ជាតិ
សេដ្ឋកិច្ច
World Bank ផ្ដល់មូលនិធិ ៩០លានដុល្លារ បង្កើនគុណភាពឧត្តមសិក្សា
× ភ្នំពេញ៖ ធនាគារពិភពលោក (World Bank) បានអនុម័តផ្ដល់ហិរញ្ញប្បទានទឹកប្រាក់ ៩០លានដុល្លារអាមេរិក ដល់គម្រោងមួយដែលសំដៅជួយបង្កើនគុណភាពអប់រំនៅថ្នាក់ឧត្តមសិក្សា និងបង្កលទ្ធភាពដល់សិស្សក្រីក្រទទួលបានការអប់រំនៅកម្រិតនេះ។ នេះបើតាមសេចក្ដីប្រកាសព័ត៌មានរបស់ធនាគារមួយនេះ នៅថ្ងៃទី២៦ខែមេសា។
នេះជាគម្រោងបង្កើនសមត្ថភាពស្ថាប័នឧត្តមសិក្សា និងជួយបង្កើនគុណភាពអប់រំ និងការស្រាវជ្រាវនៅតាមស្ថាប័នឧត្តមសិក្សាគោលដៅ ហើយបង្កើនឱកាសឲ្យទទួលបានការសិក្សានៅឧត្តមសិក្សា។ គម្រោងនេះក៏ជួយបង្កើនអភិបាលកិច្ចនៅក្នុងវិស័យនេះផងដែរ។
គម្រោងដែលមានរយៈពេល៦ឆ្នាំនេះ នឹងផ្ដោតលើមុខវិជ្ជាវិទ្យាសាស្ត្រ បច្ចេកវិទ្យា វិស្វកម្ម គណិតវិទ្យា (STEM) និងកសិកម្ម។ តាមរយៈគម្រោងនេះ គេរំពឹងថា និស្សិតដែលបញ្ចប់ការសិក្សា នឹងទទួលបានជំនាញដែលកាន់តែឆ្លើយតបតម្រូវការទីផ្សារ និងប្រែក្លាយសេដ្ឋកិច្ចប្រទេសឲ្យពឹងផ្អែកលើចំណេញ ជំនាញវិញ។
គម្រោងនេះនឹងជួយគាំទ្រដល់គោលដៅនៃគោលនយោបាយការអភិវឌ្ឍឧស្សាហកម្ម តាមរយៈសកម្មភាពធំៗចំនួនប្រាំ រួមមាន ការផ្តល់មូលនិធិសម្រាប់ការងារសិក្សាស្រាវជ្រាវក្នុងមុខវិជ្ជាអាទិភាពនានា, ពង្រីកចំនួនបន្ទប់សិក្សា និងមន្ទីរពិសោធន៍, សង់និវេសនដ្ឋានសម្រាប់និស្សិតក្រីក្រស្នាក់នៅ, ពង្រឹងប្រព័ន្ធធានាគុណភាពនិងប្រព័ន្ធព័ត៌មាន និងធ្វើការជាមួយដៃគូរអន្តរជាតិក្នុងការកែលម្អកម្មវិធី និងវិធីសាស្ត្របង្រៀននៅក្នុងមុខវិជ្ជាជាអាទិភាព។
ការសង់និវេសនដ្ឋានសិស្សនឹងសាងសង់នៅរាជធានាភ្នំពេញ និងការពង្រីកអាគារសិក្សាឬហេដ្ឋារចនាសម្ព័ន្ធស្ថាប័នឧត្តមសិក្សាចំនួនពីរ គឺក្នុងខេត្តបាត់ដំបង និងខេត្តស្វាយរៀង។
លោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ មានប្រសាសន៍ដូច្នេះថា៖«គម្រោងនេះនឹងជួយយើងក្នុងការឈានទៅបង្កើតយុទ្ធសាស្ត្រគ្រប់ជ្រុងជ្រោយមួយសម្រាប់ការអភិវឌ្ឍឧត្តមសិក្សា ដើម្បីជួយឱ្យនិស្សិតកម្ពុជាដែលបញ្ចប់ការសិក្សាមានសមត្ថភាពអាចឆ្លើយតបទៅនឹងតម្រូវការកាន់តែខ្លាំងឡើងរបស់ទីផ្សារការងារ និងឱកាសកាន់តែច្រើនសម្រាប់ធ្វើការចល័តទី និងផ្ទេរបច្ចេកវិទ្យានៅក្នុងរង្វង់សហគមន៍សេដ្ឋកិច្ចអាស៊ាន និងលើសពីតំបន់នេះទៅទៀត»។
លោកស្រី អ៊ីហ្គូណា ដូប្រាចា នាយិកាគ្រប់គ្រងធនាគារពិភពលោកប្រចាំកម្ពុជា ថ្លែងដូច្នេះថា «ការកសាងសមត្ថភាពស្រាវជ្រាវមានគុណភាពខ្ពស់មួយ និងការត្រៀមឲ្យនិស្សិតដែលបញ្ចប់ការសិក្សានៅឧត្តមសិក្សាទៅមានជំនាញខ្ពស់ គឺជាអាទិភាពមួយសម្រាប់កម្ពុជា និងធនាគារពិភពលោក»។ លោកស្រីបន្តថា៖«ការចាប់ផ្តើមសកម្មភាពពីពេលនេះតទៅ អាចជួយកម្ពុជាមានភាពឈានមុខក្នុងទុនធនធានមនុស្ស និងពង្រឹងប្រសិទ្ធភាពនៅក្នុងកម្រិតឧត្តមសិក្សា»។
ការផ្តល់ហិរញ្ញប្បទានពី World Bank នេះ គឺបន្តពីគម្រោងបង្កើនគុណភាពនិងសមត្ថភាពឧត្តមសិក្សានៅកម្ពុជា (Higher Education Quality and Capacity Improvement Project/HEQCIP) ពីឆ្នាំ ២០១០ រហូតដល់ឆ្នាំ២០១៧ ដែលបានកសាងមូលដ្ឋានគ្រឹះមួយសម្រាប់សមត្ថភាពតាមវិស័យ និងបង្កើតឱ្យមានបរិស្ថានគោលនយោបាយល្អមួយសម្រាប់ជំរុញឱ្យការវិនិយោគកាន់តែច្រើនទៀត៕
Tag:
អប់រំ
ឧត្តមសិក្សា
© រក្សាសិទ្ធិដោយ thmeythmey.com