឈុត វុទ្ធី ត្រូវបានគេធ្វើឃាតកាលពី៦ឆ្នាំមុន នាថ្ងៃនេះ ខណៈលោកកំពុងស៊ើបអង្កេតពីបទល្មើសព្រៃឈើជាមួយអ្នកកាសែតមួយចំនួន នៅក្នុងតំបន់ព្រៃការពារ។ កងរាជអាវុធហត្ថម្នាក់ ដែលត្រូវបានគេបាញ់សម្លាប់នៅនឹងកន្លែងកើតហេតុ បានរងការចោទប្រកាន់ថា ជាអ្នកបាញ់សម្លាប់លោក ឈុត វុទ្ធី»។

ឯអង្គការខុមហ្វ្រេល ដែលធ្វើការផ្នែកការបោះឆ្នោត ក៏បានបង្ហោះសារលើទំព័រហ្វេសប៊ុកដែរ ដើម្បីចូលរួមរម្លឹកខួប៦ឆ្នាំនៃការបាញ់សម្លាប់លោក ឈុត វុទ្ធី។

ទីតាំងដែលលោក ឈុត វុទ្ធី ត្រូវបានបាញ់សម្លាប់ គឺស្ថិតក្នុងបរិវេណភូមិវាលបី ឃុំបាក់ខ្លង ស្រុកមណ្ឌលសីមា ខេត្តកោះកុង។ ឃាតក ដែលបាញ់សម្លាប់លោក ឈុត វុទ្ធី គឺលោក អ៊ិន រតនា មន្ត្រីកងរាជអាវុធហត្ថ។

តែបន្ទាប់ពីបាញ់សម្លាប់លោក ឈុត វុទ្ធី លោក អ៊ិត រតនា ក៏ត្រូវបានជនមិនស្គាល់មុខម្នាក់ទៀត បាញ់សម្លាប់ភ្លាមៗដែរ។ សំណុំរឿងឃាតកម្មលើលោក ឈុត វុទ្ធី ត្រូវតុលាការខេត្តកោះកុងតម្កល់ទុកឥតចាត់ការ ក្រោមហេតុផងថា បណ្តឹងអាជ្ញារលត់ ព្រោះឃាតកបានស្លាប់ទៅហើយ។

ដោយឡែក ឃាតកដែលបាញ់សម្លាប់លោក អ៊ិន រតនា ត្រូវតុលាការចោទប្រកាន់ប៉េអឹមម្នាក់ គឺលោក រ៉ាន់ បូរ័ត្ន ថាជាអ្នកសម្លាប់។ កាលពីខែតុលា ឆ្នាំ២០១៣ តុលាការខេត្តកោះកុង បានសម្រេចឲ្យមន្ត្រីប៉េអឹមរូបនេះ ជាប់ពន្ធនាគាររយៈពេល២ឆ្នាំ។ តែកាលនោះ មន្ត្រីប៉េអឹមខាងលើ ត្រូវជាប់ពន្ធនាគារ តែ៦ខែប៉ុណ្ណោះ ដោយទោសដែលនៅសល់ត្រូវព្យួរ៕