កីឡាជាតិ
ជាតិ
កម្ពុជាធ្វើជាម្ចាស់ផ្ទះវេទិកាអូឡាំពិកតំបន់ ដែលមានជាង៣០ប្រទេសចូលរួម លោក វ៉ាត់ ចំរើន ផ្តល់បទសម្ភាសដល់អ្នកសារព័ត៌មានក្រោយកិច្ចប្រជុំគណៈកម្មការរៀបចំការប្រកួតកីឡាស៊ីហ្គេមលើកទី៣២ កាលពីពេលកន្លងទៅ
× ដោយបានសិទ្ធអនុញ្ញាតពីក្រុមប្រឹក្សាអូឡាំពិកអាស៊ី និងគណៈកម្មាធិការអូឡាំពិកអន្តរជាតិ កម្ពុជានឹងធ្វើជាម្ចាស់ផ្ទះវេទិកាអូឡាំពិកតំបន់ OS/OCA Regional Forum ចន្លោះពីថ្ងៃទី៦-៧ ឧសភា នៅសណ្ឋាគារសុខា។ វេទិកា ដែលពិភាក្សាពីព្រឹត្តិការណ៍កីឡាអូឡាំពិក និងកីឡាអាស៊ីនេះ មានសមាជិកជាង១០០នាក់មកពី៣៥ប្រទេសចូលរួម។ កម្ពុជារំពឹងថា តាមរយៈវេទិកានេះនឹងទទួលបានការគាំទ្រកាន់តែខ្លាំងពីសំណាក់ស្ថាប័នអន្តរជាតិមកលើចលនាអូឡាំពិកកម្ពុជា។ កម្ពុជាក៏គ្រោងធ្វើបទបង្ហាញពីវឌ្ឍនភាពចុងក្រោយសម្រាប់ការត្រៀមធ្វើជាម្ចាស់ផ្ទះកីឡាស៊ីហ្គេមលើកទី៣២ក្នុងវេទិកានេះផងដែរ។
អ្នកជំនាញកីឡាមកអាស៊ីខាងកើត អាស៊ីកណ្តាល និងអាស៊ីអាគ្នេយ៍ប្រមាណជា១០០នាក់ នឹងមកជួបជុំគ្នានៅកម្ពុជា ដើម្បីចែករំលែកបទពិសោធល្អៗពីការអភិវឌ្ឍវិស័យកីឡា ក៏ដូចជាពិភាក្សាពីបញ្ហាវិស័យកីឡា ក្នុងវេទិកាអូឡាំពិកតំបន់ ដែលកម្ពុជាធ្វើជាម្ចាស់ផ្ទះពីថ្ងៃទី៦-៧ ឧសភា ឆ្នាំ២០១៨ នៅសណ្ឋាគារសុខាត្រើយម្ខាង។ ក្នុងចំណោមសមាជិកចូលរួមទាំង៣៥ប្រទេស ក៏មានវត្តមានរបស់អាមេរិក និងចក្រភពអង់គ្លេសផងដែរ។ នេះបើតាមការអះអាងរបស់លោក វ៉ាត់ ចំរើន អគ្គលេខាធិការ NOCC។
អគ្គលេខាធិការរូបនេះបានបន្ថែមថា ក្រៅពិភាក្សាពីបញ្ហាវិស័យកីឡា ក៏មានការធ្វើបទបង្ហាញរបស់គណៈកម្មការជំនាញរៀបចំព្រឹត្តិការណ៍កីឡាអូឡាំពិកយុវជននៅអាហ្សង់ទីន កីឡាអាស៊ីនៅឥណ្ឌូណេស៊ី និងព្រឹត្តិការណ៍អូឡាំពិករដូវក្តៅនៅប្រទេសជប៉ុន ដើម្បីទាញការចាប់អារម្មណ៍ពីបណ្តាប្រទេសទាំងនោះឲ្យចូលរួមព្រឹត្តិការណ៍ទាំងនេះផងដែរ។
លោក វ៉ាត់ ចំរើន យល់ថា ការធ្វើម្ចាស់ផ្ទះវេទិកាអូឡាំពិកតំបន់នេះ កម្ពុជាទទួលបានអត្ថប្រយោជន៍ច្រើនដូចជា បានផ្សព្វផ្សាយពីការរីកចម្រើននៃចលនាអូឡាំពិកនៅកម្ពុជា។ ពិសេសទទួលបានការគាំទ្រ និងទំនុកចិត្តកាន់តែខ្លាំងពីសំណាក់ស្ថាប័នអន្តរជាតិទាំងបញ្ហាសន្តិសុខ និងស្ថេរភាពនយោបាយ។
«អត្ថប្រយោជន៍ចំពោះយើង គឺទំនុចចិត្តអន្តរជាតិមកលើស្ថេរភាពនយោបាយ សន្តិភាព និងការអភិវឌ្ឍរបស់កម្ពុជា។ ម្យ៉ាងទៀតវាជាឱកាសផ្សព្វផ្សាយពីដំណើរវិវិត្ត និងរាយការណ៍ពីវឌ្ឍនភាពនៃការត្រៀមរៀបចំធ្វើម្ចាស់ផ្ទះកីឡាស៊ីហ្គេមរបស់យើង។ ដូច្នេះវាចំណេញសម្រាប់យើងក្នុងការទាក់ទាញការគាំទ្រ និងការជួយឧបត្ថម្ភពីអន្តរជាតិ»។ នេះជាការរៀបរាប់ពីអត្ថប្រយោជន៍នៃការធ្វើម្ចាស់ផ្ទះវេទិកាអូឡាំពិកតំបន់របស់លោក វ៉ាត់ ចំរើន។
ក្នុងនាមជាម្ចាស់ផ្ទះ កម្ពុជានឹងប្រើវេទិកានេះទាក់ទាញការគាំទ្រ និងជួយឧបតម្ភពីសំណាក់ស្ថាប័នអន្តរជាតិតាមរយៈការបង្ហាញពីគម្រោង និងការវិវត្តចុងក្រោយនៃការត្រៀមធ្វើជាម្ចាស់ផ្ទះការប្រកួតកីឡាស៊ីហ្គេមលើកទី៣២នៅឆ្នាំ២០២៣។ វេទិកាអូឡាំពិកតំបន់នេះ តែងតែផ្តល់ជូនដល់ប្រទេស ដែលត្រៀមធ្វើម្ចាស់ផ្ទះព្រឹត្តិការណ៍កីឡាធំៗ ដើម្បីបង្ហាញការចាប់អារម្មណ៍ ក៏ដូចជាទាក់ទាញការគាំទ្រពីបរទេស។
នេះជាលើកទី២ហើយ ដែលកម្ពុជាទទួលបានសិទ្ធិពីក្រុមប្រឹក្សាអូឡាំពិកអាស៊ី និងគណៈកម្មាធិការអូឡាំពិកអន្តរជាតិធ្វើជាម្ចាស់ផ្ទះរៀបចំវេទិកាអូឡាំពិកតំបន់នេះ។ កាលពី៤ទៅ៥ឆ្នាំមុន កម្ពុជាធ្លាប់ធ្វើម្ចាស់ផ្ទះវេទិកានេះម្តងរួចមកហើយ ដោយកាលណោះរៀបចំនៅខេត្តសៀមរាបដែលមានប្រទេសចូលរួមតែជាង២០ប្រទេសប៉ុណ្ណោះ៕
Tag:
NOCC
វ៉ាត់ ចំរើន
វេទិកាអូឡាំពិកតំបន់
© រក្សាសិទ្ធិដោយ thmeythmey.com