អន្តរជាតិ
ចូលកាន់តំណែងភ្លាម ប្រមុខការទូតអាមេរិកថ្មីចេញដំណើរទៅទារលុយប្រទេសអឺរ៉ុបភ្លែត រដ្ឋមន្រ្តីការបរទេសអាមេរិក Mike Pompeo ចាប់ដៃអគ្គលេខាធិការសម្ព័ន្ធយោធាណាតូ Jens Stoltenburg (រូបភាព AFP)
× មួយថ្ងៃក្រោយស្បថចូលកាន់តំណែងរដ្ឋមន្ត្រីការបរទេសអាមេរិកលោក Mike Pompeo បានប្រញាប់ធ្វើដំណើរទៅកាន់ទីក្រុងព្រុចសែលដើម្បីជាមួយសម្ព័ន្ធមិត្តតំបន់អឺរ៉ុប។ ក្រៅពីបញ្ហាគំរាមកំហែងរបស់រុស្ស៊ីក្នុងតំបន់ ប្រមុខការទូតអាមេរិកថ្មីក៏នឹងនាំសារចាស់របស់ប្រធានាធិបតី ដូណាល់ ត្រាំ ទៅប្រាប់សម្ព័ន្ធមិត្តរបស់ខ្លួន គឺឲ្យសមាជិកសម្ព័ន្ធយោធាណាតូបង្កើនការចំណាយលើវិស័យយោធាឲ្យបានពីរភាគរយនៃផលិតផលក្នុងស្រុកតាមការសន្យា។
រដ្ឋមន្ត្រីការបរទេសអាមេរិកថ្មី លោក Mike Pompeo បានទៅដល់ទីក្រុងព្រុចសែលនៅថ្ងៃទី២៧ ខែមេសា ដើម្បីចូលរួមប្រជុំជាមួយរដ្ឋមន្ត្រីការបរទេសនៃរដ្ឋសមាជិកសម្ព័ន្ធយោធាណាតូ។ នៅស្នាក់ការអង្គការណាតូ លោក Pompeo ត្រូវបានស្វាគមន៍ដោយលោកអគ្គលេខាធិការ Jens Stoltenberg ។ លោក Stoltenberg ចាត់ទុកវត្តមានរបស់លោក Pompeo នៅអឺរ៉ុបមួយថ្ងៃក្រោយស្បថចូលកាន់តំណែង ជាការឲ្យតម្លៃលើសម្ព័ន្ធណាតូ។
ច្បាស់ណាស់ថា ប្រមុខការទូតអាមេរិករូបនេះនឹងប្រាប់សម្ព័ន្ធមិត្តការប្ដេជ្ញាចិត្តរបស់អាមេរិក និងជំហរគាំទ្រឥតងាករេរបស់ខ្លួនដើម្បីប្រឆាំងសកម្មភាពរបស់រុស្ស៊ីនៅអ៊ុយក្រែន និងស៊ីរី។ មន្ត្រីក្រសួងការបរទេសអាមេរិកនិយាយដែរថា លោក Pompeo ក៏នឹងពិភាក្សាពីការពង្រឹងសន្តិសុខរដ្ឋអឺរ៉ុបបែកខាងកើតដែលប្រឈមមុខការគំរាមកំហែងពីសំណាក់រុស្ស៊ីផង។ យ៉ាងណាមិញ សារដែលលោក Pompeo នាំមកជាមួយអាចធ្វើឲ្យសម្ព័ន្ធមិត្តអាមេរិកប្រចាំអឺរ៉ុបខកចិត្ត។
បើតាមទីភ្នាក់ងារព័ត៌មាន AFP លោក Pompeo នឹងរំឭកការទាមទាររបស់ប្រធានាធិបតី ដូណាល់ ត្រាំ ឲ្យសមាជិកបក្សសម្ព័ន្ធយោធាណាតូបង្កើនការចំណាយលើវិស័យយោធា ដើម្បីកាត់បន្ថយអម្រែកចំណាយរបស់អាមេរិក។ លោក ត្រាំ ចង់ឲ្យសមាជិកណាតូធ្វើពាក្យសន្យារបស់ខ្លួនដែលឯកភាពគ្នាកន្លងមក គឺបង្កើនការចំណាយសម្រាប់វិស័យកងទ័ពឲ្យបានពីរភាគនៃផលិតផលក្នុងស្រុករបស់ប្រទេសនីមួយៗ។
មកទល់សព្វថ្ងៃ មានតែសមាជិកណាតូចំនួន ៦ប្រទេសប៉ុណ្ណោះដែលបានធ្វើតាមពាក្យសន្យានេះ និងប្រទេសចំនួន ៩ទៀតកំពុងរៀបចំផែនការដំឡើងការចំណាយរបស់ខ្លួន។ សមាជិកចំនួន១៣ផ្សេងទៀតមិនទាន់មានសកម្មភាពអ្វីនៅឡើយទេរាប់ទាំងអាល្លឺម៉ង់ដែលជាប្រទេសសមាជិកណាតូធំជាងគេ និងមានលុយជាងគេ។ មន្ត្រីអាមេរិកនិយាយថា អាល្លឺម៉ង់ចំណាយតែ១.២៤ភាគរយនៃGDP របស់ខ្លួនលើវិស័យយោធា។
លោក ត្រាំ មិនសប្បាយចិត្តឡើយចំពោះការស្ទាក់ស្ទើររបស់សមាជិកណាតូទាំងនេះ ខណៈអម្រែកហិរញ្ញវត្ថុរបស់អាមរិកពិតជាធំមែនទៀត បើប្រៀបធៀបទៅនឹងការចំណាយរបស់សមាជិកផ្សេងទៀត។ ប្រធានាធិបតីអាមេរិករូបបានបញ្ជាក់ម្ដងហើយម្ដងទៀតថា អាមេរិកនឹងមិនបង្កើនការចំណាយឲ្យណាតូទៀតឡើយ ហើយលោកក៏ថែមទាំងគំរាមដកអាមេរិកចេញពីសម្ព័ន្ធយោធានេះទៅទៀតដោយសារតែបញ្ហានេះ៕
Tag:
អាមេរិក
NATO
Mike Pompeo
© រក្សាសិទ្ធិដោយ thmeythmey.com