ជាតិ
សង្គមជាតិ
របាយការណ៍៖ ស្ត្រីអ្នកសារព័ត៌មាន ប្រឈមទាំងសម្ពាធការងារ និងការបៀតបៀនផ្លូវភេទ
× ភ្នំពេញ៖ វិសមភាពយេនឌ័រ និងការសុវត្ថិភាពក្នុងពេលបំពេញការងារ គឹជាបញ្ហាប្រឈមមួយរបស់ស្ត្រីកម្ពុជា នៅក្នុងវិស័យសារព័ត៌មាន។ បន្ថែមពីនេះ ក៏នៅបញ្ហាប្រឈមផ្សេងៗទៀត ដែលរួមមានតួនាទីជាអ្នកដឹកនាំដែលភាគច្រើនត្រូវបានផ្តល់ទៅឲ្យបុរស និងឱកាសបញ្ចេញសមត្ថភាពដោយសារតែការយល់ថាស្ត្រីងាយរងគ្រោះ នៅពេលចុះយកព័ត៌មានដល់ទីតាំងប្រឈមហានិភ័យ និងគ្រោះថ្នាក់។ ក្រៅពីនេះ ស្ត្រីជាអ្នកសារព័ត៌មាន ប្រឈមខ្ពស់ នឹងការបៀតបៀនផ្លូវភេទទាំងនៅកន្លែងការងារ និងពេលទៅយកព័ត៌មានផងដែរ។
របាយការណ៍មួយមានចំណងជើងថា៖«ឆ្ពោះទៅរកសមភាពយេនឌ័រ-ស្ត្រី និងវិស័យសាព័ត៌មានកម្ពុជា» ត្រូវបានចេញផ្សាយជាផ្លូវការ នៅថ្ងៃទិវាសេរីភាពសារព័ត៌មានពិភពលោកឆ្នាំ២០១៨ ។
លោក Jaldeep Katwala អ្នកគ្រប់គ្រងគម្រោងបណ្តាញបណ្តុះបណ្តាលព័ត៌មានអាស៊ីអាគ្នេយ៍នៃអង្គការ Fojo ដែលបានធ្វើបទបង្ហាញលើរបាយការណ៍នេះ បានលើកឡើងថា ចំនួនបុរសធ្វើការនៅក្នុងវិស័យសារព័ត៌មាន មានច្រើនស្ត្រី បូករួមទាំងតួនាទីជាថ្នាក់ដឹកនាំផង។ ក្រៅតែពីមានចំនួនតិចហើយ អ្នកសារព័ត៌មានជាស្ត្រី ក៏ប្រឈមនឹងសម្ពាធការងារខ្ពស់ផងដែរ ពិសេសបញ្ហាសុវត្ថិភាព។
អ្នកសារព័ត៌មានកម្ពុជា ប្រឈមនឹងការគំរាមកំហែង ពេលយកព័ត៌មានពីបញ្ហានយោបាយ និងជម្លោះដីធ្លី ហើយជារឿយៗ ស្ត្រីត្រូវបានមើលឃើញថាងាយរងគ្រោះ នៅពេលចុះយកព័ត៌មានដល់ទីតាំងប្រឈមហានិភ័យ និងគ្រោះថ្នាក់។ ក្នុងករណីនេះ បុរសមានឱកាសច្រើនជាងស្ត្រីក្នុងការចុះយកព័ត៌មាន។
របាយការណ៍ស្រាវជ្រាវដដែល ក៏គូសបញ្ជាក់ដែរថា ស្ត្រីប្រឈមនឹងការបៀតបឿនផ្លូវភេទខ្ពស់ ពោលគឺមានស្ត្រីដល់ទៅ៤០ភាគរយ ជួបបញ្ហាបៀតបឿនផ្លូវភេទ ពីសហការីជាបុរសនៅកន្លែងការងារ។ បើតាម លោក Jaldeep Katwala ការបៀតបៀនភាគច្រើន កើតមានក្នុងរូបភាពការនិយាយស្តីមិនសមរម្យ បញ្ឆិតបញ្ឆៀង ត្រូវថ្នាក់លើប៉ះពាល់ ឬស្ទាបអង្អែលជាដើម។
សម្រាប់លោក Jaldeep Katwala បញ្ហានេះ គួរត្រូវបានដោះស្រាយ តាមរយៈការរៀបចំយន្តការប្តឹង ឬយន្តការដ៏មានប្រសិទ្ធភាពណាមួយ ការពារក៏ដូចជាផ្តល់យុត្តិធម៌ចំពោះស្ត្រី និងការធ្វើឲ្យមានសមធម៌រវាងបុរស និងស្ត្រី នៅក្នុងវិស័យសារព័ត៌មាន។
លោកស្រី ធីតា ឃឹះ នាយិការប្រតិបត្តិការអង្គការសីលការ សង្កេតឃើញថា សង្គមកម្ពុជានៅមានការរើសអើងច្រើនលើស្ត្រី។ លោកស្រី បានលើកឧទាហរណ៍អំពីការបៀតបៀនផ្លូវភេទលើស្ត្រី នៅក្នុងកន្លែងការងារដែលផ្តោតទៅលើនិយាយលេងសើចរបស់បុរសៗ ចំពោះសហការីជាស្ត្រីរបស។ លោកស្រី ធីតា ឃឹះ បន្ថែមដូច្នេះ៖ «ភាគច្រើនបុរសច្រើនតែនិយាយលេងសើចច្រើន ហើយការលេងសើចនោះ គឺសឹងតែថា៨៥ភាគរយគឺចូលដល់រឿងផ្លូវភេទ។ នេះគឺជាបញ្ហាមួយដ៏ធំនៅក្នុងសង្គមរបស់យើង ដោយសារនៅក្នុងសង្គមអត់ទាន់យល់ថា អ្វីទៅជាការបៀតបៀនផ្លូវភេទ ហើយយើងក៏អត់ទាន់មានច្បាប់ដើម្បីចាត់វិធានការលើរឿងនេះ។ រឿងនេះ ធ្វើឲ្យស្ត្រីដែលធ្វើការងារក្នុងវិស័យសារព័ត៌មាន កាន់តែមានសម្ពាធ»។
តែយ៉ាងណាក៏ដោយ លោកស្រី ធីតា ឃឹះ មិនបានទម្លាក់កំហុងទាំងស្រុងទៅលើបុរសនោះ។ ញ្ហានេះ ក៏បណ្តាលមកពីស្ត្រី ខ្លួនឯងដែលមិនសូវបានយល់ពីការបៀតបៀនផ្លូវភេទ គួបផ្សំនឹងបរិយាកាសការងារដែលភាគច្រើនមានតែបុរសនោះ។ លោកស្រី ធីតា ឃឹះ បានស្នើឲ្យបុរស កែតម្រូវរបៀបនិយាយលេងសើចរបស់ខ្លួន ខណៈស្ត្រីខ្លួនឯង ត្រូវហ៊ានរាយការណ៍ពីសកម្មភាពបៀតបៀនផ្លូវភេទនេះ៕
Tag:
សារព័ត៌មាន
សេរីភាពសារព័ត៌មាន
© រក្សាសិទ្ធិដោយ thmeythmey.com