កីឡាអន្តរជាតិ
អន្តរជាតិ
Barcelona ក្លាយជាម្ចាស់ពាន La Liga ហើយ Iniesta ចាប់ផ្តើមលាអ្នកគាំទ្រ Andres Iniesta អបអរក្រោយ Barcelona ឈ្នះ Deportivo Coruna ដើម្បីក្លាយជាម្ចាស់ពាន La Liga លើកទី២៥។ រូបថត AFP
× Lionel Messi បានស៊ុតបាល់បញ្ចូលទី៣គ្រាប់ក្នុងជ័យជម្នះ ៤-២ របស់ Barcelona លើម្ចាស់ផ្ទះ Deportivo La Coruna ដើម្បីជួយឲ្យក្លិបយក្សអេស្ប៉ាញក្លាយជាពាន La Liga ខណៈពួកគេនៅសល់៤ប្រកួតទៀតនៅក្នុងដៃ។ ជាមួយគ្នានេះផងដែរ ខ្សែបម្រើឆ្នើម Andres Iniesta បានចាប់ផ្តើមលាអ្នកគាំទ្ររបស់ខ្លួន ក្រោយការប្រកាសចេញពីក្លិបនៅចប់រដូវកាល។
ក្រោមការដឹកនាំរដូវកាលដំបូងរបស់លោក Ernesto Valverde ក្លិប Barcelona បានឈ្នះពាន La Liga ជាលើកទី២៥ បន្ទាប់ពីបានយកឈ្នះ Deportivo La Coruna ៤-២ នៅកីឡដ្ឋាន Riazor។ Barcelona បាននាំមុខ២គ្រាប់មុន ដែលសម្រេចបានដោយ Philippe Coutinho និង Messi ប៉ុន្តែម្ចាស់ផ្ទះបានវាយបកវិញបាន២គ្រាប់ពីសំណាក់ Lucas Perez និង Emre Colak មុនពេលដែល Messi បន្ថែមបាន២គ្រាប់ទៀតជាមួយនឹងការប្រកួត១០នាទីដែលនៅសេសសល់។
Barcelona មានពិន្ទុលើសក្រុមលេខ២ Atletico Madrid រហូតដល់ទៅ១១ពិន្ទុ ខណៈម្ចាស់ជើងឯកឆ្នាំចាស់ Real Madrid មាន៧១ពិន្ទុ។ ទោះបីជាយ៉ាងណាក៏ដោយ ក្រុមទាំងបី សុទ្ធតែទទួលបានកៅអីនៅ Champions League នារដូវកាលក្រោយ ស្របពេលដែល Deportivo La Coruna, Las Palmas និង Malaga បានធ្លាក់ទៅលេងនៅ Segunda Division។
នៅថ្ងៃដដែល ខ្សែបម្រើឆ្នើមអេស្ប៉ាញ Andres Iniesta បានចាប់ផ្តើមលាអ្នកគាំទ្ររបស់ខ្លួន បើគិតចាប់តាំងពីគេប្រកាសចាកចេញពីក្លិបនៅចប់រដូវកាល។ សម្រាប់ការប្រកួតនេះ Iniesta បានចូលលេងនៅ៣នាទីចុងក្រោយ។
Iniesta បានចូលលេងជាកីឡាករយុវជន Barcelona ចន្លោះពីឆ្នាំ១៩៩៦ ដល់ឆ្នាំ២០០១ ហើយលេងនៅឈុត B រវាងឆ្នាំ២០០១-២០០៣ មុននឹងលេងជាទៀងទាត់ឲ្យឈុតធំ រហូតដល់បច្ចុប្បន្ន។ កីឡាករវ័យ៣៣ឆ្នាំរូបនេះ ឈ្នះពាន La Liga សរុបចំនួន៩លើក ពាន Copa del Rey ៦លើក ពាន Supercopa de Espana ៧លើក ពាន UEFA Champions League ៤លើក ពាន UEFA Super Cup ៣លើក ពាន FIFA Club World Cup ៣លើក និងពានឯកត្តជនជាច្រើនទៀតក្នុងនាមជាកីឡាកររបស់ Barcelona៕
© រក្សាសិទ្ធិដោយ thmeythmey.com